Thursday, November 20, 2014

Asuya hte gasat ai majan e KIA Du langai hkrat

(KNG)

Jinghpaw Mungdaw Manje ginwang daw Wunpawng Mungdan Shanglawt Hpyen Dap (KIA) a Dap Ba (3) npu Dap Dung (27) ginra kata asuya hpyen dap hte majan byin mat ai hta KIA maga kawn Du Hpauje La Doi hkrat sum mat ai nga KIA Dung (12) hte (27) kawn lit nga ai ni tsun ai.

Asuya a Dap Dung Hk.M.Y (317) hpyen n-gun 100 hkawt gaw KIA Ba (3) npu Dung (27) ginra de shang bang wa ai majaw Nam Sa hte Hka Pra lapran Dang Sa Pa hta November 17 ya shani shana daw hkying 1:00 kawn shana de hkying 5:00 du hkra hkying hkum 5 jan gap hkat ai majan kata hkat sum mat ai lam rai nga ai.

“Daini gaw bawm kapaw ai nsen sha na ai. Mani chyawm Dung (27) ginra Nam Jan hte Hka Pra lapran Dan Sa Pa kaw hkying 1 kawn shana daw hkying 5 du hkra majan byin ai hkying hkum 5 jan pyi na mat ai. Asuya dap gaw Maji Bum dap shara maga de lung wa ai, anhte dap hpung hte lam kaw tut rai ang katut majan byin ai re. Anhte maga gaw langai hkrat mat ai” nga KIA Dap Dung (12) Dap Up Labang Jawn Awng kawn tsun ai.

Dai majan masing hta KIA Dap Dung (12), Dap Dung (27) dap hpung ni jawm gasat mat wa ai hta Dung (12) kawn Du. Hpauje La Doi hkrat sum mat nna asuya maga mung si hkala ai ni lawm ai lam matut tsun ai.

Lai wa sai shani asuya hpyen dap ni kawn Balawng Dingsa dap shara de lam nmaw hku hku dingyang lung wa na nga KIO ginjaw de tau hkrau shiga shana ahkang hpyi da ai raitim asuya hpyen hpung ni mahtang lam dingrun n lai sai sha nam dawk dawk nna ganaw shang wa ai majaw KIA dap ni hte man ap rai majan byin mat ai re nga Dap Dung Up Labang Jawn Awng kawn tsun ai.

Kai Htik, Nam Hkam hte Man Wing maga kawn asuya dap ni zing madu da ai KIA Dap Dung (12) dap dingsa Maji Bum hte Dap Dung (27) Balawng Dingsa dap shara ni de maden shang mat wa nna bai n htang yu ai lam n nga shi ai lam shi kawn tsun ai.

“Anhte gaw ginjaw matsun hte maren anhte lam hku hku yen ya mu nga nna makau de yen da ya ai” nga shi kawn tsun ai.

Ya yang KIA Dap Dung (12) hte (27) ginra makau mayan asuya dap Dap Nu Masat (88) npu dap dung ni hte hpawn yawm dik dap dung 10 hkawt shara jahkrat nga dingyang re lam shi kawn matut tsun ai.

November 18 ya shani hta gasat gala ai lam n nga tim majan byin mat ai Ja Chyai Hket makau yang e bawm kapaw ai lam byin mat ai nga chye lu ai. November 16 ya shani mung Hka Shang, Ja Chyai Hket makau KIA Dap Dung (27) hte asuya hpyen hpung ni gasat gala lam naw byin mat wa ai.

Lai wa sai April shata laman mung Manje ginwang daw kata KIA Dap Dung 12 hte 27 ginra kata asuya dap hte majan laja lana byin ai majaw hpyen yen tsin-yam masha ni hkying hku Miwa ga jarit Mai Ja Yang, Man Maw hte Man Wing maga hkan hprawng yen hkawm mat sai rai nga ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။