Saturday, January 24, 2015

အစိုးရစစ်တပ်များ ခေတ္တ ထိုးစစ်ရပ်ထားပြီး အင်အားဖြည့်နေ

(ကချင်သတင်းဌာန)

ကချင်ပြည် နယ် ဖားကန့်မြို့ နယ် ကချင် လွတ်မြောက်ရေးတပ်ဖွဲ့ (KIA)၏ တပ်မ ဟာ ၂ လက်အောက်ခံ တပ်ရင်း ၆ နယ်မြေအတွင်း အစိုးရ စစ်တပ် သို့ ထိုးစစ်ဆင်ခြင်း မရှိသဖြင့် တိုက်ပွဲ ဖြစ်ပွားခြင်း မရှိဘဲ တည်ငြိမ်နေ သည် ဟု KIA တပ်ရင်း ၆ တပ်ရင်းမှူး ဗိုလ်မှူး တန်ဆန့်က ပြောသည်။

ဇန်နဝါရီလ ၂၂ ရက် ဖားကန့်မြို့နယ် KIA တပ်ရင်း ၆ နယ်မြေအတွင်း တိုက်ပွဲ နှစ်နေရာ ဖြစ်ပွားခဲ့ပြီး ယနေ့ ဇန်နဝါရီလ ၂၃ ရက်တွင်မူ အစိုးရ စစ်တပ်ဘက်မှ ထိုးစစ်ဆင် တိုက်ခိုက်မှု မရှိသေးပဲ အင်အားဖြည့်တင်းမှုများသာရှိနေသည်ဟု သူက ပြောသည်။


“ဒီနေ့က ငြိမ်နေတဲ့ သဘောရှိတယ်။ ခုညနေထိ ဘာမှ မကြားသေးဘူး။ အစိုးရ စစ်တပ်က ထိုးစစ်ဆင်တာ မရှိလို့ မဖြစ်တာ။ မနေ့ကလည်း အစိုးရ စစ်တပ်ကတော့ ဟိုပင်နဲ့ ဖားကန့်လမ်းဘက်ကနေလည်း တက်လာတယ်။ တပ်ရင်း ၂ ရင်းလောက် ထပ်ဖြည့်ထားတယ်။ အခုဆို တပ်ရင်း ၁၂ ရင်းရှိသွားပြီ” ဟု သူက ပြောသည်။

လက်ရှိ တိုက်ပွဲ ဖြစ်ပွားခြင်း မရှိသော်လည်း အစိုးရ စစ်တပ်က ဇန်နဝါရီလ ၂၂ ရက်က စစ်အင်အား တပ်ရင်း ၂ ရင်း ထပ်မံ ဖြည့်တင်းထားမှုများ ရှိနေသည်ဟု သူက ပြောသည်။

ဇန်နဝါရီလ ၁၅ ရက်မှ ၂၂ ရက်ထိ တိုက်ပွဲ ပြင်းပြင်းထန်ထန်ဖြစ်ပွားခဲ့ပြီး လက်ရှိ KIA ၏ တပ်ရင်း ၆ အခြေစိုက်ရာ သန်းဂေါင် (အောင်ဘာလေ) ကျေးရွာတွင် အစိုးရ တပ်ရင်း ၄ ရင်း အခြေစိုက်ထားဆဲ ဖြစ်သည်ဟု သိရသည်။

ဇန်နဝါရီလ ၁၄ ရက် အစိုးရ၏ လုံခြုံရေး ရဲတပ်ဖွဲ့ သုံးဦးကို KIA က ဖမ်းဆီးခဲ့ရာမှ အစိုးရ စစ်တပ်က ထိုးစစ်ဆင် တိုက်ခိုက်ခဲ့သည်။ ယင်း ရဲတပ်ဖွဲ့ သုံးဦးကို ကချင်ငြိမ်းချမ်းရေးအကျိုးဆောင်အဖွဲ့ (PCG) မှတဆင့် ဇန်နဝါရီလ ၁၉ ရက်က အစိုးရထံ ပြန်လည် လွှဲပြောင်းပေးလိုက်ပြီး ဖြစ်သည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။