Thursday, July 23, 2015

အပစ်ရပ်ဆွေးနွေးပွဲ ပထမနေ့ ၃ ပုံ၂ ပုံသဘောတူ

(DVB)

တနိုင်ငံလုံး ပစ်ခတ် တိုက်ခိုက်မှု ရပ်စဲရေး သဘောတူစာချုပ် (မူကြမ်း) ပြင်ဆင်ဖြည့်စွက် ချက် ၁၃ ချက် အနက် ၆ ချက်ကို ဇူလိုင် ၂၂ ရက်နေ့က စတင်ဆွေးနွေး တဲ့အခါ ၄ ချက်ကို ညှိနှိုင်းပြီးပြတ် သဘောတူကြ တယ်လို့ နှစ် ဘက်ပြောခွင့်ရသူတွေ ပူးတွဲသတင်းစာ ရှင်းလင်းပါတယ်။

ဝန်ကြီး ဦးအောင်မင်း ဦးဆောင်တဲ့ ပြည်ထောင် စုငြိမ်း ချမ်းရေး ဖော်ဆောင်ရေး လုပ် ငန်းကော်မတီ (ယူပီဒဗလျူစီ) နဲ့ နော်စီဖိုးရာစိန် ဦးဆောင်တဲ့ တိုင်းရင်းသား လက်နက်ကိုင် အဖွဲ့အစည်းများ၏ တနိုင်ငံလုံး အပစ်အခတ်ရပ်စဲရေးဆိုင်ရာ အဆင့်မြင့် ညှိနှိုင်းရေး ကိုယ်စားလှယ်အဖွဲ့ (အက်စ်ဒီ) တို့ဟာ ကမာရွတ်မြို့နယ်ရှိ မြန်မာနိုင်ငံ ငြိမ်းချမ်းရေးစင်တာမှာ ဆွေးနွေးကြတာဖြစ်ပါတယ်။


သဘောတူတဲ့ ၄ ချက်ထဲမှာ ပထမတချက်က နိဒါန်းပိုင်းကို စာချောခြင်း၊ ဒုတိယအချက်က အခြေခံမူမှာ စာချောခြင်းဖြစ်တယ်လို့ အဆင့်မြင့်ညှိနှိုင်းရေးကိုယ်စားလှယ်အဖွဲ့ (အက်စ်ဒီ) ပြောခွင့်ရသူ ပူးဇင်ကျုံးက ရှင်းပါတယ်။

“တတိယကတော့ တပြည်လုံးပစ်ခတ်တိုက်ခိုက်မှု ရပ်စဲရေးစာချုပ် ချုပ်ပြီးလို့ရှိရင် ပါတီအသီးသီးက ခေါင်းဆောင်တွေ၊ အစိုးရနဲ့ တပ်မတော်က တာဝန်ရှိပုဂ္ဂုိလ်တွေ၊ တိုင်းရင်းသားလက်နက်ကိုင် တာဝန်ရှိပုဂ္ဂိုလ်တွေ တွေ့ဖို့ကိစ္စဖြစ်ပါတယ်။ ဒါကို ရက်အတိအကျကန့်သတ်မှုနဲ့ လုပ်လို့ရှိရင် ဖြစ်တယ်လို့ စဉ်းစားတဲ့အလျောက် ရွေးချယ်စရာထားတဲ့ တခုပေါ့လေ၊ ဒါ နှစ်ဘက်ညှိနှိုင်း သဘောတူညီပြီးတော့မှ တွေ့ကြမယ်ဆိုတဲ့ကိစ္စကို ကျနော်တို့ ပယ်ဖျက်ပါတယ်။ ဒါကိုလည်း နဂိုကတည်းက ကျနော်တို့ရဲ့ အန်စီစီတီက တင်ထားတဲ့ကိစ္စမို့လို့ သိပ်ပြီးပြဿ     နာမရှိလောက်ဘူးလို့ ယူဆဲ့အတွက်ကြောင့်မို့လို့ ဒါကိုဆွေးနွေးလို့ရခဲ့တဲ့အချက်မှာပါပါတယ်။”

“နောက်တခုကတော့ ဆုံးဖြတ်ချက်နဲ့လုပ်တာ ဖြစ်ပါတယ်။ ‘ဥပဒေနဲ့အညီ’ ဆိုတဲ့ကိစ္စရပ်နဲ့ ပတ်သက်ပြီးတော့မှ NCA (Text) အတိုင်း ထားပါတယ်။ ဒါတွေကို ဆုံးဖြတ်ချက်အနေနဲ့ လုပ်တာပါ ဒီ ၄ ခုကတော့ ကျနော်တို့ လုပ်လို့ရပါပြီ။”

မပြီးပြတ်တဲ့ နှစ်ခုနဲ့ပတ်သက်လို့ ပူးဇင်ကျုံးက “ကျန်နှစ်ခုအနက် တခုကတော့ အိုင်အန်ဂျီအို၊ အန်ဂျီအိုနဲ့ ပတ်သက်တဲ့ကိစ္စဖြစ်ပါတယ်။ မပြီးသေးပါဘူး။ နောက်တခုကတော့ စီဘီအို၊ စီအက်စ်အိုရဲ့ အခန်းကဏ္ဍဖြစ်ပါတယ်။ ဒါလည်းဆွေးနွေးလို့ မပြီးသေးပါဘူး။” လို့ ပြောပါတယ်။

မြန်မာငြိမ်းချမ်းရေးစင်တာက ဦးလှမောင်ရွှေက ဇူလိုင် ၂၃ ဆွေးနွေးပွဲမှာ လက်ကျန်ဆွေးဖို့ ၂ ချက်အပြင် ဆွေးနွေးမယ့် အစီအစဉ်ကို ခုလို ပြောပါတယ်။

“မနက်ဖြန်မှာ တိုင်းရင်းသားလက်နက်ကိုင်တွေဘက်က အဆိုပြုထားတဲ့ တိုင်းရင်းသား လက်နက်ကိုင်တွေ လက်မှတ်ထိုးတာနဲ့ အစိုးရဘက်က ဘယ်ခေါင်းဆောင်တွေ ထိုးမလဲဆိုတဲ့ အချက်ကိုဆွေးနွေးဖို့ရှိတယ်။ တတိယကတော့ တိုင်းရင်းသားတွေဘက်က အဆိုပြုထားတဲ့ နိုင်ငံတကာ သက်သေလက်မှတ်ရေးထိုးဖို့ကိုလည်း ညှိနှိုင်းဖို့ရှိပြီးတော့ နောက်ဆုံးကျမှပဲ all inclusive (ပါဝင်သင့်ပါဝင်ထိုက်သူများပါဝင်ရေး) ဆိုတဲ့ ပါဝင်လက်မှတ်ရေးထိုးမယ့်အဖွဲ့တွေ။ အစိုးရအဆိုပြုတာနဲ့ တိုင်းရင်းသားတွေက အားလုံးပါဝင်ရေးဆိုတဲ့ အချက်ကတော့ နောက်ဆုံး နံပါတ် ၄ မှာရှိတဲ့အတွက် နက်ဖြန်ညနေမှာ အဲဒါကို ရောက်သွားနိုင်ပါတယ်။” လို့ ပြောပါတယ်။

အစိုးရနဲ့ တိုင်းရင်းသားလက်နက်ကိုင်အဖွဲ့အစည်းတွေက ကိုယ်စားလှယ်တွေဟာ  လအတန်အကြာ ဆွေးနွေးညှိနှိုင်းခဲ့ကြပြီးနောက် ဒီနှစ် မတ်လကုန်ပိုင်းက တနိုင်ငံလုံး ပစ်ခတ်တိုက်ခိုက်မှုရပ်စဲရေး သဘောညီချက် (မူကြမ်း) ရရှိခဲ့ပါတယ်။ ဒီမူကြမ်းကို တိုင်းရင်းသားခေါင်းဆောင်တွေက ပြန်လည်သုံးသပ်ပြီး ပြင်ဆင်ဖြည့်စွက်ချက်တွေ ချမှတ်ခဲ့ရာမှာ အဲဒီအချက်တွေကို အစိုးရကိုယ်စားလှယ်တွေနဲ့ အချောသတ်သဘောတူညီချက်ရအောင် ဆွေးနွေးကြတာဖြစ်ပါတယ်။

ဒီတကြိမ်ဆွေးနွေးပွဲကို ယခင်အစည်းအဝေးတွေမှာ တက်ရောက်လေ့ရှိတဲ့ ကုလသမဂ္ဂနဲ့ တရုတ်ကိုယ်စားလှယ်တွေ မတက်ရောက်ကြပါဘူး။

လက်ရှိ ဦးသိန်းစိန် အစိုးရလက်ထက်မှာ တိုင်းရင်းသား လက်နက်ကိုင် အဖွဲ့အစည်း အကုန်နီးပါးနဲ့ အပစ်အခတ်ရပ်စဲရေး သဘောတူညီချက် ယူနိုင်ပေမယ့် ရှမ်း၊ ကချင်နဲ့ ကရင်ပြည်နယ်တွေမှာ တိုက်ပွဲတွေ ဆက်တိုက်ဖြစ်နေပါတယ်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။