Thursday, November 20, 2014

လိုင်ဇာသို့ လက်နက်ကြီးကျ၍ KIA စစ်သင်တန်းသား ၂၀ ကျော် သေဆုံး

(ဧရာဝတီ)

ကချင် လွတ်မြောက်ရေး တပ်မတော် (KIA) စစ်ဌာနချုပ်ရှိရာ လိုင်ဇာမြို့ အနီးသို့ လက်နက်ကြီး နှစ်လုံး ကျရောက်ခဲ့သဖြင့်  KIA မှ စစ်သင်တန်းသား အယောက် ၂၀ ကျော် သေဆုံးကာ ၁၆ ဦး ဒဏ်ရာရရှိခဲ့သည်ဟု ငြိမ်းချမ်းရေး ဖော်ဆောင်ရေး ကော်မတီမှ အကြီးတန်းအရာရှိ ဦးလမိုင်ဂွန်ဂျာက ဧရာဝတီသို့ ပြောသည်။

 
နိုဝင်ဘာလ ၁၉ ရက် နေ့လည် ၁၂ နာရီ ၂၀ ခန့်က အစိုးရဘက်မှ ပစ်ခတ်ခြင်း ဖြစ်သည်ဟု သိရသည်။
ဦးလမိုင်ဂွန်ဂျာက “ခါရာတောင်ကုန်းက ပစ်လိုက်တာ၊ စစ်တပ်ဘက်က ပစ်တာ ဟုတ်တယ်။ A 105 လက်နက်ကြီး နှစ်လုံးပစ်တာ၊ သင်တန်းသားတွေ စုဝေးစစ်ရေးပြနေတုန်း ဖြစ်တာ” ဟု ပြောသည်။
ပစ်ခတ်မှု ဖြစ်ပွားခဲ့ခြင်းနှင့် ပတ်သတ်၍ KIA အကြီးအကဲများက တပ်မတော်၏ မြေပြင်အကြီးအကဲများနှင့် အစိုးရ၏ ပြည်ထောင်စု ငြိမ်းချမ်းရေးဖော်ဆောင်ရေး ကော်မတီမှ ဒုဥက္ကဌ ဦးအောင်မင်းတို့အား စာပို့ကာ မေးမြန်းထားသည်ဟု ဆိုသည်။

တပ်မတော်၏ မြောက်ပိုင်းတိုင်း စစ်ဌာနချုပ်မှ မြေပြင်တာဝန်ရှိသူ တဦးက “ကျနော်တို့ဘက်က ရည်ရွယ်ချက်နဲ့ လုပ်တာ မရှိဘူး၊ ဘာ့ကြောင့် ဖြစ်တယ်ဆိုတာ မြေပြင်ကို စိစစ်နေတယ်၊ အခုချိန်ဘာမှ တိကျစွာ မပြောနိုင်သေးဘူး” ဟု ဧရာဝတီကို ပြောသည် ။

မြန်မာ ငြိမ်ချမ်းရေး စင်တာမှ တာဝန်ရှိသူတဦး ဖြစ်သည့် ဦးလှမောင်ရွှေက “အခြေအနေကတော့ သေချာတော့ မသိသေးဘူး။ ပြီးခဲ့တဲ့ ရက်ပိုင်းကလည်း ထိတွေ့မှုတွေ ဖြစ်ခဲ့တယ်။ အခုချိန်မှာ ဘာကြောင့်ဖြစ်လဲ ဆိုတာကို ကျနော်တို့ မေးမြန်းထားပါတယ်။ ကျနော်တို့က တတိယပေါ့၊ နှစ်ဘက်က ပဋိပက္ခတွေ နည်းပြီး ငြိမ်းချမ်းရေးကို ဆက်လုပ်နိုင်အောင် လုပ်မှာပါ။ ဒါကြောင့် ငြိမ်းချမ်းရေး လုပ်ဆောင်မှုကို မရပ်ပါဘူး” ဟု ဆိုသည်။

ယင်းသို့ ပစ်ခတ်မှု ဖြစ်ပြီးနောက် KIA ထိပ်တန်းအရာရှိများ အရေးပေါ်အစည်းအဝေး ထိုင်နေကြကြောင်း သိရသည်။

နိုဝင်ဘာလ ၁၆ ရက်နှင့် ၁၇ ရက်တို့တွင် ကချင်ပြည်နယ်၊ မန်စီမြို့နယ်တွင်လည်း အစိုးရတပ်နှင့် KIA အကြား
တိုက်ပွဲများ ဖြစ်ပွားခဲ့သေးသည်။


KIA မှာ အစိုးရ၏ ငြိမ်းချမ်းရေးဖော်ဆောင်ရေး လုပ်ငန်းစဉ်တွင် ပါဝင်ညှိနှိုင်းနေသည့် တိုင်းရင်းသား လက်နက်ကိုင် အဖွဲ့အစည်းတခု ဖြစ်သည်။ ငြိမ်းချမ်းရေး လုပ်ဆောင်နေစဉ်အတွင်း အစိုးရနှင့် KIA အကြား နှစ်ဖက် အပြန်အလှန် လိုက်နာရန် ၂၀၁၃ ခုနှစ်၊ အောက်တိုဘာလ ၁၀ ရက်တွင် စည်းမျဉ်းစည်းကမ်းများ ချမှတ်ကာ စာချုပ်တခုဖြင့် လတ်မှတ် ရေးထိုးထားခဲ့သော်လည်း စာချုပ်မှာ အောင်မြင်မှု မရှိခဲ့ပေ။

(ဧရာဝတီ အကြီးတန်း သတင်းထောက် မေခ ပူးပေါင်းရေးသားသည်)

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။