Friday, November 21, 2014

ငြိမ်းချမ်းရေးသစ်ပင်ကို သွေးဖြင့်လောင်း စိုက်ပျိုးယူလို့ မရစကောင်းပါ

(Mizzima)

နိုဝင်ဘာ ၁၉ ရက်၊ ဗုဒ္ဓဟူးနေ့က ကေအိုင်အို ဗဟိုစခန်းအနီးရှိ ဗိုလ်သင်တန်းကျောင်းကို အစိုးရစစ်တပ်က လက်နက်ကြီးဖြင့် ပစ်ခတ်သည့် သတင်းထွက်ခဲ့ပါသည်။ ကချင်သင်တန်းသား ၂၃ ဦး သေဆုံးကာ ၂၀ ဦးမှာ ဒဏ်ရာများ ရရှိသွားခဲ့သည်။ သည်အဖြစ်အပျက်မှာ ဦးသိန်းစိန်အစိုးရ တက်လာစဉ်ကာလ အတွင်း ပြည်တွင်းငြိမ်းချမ်းရေး ကြိုးပမ်းဆောင်ရွက်မှုကာလ၊ တစ်နိုင်ငံလုံး အပစ်အခတ်ရပ်စဲရေး သဘော တူညီချက်ရရှိရန် ကြိုးပမ်းနေစဉ် ကာလအတွင်း လူအသေအပျောက်အများဆုံး အဖြစ်အပျက်ဖြစ်သည်ဟ၍ူ ပင်ပြောဆိုလို့ ရနိုင်ပါသည်။ အထိအခိုက် အကျအနာကြီးသဖြင့်လည်း နှစ်ဖက်တပ်များ သေနတ်ပြန်ဖောက်ကာ မိမိတို့ပြည်သူများမှာ ပြည်တွင်းငြိမ်းချမ်းရေး လုပ်ငန်းစဉ် ပျက်ပြားသွားတော့မည်လားဟူသည့် စိုးရိမ်စိတ်များလည်း မြင့်တက်လာကြရပါသည်။

 
စစ်ပွဲများသည် နိုင်ငံရေး၏ အကျိုးဆက်ဖြစ်သည်ဆိုသည်ကိုတော့ မည်သူမျှမငြင်းနိုင်ပါ။ စစ်ပွဲများ ပပျောက်သွားစေဖို့ဆိုလျှင် စစ်ပွဲများ၏ အကြောင်းရင်းခံဖြစ်သည့် နိုင်ငံရေးပြဿနာကို ပြေလည်အောင် ဆောင်ရွက်ကြရမည့်လမ်းမှ တစ်ပါး အခြားမရှိပါ။ ထို့ကြောင့် မိမိတို့အဖို့ ရှင်းရှင်းလင်းလင်း သိရှိထားသင့်သည့်အချက်မှာ စစ်ပွဲများကို စစ်ပွဲများဖြင့် ဖြေရှင်းခြင်းသည် ဖြေရှင်းနည်းအမှားသာ ဖြစ်သည်ဆိုသည့် အချက်ပင် ဖြစ်သည်။ စစ်ပွဲများကို စစ်ပွဲဖြင့် ဖြေရှင်းဖို့ ဆုံးဖြတ်ခြင်း၊ ပြဿနာများကို အင်အားဖြင့်ဖြေရှင်းခြင်းနှင့် အင်အားအခြေခံသည့် ငြိမ်းချမ်းရေး ဆွေးနွေးပွဲများဆိုသည်မှာ ယုတ္တိဗေဒအရပင်လျှင် သဘာဝမကျသည့် အယူအဆများပင် ဖြစ်သည်။ စစ်ပွဲများကို စစ်ပွဲများဖြင့် စစ်ပွဲများ နဂုံးမချုပ်နိုင်ပါ။ သည်နည်းနာမှာ မုန်းစကို ရှည်စေပြီး မီးစကို ပိုမိုလောင်မြိုက်ရန် ဓာတ်ဆီလောင်းသလို ဖြစ်သည်ဆိုသည်ကို မိမိတို့တိုင်းပြည် ပြည်တွင်းစစ် နှစ် ၆၀ ကျော် သက်တမ်းကြီးက အထင်ရှားဆုံး သက်သေကြီးပင် မဟုတ်ပါလော။ စစ်ပွဲများကို စစ်ပွဲများဖြင့်သာ နိဂုံးချုပ်စေမည်ဆိုသည့်အယူအဆမှာ မျက်မှောက် ယဉ်ကျေးသောကမ္ဘာကြီးတွင် အလွန်မတန် သေးသိမ်ကျဉ်းမြောင်း လှသည့် စစ်ဝါဒသက်သက်သာ ဖြစ်ပါသည်။ အင်အား အခြေခံဖြင့် ပြဿနာများကို ဖြေရှင်းဖို့ကြိုးစားခြင်းသည် စည်းလုံးညီညွတ်ငြိမ်းချမ်းသော လူ့အဖွဲ့အစည်းတစ်ခုထူထောင်ရာတွင် အကြီးမားဆုံး အဟန့်အတားကြီး တစ်ခုလည်း ဖြစ်ပါသည်။

ယခုလို ကချင်ဗိုလ်သင်တန်းကျောင်းကို လက်နက်ကြီးဖြင့် ပစ်ခတ်လိုက်သည့် ကိစ္စမှာ လက်ရှိကြိုးပမ်းဆောင်ရွက်နေကြရသည့် ငြိမ်းချမ်းရေး၊ တစ်နိုင်ငံလုံး အပစ်အခတ်ရပ်စဲရေး လုပ်ငန်းစဉ်ကြီးကို ပျက်စီးစေလိုသည့်သဘောပင် သက်ရောက်နိုင်ပါသည်။ တစ်ဖက်နှင့်တစ်ဖက် အပြန်အလှန်အသိအမှတ်ပြုရေး၊ အပြန်အလှန်လေးစားရေး အပြန်အလှန်သည်းခံစိတ်ရှည်ရေးဆိုသည့် ဆွေးနွေးဖက်များအကြား မလွဲမသွေတည်ဆောက်ရမည့် ယုံကြည်မှုတည်ဆောက်ခြင်း အခြေခံသဘောထားကို ချိုးဖျက်လိုက်ရာလည်း ကျနိုင်ပါသည်။

မည်သည့်အကြောင်းပြချက်ပင်ဖြစ်ပါစေ ဤဖြစ်ရပ်မှာ ပြည်တွင်း ငြိမ်းချမ်းရေးကို ခြိမ်းခြောက်သည့်ဖြစ်ရပ်အဖြစ် ယူဆနိုင်ပါသည်။ မိမိတို့
သည်လည်း အကြမ်းဖက်မှုကို အကြမ်းဖက်မှုဖြင့် တုံ့ပြန်ဖြေရှင်းခြင်းဖြင့် မိမိတို့နိုင်ငံနေရာအနှံ့ သေနတ်သံများ ပြန်လည်ခေါင်းထောင် ကာ ပြည်သူအများ ကျီးလန့်စာစားဘဝ ပြန်ရောက်ရမည်ကို စိတ်ပူပန်မိပါသည်။


မိမိတို့အားလုံး သံသယရှင်းစွာ ယုံကြည်ထားကြရမည့်အချက်မှာ ငြိမ်းချမ်းရေးသစ်ပင်ကို သွေးဖြင့်လောင်း၍ စိုက်ပျိုးယူလို့ ဘယ်နည်းနှင့်မျှ မရနိုင်ပါဆိုသည့်အချက်ကို ဖြစ်ပါသည်။ ယင်းအချက်ကို စွဲမြဲစွာ လက်ကိုင်ထားကြဖို့နှင့် နိုင်ငံရေးပြဿနာကို စစ်ရေးဖြင့် ဆက်လက်မဖြေရှင်း မိကြဖို့ တိုင်းပြည်မျက်နှာ ရှေ့ထားကာ အလေးအနက်ထား မေတ္တာရပ်ခံလိုက်ပါသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။