Friday, September 4, 2015

စစ်တပ်၏ ဖမ်းဆီးမှုတွင် ပျောက်ဆုံးနေသော ဦးတူးဂျာအမှု သမ္မတထံ စာပို့တိုင်ကြား

(ဧရာဝတီ)

ကချင်ပြည်နယ် ကာမိုင်းမြို့ ဇီးကုန်း ရပ်ကွက်တွင် နေထိုင်သည့် ဦးတူးဂျာ သည် နယ်မြေခံစစ်တပ်၏ ဖမ်းဆီးခံရ ပြီးနောက် ပျောက်ဆုံး လျက်ရှိရာ ယင်း အမှုနှင့်ပတ် သက်၍ အမှုမှန် ဖော်ထုတ်ပေး ပါရန် နိုင်ငံတော် သမ္မတ ဦးသိန်းစိန်ထံသို့ ဦးတူးဂျာ ၏ မိသားစုဝင်များ က ယနေ့တွင် စာပေးပို့ထားကြောင်း သိရသည်။

 
ဇွန် ၁၉ ရက် ညနေပိုင်း ကာမိုင်းမြို့ အခြေစိုက် ခြေလျင်တပ်ရင်း ၂၅၀ မှ ဗိုလ်မှူး ရဲကျော်သူတို့ အဖွဲ့က ဦးတူးဂျာနှင့် အတူ ဒေသခံ ၃ ဦးကို ဖမ်းဆီးခေါ်ဆောင်သွားပြီး ဒေသခံ ၃ ဦးကို ဇွန်၂၀ ရက်တွင် ပြန်လွှတ်ပေးခဲ့သော်လည်း ဦးတူးဂျာကို ပြန်မလွှတ်ခဲ့ကြောင်း၊ ဦးတူးဂျာနှင့် အတူ ဖမ်းဆီးခေါ်ဆောင်သွားခြင်း ခံရသူများမှာ ဦးသန်းလွင်၊ ဦးဖိုးသေးနှင့် ဦးဇော်ထွန်း (ခ) မောင်ကြိုင်တို့ ဖြစ်ပြီး ဦးတူးဂျာသည် ခြေလျင်တပ်ရင်း ၂၅၀ က ဖမ်းဆီး စစ်ဆေးစဉ် သေဆုံးသွားပြီဟု ပြန်လည် လွတ်မြောက်လာသူ ဦးသန်းလွင်က သြဂုတ်လတွင် အတည်ပြု ပြောဆိုကြောင်း၊ စစ်တပ်ကမူ ဦးတူးဂျာ သေဆုံးမှု၊ ပျောက်ဆုံးမှုနှင့်ပတ်သက်၍ တစုံတရာ ပြောဆိုခြင်းမရှိဘဲ ပြန်လည် လွှတ်ပေးလိုက်ပြီဟုသာ ပြောဆိုကြောင်း ဦးတူးဂျာ အမှုကို ရှေ့နေအဖြစ် လိုက်ပါ ဆောင်ရွက်နေသူ ဦးမာခါးက ဆိုသည်။

“ကျနော်တို့က ဒီနေ့ နိုင်ငံတော် သမ္မတကြီးနဲ့ ကာချုပ် အပါအဝင် ၈ နေရာကို လိပ်မူ စာပို့ထားပါတယ်။ တူးဂျာ အမှုနဲ့ ပတ်သက်ပြီး အမှန်တရား ဖော်ထုတ်ဖို့ အမှုမှန် ဖော်ထုတ်ဖို့ သူတို့ ဖျောက်ဖျတ်ထားတဲ့ အလောင်းကို ပြန်ပေးဖို့ ကျနော်တို့ စာတင်ထားပါတယ်” ဟု ဦးမာခါးက ပြောသည်။

ဦးတူးဂျာတို့ ၄ ဦးကို ဖမ်းဆီးခေါ်ဆောင်သွားစဉ်က ကချင်လွတ်လပ်ရေး တပ်မတော် (KIA) နှင့် ပတ်သက်သည်ဟု သံသ ယ ရှိနေသည်ဟု ယူဆပြီး စစ်တပ်က လာရောက် ဖမ်းဆီးခေါ်ဆောင်မှုသည် သင့်တော်ခြင်း မရှိကြောင်း ဦးမာခါးက ဆက်ပြောသည်။

ကချင်ပြည်နယ်၊ မြစ်ကြီးနားမြို့ရှိ မြောက်ပိုင်းတိုင်း စစ်ဌာနချုပ်ကမူ ဖမ်းဆီးမှုအတွင်း ဦးတူးဂျာ ပျောက်ဆုံးမှု နှင့်ပတ်သက်၍ ငြင်းဆိုထားပြီး ဦးတူးဂျာ အပါအ၀င် ဒေသခံ ၄ ဦးကို ဇွန် ၁၉ ရက်တွင် ဖမ်းဆီးခေါ်ဆောင် စစ်ဆေးခဲ့ပြီး ဇွန်၂၀ ရက်တွင် သက်သေများဖြင့် ပြန်လည် လွှတ်ပေးခဲ့ပြီးဖြစ်ကြောင်း ကချင်ပြည်နယ်အစိုးရထံ အကြောင်း ကြားခဲ့ကြောင်း သိရှိရသည်။

ကချင်ငြိမ်းချမ်းရေး အကျိုးဆောင် အဖွဲ့ဝင် ဦးစန်းအောင်က “ ဦးတူးဂျာ အမှုနဲ့ ပတ်သတ်ပြီး ကျနော်တို့ ကြားပဲကြား ရသေး တယ်။ သေချာ မသိသေးဘူး” ဟု ဧရာဝတီကို ပြောသည်။

ဦးတူးဂျာ ပျောက်ဆုံးနေသည့် အမှုကို မိသားစုဝင်များက ကာမိုင်းမြို့ ရဲစခန်း၌ ပုဒ်မ ပ ၁/၂၀၁၅ ဖြင့် အမှုဖွင့်ထားကြောင်း၊ အကယ်၍ ဦးတူးဂျာ သေဆုံးသွားပြီဆိုပါကလည်း ရုပ်အလောင်းကို ပြန်လိုချင်ကြောင်း တိုင်ကြားခဲ့ရာ ကာမိုင်းမြို့ ရဲစခန်း က လိုက်လံ စစ်ဆေးမှုများ ပြုလုပ်နေကြောင်း သိရသည်။

ဦးတူးဂျာ၏ ဆွေမျိုးဖြစ်သူ ဒေါ်မွေဖုထုက ဦးတူးဂျာ၏ ရုပ်အလောင်းကို ဘာသာရေးအရ ဝတ်ပြုဆုတောင်းပြီး မြေမြှပ် နှံနိုင်ရန်အတွက် ပြန်ပေးစေလိုကြောင်း၊ ဖြစ်ရပ်မှန်ကို ဖုံးကွယ်ပြီး ပြန်လွှတ်လိုက်သည်ဟု စစ်တပ်က ပြောဆိုနေခြင်းသည့် လူ့အခွင့်အရေး ဆုံးရှုံးရသည်ဟု ခံစားနေရကြောင်း ပြောသည်။

ကချင်ပြည်နယ်အတွင်း လူ့အခွင့်အရေး ချိုးဖောက်မှု ခံရသည့် နိုင်ငံတကာ ရာဇာဝတ်မှု အဆင့်သို့ ရောက်နေကြောင်း၊ အဓိကမှာ စစ်ရာဇာဝတ်မှု ကျုးလွန်မှုများနေပြီး ထိုကဲ့သို့ ဆက်လက် ဖြစ်ပွားနေပါက အပစ်အခတ် ရပ်စဲရေးနှင့် ငြိမ်းချမ်း ရေး လုပ်ငန်းစဉ်များကို တားဆီးမှု ရှိနိုင်သည်ဟု ရှေ့နေ ဦးမာခါးက ပြောသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။