Sunday, February 15, 2015

လောက်ကိုင်မြို့မှ ထွက်ပြေးတိမ်းရှောင်လာသည့် ဒုက္ခသည်များကို မန္တလေးတိုင်းအစိုးရက နေရပ်အသီးသီး ပြန်ပို့ပေး

(Mizzima)

ရှမ်းပြည်မြောက်ပိုင်း၊ လောက်ကိုင်ဒေသတွင် ဖုန်ကြားရှင်ဦးဆောင်သည့် ကိုးကန့်လက်နက်ကိုင် တပ်ဖွဲ့အပါအဝင် တပ်ပေါင်းစုအဖွဲ့နှင့် အစိုးရစစ်တပ်တို့အကြား လတ်တလောဖြစ်ပွားနေသည့် တိုက်ပွဲများကြောင့် လောက်ကိုင်မြို့တွင် အလုပ်သွားရောက် လုပ်ကိုင်သူများမှာ ဖေဖော်ဝါရီ ၁၃ ရက် ညနေပိုင်းမှစပြီး လားရှိုးမှတစ်ဆင့် မန္တလေးမြို့သို့ ထွက်ပြေး တိမ်းရှောင်ခဲ့ရာ မန္တလေးတိုင်းအစိုးရ အစီအစဉ်ဖြင့် နေရပ်အသီးသီးသို့ ပြန်ပို့ပေးနေရာ ဖေဖော်ဝါရီ ၁၅ ရက်အထိ လူဦးရေ ၁၇၇၆ ဦး ရှိနေပြီဟု ပို့ဆောင်ရေး နှင့် စီမံကိန်းဦးစီးဌာန၊ တိုင်းဦးစီးမှူး ဦးဇော်ဝင်းနိုင်က မဇ္ဈိမကို ပြောသည်။


ပျော်ဘွယ်မြို့နယ်၊ ဖိုကုန်းကျေးရွာမှ ကိုဖိုးကျော်က “မန္တလေး ကားကွင်းကို မနက်ကရောက်တယ်။ အဲဒီမှာ နေလို့မဖြစ်တော့လို့ ပြေးလာရတာပါ။ ခုလို မန္တလေး ရောက်ဖို့ အတွက် လားရှိုး ရှမ်းကျောင်းဆရာတော်က ကူညီပေးလိုက်တယ်။ ကျွန်တော်တို့ တရွာထဲက ၂၃-ယောက်ပါတယ်။ကိုယ့်ဒေသမှာ လုပ်ငန်းက အဆင်မပြေလို့ လောက်ကိုင်မြို့နယ်က မိန်းရွာမှာ ကြံသွားခုတ်တယ်။ ဒါပေမယ့် လုပ်ငန်းမ၀င်လိုက်ရဘဲ စစ်ဖြစ်လို့ ပြန်လာရတယ်” ဟု ပြောသည်။

နေရပ်ပြန်ပြည်သူများအား မန္တလေးတိုင်း လမ်းပန်းဆက်သွယ်ရေးဝန်ကြီးဌာန ၀န်ကြီး ဦးကျော်ဆန်း၊ ပို့ဆောင်ရေးစီမံကိန်း
ရေးမှူး၊ ယာဉ်လုပ်ငန်းများ ကြီးကြပ်မှုကော်မတီ၊ ကျန်းမာရေးဌာနနှင့် လူမှုကူညီရေးအသင်းများက လိုအပ်သည်များ ကူညီလုပ်ဆောင်ပေးလျက်ရှိသည်။


“ရောက်လာတဲ့ နေ့က ညကြီးဆိုတော့ သူတို့စားဖို့ လွယ်ကူတဲ့ ခေါက်ဆွဲခြောက်ထုပ်နဲ့ ရေသန့်ဘူးတွေ ၀ယ်ပေးခဲ့တယ်။ ချက်ခြင်း ပို့/ဆက် (ပို့ဆောင်ရေးနှင့် လမ်းပန်းဆက်သွယ်ရေး)ရယ်၊ ထွေအုပ်ရယ် ပေါင်းပြီး ကားတွေစီစဉ်ပေးရတယ်။ လားရှိုးကနေ ၁၂-ဘီး ကားတွေ၊ ဒိုင်နာတွေနဲ့ ရောက်လာကြတာ။ အဲဒီမှာ အလုပ်သွားလုပ်တဲ့သူတွေပဲ။”ဟု လမ်းပန်းဆက်သွယ်ရေး ၀န်ကြီးဦးကျော်ဆန်းက မဇ္ဈိမကို ပြောသည်။

ဒုက္ခသည်များသည် မန္တလေးမြို့၊ ချမ်းမြရွှေပြည် ခရီးသည်တင် ယာဉ်ရပ်နားစခန်းသို့ ရောက်ရှိနေပြီး ၎င်းတို့အား တိုင်းဒေသကြီး အစိုးရအဖွဲနှင့် ဌာနဆိုင်ရာများက ထမင်းကျွေးခြင်း၊ လမ်းခရီးအတွက် ထမင်းဘူးများ၊ ရေသန့်ဘူးများ ထောက်ပံ့ထားသည်ဟု ဆိုသည်။

၎င်းတို့အား နေရပ်ဒေသ အသီးသီးသို့ ပို့ဆောင်ပေးနိုင်ရေးအတွက် ဖေဖော်ဝါရီ ၁၃ ရက်တွင် ယာဉ် ၁၁ စီးဖြင့် ၃၄၇ ဦး၊ ၁၄ ရက်တွင် ယာဉ် ၄၃ စီးဖြင့် လူဦးရေ ၁၁၆၁ ဦး၊ ၁၅ ရက်တွင် ယာဉ် ၁၀ စီးဖြင့် လူဦးရေ ၂၆၈ ဦးတို့အား ပို့ဆောင်ပေးခဲ့ပြီး လူဦးရေ ၁၇၇၆ ဦးကို အခမဲ့ ပြန်လည်ပို့ပေးခဲ့သည်ဟု ဆိုသည်။

တောင်ကြီး၊ မကွေး၊ အောင်လံ၊ ရမည်းသင်း၊ ပျောက်ဘွယ် စသည့်နေရာများသို့ ပြန်သူများအား ၎င်းတို့ မြို့ရွာများ နှင့် အလွယ်တကူ ချိတ်ဆက်သွားနိုင်မည့် အမြန်လမ်း ၂၅၃ မိုင်အထိ လိုက်ပို့ပေးမည်ဟု ချမ်းမြသုခ လူမှုကူညီရေးအသင်း တာဝန်ခံ ကိုသန်းထွန်းက ပြောသည်။ ယင်းအပြင် နေရပ်ပြန်သူ အများစုမှာ ခရီးစရိတ်ပင် မရှိဘဲ ကိုယ်လွတ်ထွက်လာရသူ များ၍ ဝိုင်းဝန်းအကူအညီပေးနေခြင်း ဖြစ်သည်ဟု ဆိုသည်။

“ပို့ချင်တာက အိမ်တိုင်ရာရောက်ပဲ၊ ဒါပေမယ့် နောက်ထပ်လာမယ့် သူတွေကိုလည်း ခုလိုပို့ချင်လို့ အလျင်မီအောင် လုပ်ရတာပါ။ အိမ်တိုင်ရာရောက် ပို့နိုင်အောင် ကြိုးစားသွားမယ်။”ဟု ကိုသန်းထွန်းက ဆိုသည်။

တောင်ငူ၊ စစ်တွေ၊ ကလေး၊ မိတ္ထီလာ၊ မြန်အောင်၊ ပုသိမ်၊ မြ၀တီတို့ဘက်သို့ ပြန်ရမည့် ဒုက္ခသည်များကိုလည်း တိုင်းအစိုးရ၊ စေတနာရှင် ပြည်သူများ နှင့် လူမှုအဖွဲ့အစည်းများက လှူဒါန်းထောက်ပံ့ပေးကာ ပို့ဆောင်ဆက်သွယ်ရေးဌာနမှ ယာဉ်များအပြင် လူမှုကူညီရေးအသင်း ယာဉ်များဖြင့် နေရပ် လိုက်လံပို့ပေးနေသည်ဟု ဆိုသည်။

ယခုလ ၉ ရက်ကစပြီး ဖုန်ကြားရှင်ဦးဆောင်သည့် ဒီမိုကရက်တစ် မဟာမိတ်တပ်မတော် (MNDAA)၊ တအာင်းတပ်မတော် (TNLA)၊ ရခိုင်တပ်မတော် (AA)နှင့် ကချင်လွတ်လပ်ရေး တပ်မတော်(KIA)၊ ရှမ်းပြည် တိုးတက်ရေး ပါတီ/ရှမ်းပြည် တပ်မတော် (SSPP/SSA) စသည့် တပ်ပေါင်းစုအဖွဲ့များနှင့် အစိုးရတပ် တို့အကြား တိုက်ပွဲများ ပြင်းပြင်းထန်ထန် ဖြစ်ပွားနေခြင်း ဖြစ်သည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။