Sunday, February 15, 2015

လောက်ကိုင်ရဲစခန်း ပစ်ခတ်ခံရ၊ ရဲမိသားစုဝင် ၁၃၀ ကျော် လားရှိုးကို ထွက်ပြေး

(DVB)

တိုက်ပွဲတွေ ဖြစ်ပွားနေ တဲ့ လောက်ကိုင်မြို့က ရဲတပ်ဖွဲ့ဝင်မိသားစု ကလေး လူကြီး ၁၃၀ကျော်ဟာ ဖေဖော်ဝါရီ ၁၅ ရက် မွန်းလွဲပိုင်းက လားရှိုးမြို့ ကို ထွက်ပြေးရောက်ရှိလာကြပါတယ်။

ဖေဖော်ဝါရီ ၁၄ ရက်နေ့ ညနေပိုင်းက ထွက်ပြေးလာကြတာဖြစ်ပြီး မြို့မရဲစခန်း ရှေ့တည့်တည့်နေအိမ်တွေကနေ စခန်းကို ချောင်းမြောင်းပစ်ခတ်တဲ့အတွက် လူကြီးတွေကပြောင်းခိုင်းတဲ့အတွက် လားရှိုးကို ထွက်ပြေးလာကြတာလို့ ရဲမိသားစုဝင်အမျိုးသမီးတဦးက ဒီဗွီဘီကို ပြောပါတယ်။

သူတို့ရဲ့ မိသားစုဝင်တွေ လုံခြုံရေးစိုးရိမ်ရလို့ ထွက်ပြေးလာကြတုန်း မြို့မရဲစခန်းမှာ တိုက်ပွဲတွေ ဆက်ဖြစ်ပွားနေတယ်လို့ ရဲမိသားစုဝင်အမျိုးသမီးက ပြောပါတယ်။


“ကျမတို့ အခု ထွက်လာကြရင်း ယောက်ျားတွေနဲ့အဆက်အသွယ်လုပ်ကြည့်တော့ အဲ့ဒီအိမ်ကပစ်နေတော့ သူတို့လည်း ပြန်ပစ်နေတယ်လို့ ပြောတယ်။ မြို့ထဲမှာ သူတို့က ချောင်းပြီးပစ်နေတာ၊ လာရှိုးက လာကူတဲ့ ရဲတပ်ဖွဲ့နဲ့ဆို ရဲအင်အား ၆၀-၇၀ လောက်ရှိမယ်၊ ပြန်ပစ်နေကြတာ။”

လောက်ကိုင် မြို့ထဲမှာ လူသူကင်းမဲ့ ခြောက်ကပ်နေပြီး အိမ်တံခါးတွေပိတ် ပုန်းအောင်းနေသူတချို့ ရှိနေပေမယ့် အများစုကတော့ တရုတ်နဲ့ မြန်မာပြည်ထဲ ထွက်ပြေးနေကြတယ်လို့လည်း ပြောပါတယ်။

သူတို့မိသားစုဝင်တွေ ဆယ်ဘီးကားနဲ့ လားရှိုးမြို့ကို ထွက်ခွာလာတုန်း လမ်းခရီးမှာ ခြေကျင်လျှောက်ပြီး ထွက်ပြေးနေတဲ့ မြန်မာအလုပ်သမားတွေ တွေ့မြင်ခဲ့ရတယ်လို့လည်း ဆိုပါတယ်။

ရဲတပ်ဖွဲ့ဝင်မိသားသားစုတွေကို သက်ဆိုင်ရာက ဆယ်ဘီးကား ငါးစီးနဲ့ သွားရောက်ခေါ်ယူခဲ့တာဖြစ်ပြီး ရဲမိသားစုတွေအပြင် ကြံစိုက်တောင်သူနဲ့ ပန်းရန်အလုပ်သမားတွေပါ ပါဝင်လာကြပြီး စုစုပေါင်း လူ ၅၀၀ ကျော် ရှိပါတယ်။

လတ်တလော သူတို့ကို လားရှိုးမြို့ပေါ်က မန်ဆူဘုန်းကြီးကျောင်းမှာ နေရာချထားပေးပြီး မြေလတ်ဒေသက အလုပ်သမားတွေကတော့ မန္တလေးဆင်းဖို့ ပြင်နေကြပါတယ်။

တိုက်ပွဲဖြစ်ပွားနေတဲ့ လောက်ကိုင်မြို့ပေါ်ရှိ ဆိုင်တွေအဖောက်ခံထားရပြီး ခုချိန်ထိ လားရှိုးမြို့ပေါ်ကို ပြေးဝင်ခိုလှုံနေသူတွေ အမြောက်အမြားရှိနေတုန်းပဲလို့ လားရှိုး ဒီဗွီဘီသတင်းထောက် ကိုခွန်ဇော်ဦးက ပြောပါတယ်။

လောက်ကိုင်ကထွက်ပြေးလာသူအများစုဟာ ကြံစိုက်တောင်သူတွေနဲ့ ပန်းရန်လုပ်တဲ့အလုပ်သမားတွေဖြစ်ပြီး သူတို့ဟာ လားရှိုးမှာ တထောက်နားပြီး မန္တလေးမြို့ကို ကားနဲ့ဆင်းကြတယ်လို့ ဆိုပါတယ်။

လားရှိုးမြို့ကို ရောက်လာတဲ့ ကြံစိုက်တောင်သူတဦးက “ဟိုမှာ ညလည်း တိုက်ပွဲဖြစ်တာပဲ၊ တောက်လျှောက်ပစ်နေတာပဲ၊ လာမယ့်နေ့ကလည်း နေ့ခင်းပစ်နေတယ်၊ မြို့တွင်းမြို့ပြင် တောက်လျှောက်ပစ်နေတယ်၊အဆောက်အဦတွေတော့ အကုန်လုံးဖောက်ထားပြီ၊ ပြေးတဲ့သူတွေပြေးကုန်ုပြီဆိုတော့ လူမရှိတော့ဘူး။ ရှိတဲ့ဥစ္စာလည်း သူတို့ဖောက်ပြီး ယူသွားကြတယ်” လို့ ပြောပါတယ်။

ပိုင်ရှင်တချို့က သူတို့ဆိုင်သူတို့ဖောက်ပြီး ပစ္စည်းသယ်ယူသွားကြတာရှိသလို လမ်းစရိတ်မရှိတဲ့ အလုပ်သမားတချို့က ဆိုင်ဖောက်ပြီး ပစ္စည်းဝင်ယူသွားတာမျိုးလည်း ရှိတယ်လို့ ပြောပါတယ်။

လားရှိုးမြို့ပေါ်မှာတော့ လောက်ကိုင်က ထွက်ပြေးလာတဲ့ ပညာရေးမိသားစု ၃၀၀ ကျော် ဆက်လက်ခိုလှုံနေပြီး သူတို့စားဝတ်နေရေးအတွက် သက်ဆိုင်ရာဌာနက တာဝန်ယူစောင့်ရှောက်နေသလို မြို့ပေါ်ရှိ လူမှုအဖွဲ့အစည်းတွေကလည်း ထောက်ပံ့ကူညီနေကြပါတယ်။

လောက်ကိုင်မှာ ကြံစိုက်၊ ပန်းရန်လုပ်နေသူအများစုဟာ မြေလတ်ဒေသ တောင်တွင်းကြီးဘက်က ဖြစ်ပြီး ပုသိမ်၊ မြန်အောင် စတဲ့ ဧရာဝတီတိုင်းဘက်ကသူတွေလည်း ပါဝင်ပါတယ်။

ဖေဖော်ဝါရီ ၁၃ ရက်ကနေ ၁၅ ရက်အတွင်း လားရှိုးကတဆင့် မန္တလေးမြို့ကိုရောက်လာတဲ့ လောက်ကိုင်စစ်ပြေးဒုက္ခသည်ပေါင်း ထောင်နဲ့ချီ ရှိနေပြီး မန္တလေးအာဏာပိုင်တွေနဲ့ အသင်းအဖွဲ့တွေ အကူအညီနဲ့ ဒေသရင်းကို ဆက်လက်ထွက်ခွာနေကြပါတယ်။

ဖေဖော်ဝါရီ ၁၄ ရက်နေ့က လောက်ကိုင်မြို့အတွင်း တပ်မတော်က နယ်မြေရှင်းလင်ရေးလုပ်ဆောင်ရင်း တိုက်ပွဲဖြစ်ပွားခဲ့တဲ့အတွက် ကိုးကန့်တပ်ဖွဲ့ဝင် ၁၃ ဦး သေဆုံးခဲ့ပြီး ၈ ဦး ဒဏ်ရာအပြင်းအထန်ရရှိခဲ့တယ်လို့ အစိုးရသတင်းတရပ်မှာ ဖော်ပြပါတယ်။

တပ်မတော်က  လောက်ကိုင်မြို့ထဲလိုက်ရှင်းရာမှာ ဖေဖော်ဝါရီ ၁၄ ရက် မနက်ပိုင်းကနေ ည ၇ နာရီအထိ တိုက်ပွဲဖြစ်ပွားခဲ့တာလို့ ဆိုပါတယ်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။