Friday, October 24, 2014

တပ်မတော်က တိုင်းရင်းသားပြည်နယ်များတွင် စစ်ဆင်ရေးများပြုလုပ်နေခြင်းနှင့် စစ်ရေးပြင်ဆင်မှုများလုပ်ဆောင်နေခြင်းကြောင့် ပြည်တွင်းငြိမ်းချမ်းရေးကို အမှန်တကယ်လိုလားမှု ရှိ မရှိ သံသယဖြစ်နေရဟု UNFC ကြေညာချက်ထုတ်ပြန်

(Eleven Media Group)

မြန်မာ့တပ်မတော်မှ ကချင်ပြည်နယ်၊ ရှမ်းပြည်နယ်နှင့် ကရင်ပြည်နယ်များတွင် စစ်ဆင်ရေးများ စဉ်ဆက်မပြတ်ပြုလုပ်နေပြီး တိုက်ပွဲများဖြစ်ပွားနေခြင်းနှင့် အခြားသောတိုင်းရင်းသားပြည်နယ်များတွင်လည်း စစ်ရေးပြင်ဆင်မှုများကို အသာစီးယူလုပ်ဆောင်လျက်ရှိနေသည်ကို တွေ့မြင်နေရကြောင်း၊ ထို့ကြောင့် ပြည်တွင်းငြိမ်းချမ်းရေးကို အမှန်တကယ်လိုလားမှု ရှိ၊ မရှိ သံသယဖြစ်လာနေရပါသည်ဟု တိုင်းရင်းသားလက်နက်ကိုင်အဖွဲ့ ၁၁ ဖွဲ့ပါဝင်ဖွဲ့စည်းထားသော ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC) က အောက်တိုဘာ ၂၂ ရက် ရက်စွဲဖြင့် ကြေညာချက်ထုတ်ပြန်ခဲ့သည်။

 
UNFC ၏ပထမအကြိမ်ညီလာခံမှ ပြန်လည်ဖွဲ့စည်းခဲ့သော ကောင်စီအဖွဲ့ဝင်များ၏ ပထမအကြိမ် မျက်နှာစုံညီအစည်းအဝေးကို အောက်တိုဘာ ၂၀ ရက်မှ ၂၂ ရက်အထိ ထိုင်း-မြန်မာနယ်စပ်တစ်နေရာတွင်ပြုလုပ်ခဲ့ရာ အစည်းအဝေးအပြီးတွင် အချက်ခုနစ်ချက်ပါသော ကြေညာချက်ကို ထုတ်ပြန်ခဲ့သည်။

UNFC ၏ ပထမအကြိမ်ကောင်စီမျက်နှာစုံညီအစည်းအဝေး၌ မြန်မာနိုင်ငံနှင့် ဆက်စပ်သက်ဆိုင်သော နိုင်ငံတကာအခြေအနေ၊ ပြည်တွင်းအခြေအနေ၊ တိုင်းရင်းသားလက်နက်ကိုင်တော်လှန်ရေး အဖွဲ့အစည်းများ၏အခြေအနေနှင့် အစိုးရ၏ ပြည်ထောင်စုငြိမ်းချမ်းရေး ဖော်ဆောင်ရေးလုပ်ငန်းကော်မတီ (UPWC) နှင့် တိုင်းရင်းသားအဖွဲ့အစည်းများ၏ တစ်နိုင်ငံလုံးအပစ်အခတ်ရပ်စဲရေးဆိုင်ရာ ညှိနှိုင်းရေးအဖွဲ့ (NCCT) တို့၏ တစ်နိုင်ငံလုံးအပစ်အခတ်ရပ်စဲရေး သဘောတူစာချုပ်ချုပ်ဆိုနိုင်ရန်အတွက် ညှိနှိုင်းဆွေးနွေးနေသော ဆွေးနွေးပွဲအခြေအနေများကို သုံးသပ်ပြီး အခြေအနေနှင့်ကိုက်ညီသော ရှေ့လုပ်ငန်းစဉ်များကို ညှိနှိုင်းချမှတ်ခဲ့သည်ဟု UNFC ကထုတ်ပြန်ခဲ့သည်။

တိုင်းရင်းသားလူမျိုးပေါင်းစုံဖြင့်စုဖွဲ့ထားသောနိုင်ငံ၌ မဟာလူမျိုးကြီးဝါဒနှင့် အတုအယောင်ပြည်ထောင်စုစနစ်ကို အာဏာရအစိုးရအဆက်ဆက်တို့က အဓမ္မကျင့်သုံး အကောင်အထည်ဖော်နေသဖြင့် နှစ်ပေါင်း ၇၀ နီးပါး ပြည်တွင်းစစ်ဖြစ်ပေါ်နေရကြောင်း၊ ယင်းပြည်တွင်းစစ်ကြောင့် လူမျိုးစုံပြည်သူများ ဆင်းရဲဒုက္ခမျိုးစုံနှင့်ရင်ဆိုင်နေရပြီး ဒီမိုကရေစီနှင့်လူ့အခွင့်အရေးများလည်း ဆုံးရှုံးနေရကြောင်း၊ လက်ရှိအနေအထားတွင် ၂၀၀၈ ဖွဲ့စည်းပုံအခြေခံဥပဒေကို အခြေအနေနှင့်ကိုက်ညီစွာ ပြင်ဆင်ပြောင်းလဲမှုမပြုနိုင်သမျှ အကျပ်အတည်းမှ ရုန်းထွက်နိုင်မည်မဟုတ်ဟု ရှုမြင်သည်ဟု UNFC ၏ကြေညာချက်တွင် ဖော်ပြထားသည်။

ထို့ပြင် အာဏာရအစိုးရအဆက်ဆက်တို့သည် နိုင်ငံရေးပြဿနာကို တွေ့ဆုံဆွေးနွေးခြင်းဖြင့် အဖြေမရှာဘဲ စစ်အင်အားဖြင့်သာ အဓိကထားဖြေရှင်းလာခဲ့သဖြင့် ယနေ့တိုင် ပြေလည်မှုမရရှိသေးကြောင်း၊ လက်ရှိတွင် အစိုးရအနေဖြင့် နိုင်ငံရေးအရတွေ့ဆုံဆွေးနွေးဖြေရှင်းရန် လုပ်ဆောင်နေသည်ဟုပြောနေသော်လည်း လက်တွေ့အကောင်အထည်ဖော်ရာတွင် တန်းတူခြင်း၊ တရားမျှတခြင်းမရှိသည့်အပြင် နောက်ပြန်ဆုတ်သော လုပ်ဆောင်ချက်များကြောင့် ဆွေးနွေးပွဲများ လိပ်ခဲတည်းလည်းဖြစ်နေရသည်ဟုလည်း ကြေညာချက်တွင်ပါဝင်သည်။

UNFC သည် ပြည်တွင်းငြိမ်းချမ်းရေးလုပ်ငန်းစဉ် အောင်မြင်ရေးအတွက် UNFC အဖွဲ့ဝင်မဟုတ်သော တိုင်းရင်းသားလက်နက်ကိုင်တော်လှန်ရေးအဖွဲ့အစည်းများ၊ ဒီမိုကရေစီအင်အားစုများနှင့် အတူတကွ လက်တွဲကြိုးပမ်းသွားနိုင်ရန် တွေ့ဆုံညှိနှိုင်း နည်းလမ်းရှာသွားမည်ဖြစ်သည်ဟု ထုတ်ပြန်ကြေညာခဲ့သည်။

"မိမိတို့နိုင်ငံ၏ အကျိုး၊ တိုင်းရင်းသားပြည်သူအားလုံး၏အကျိုးအတွက် အခြေခံအကျဆုံးဖြစ်သော ရေရှည်တည်တံ့ခိုင်မြဲသည့် တိုင်းရင်းသားစည်းလုံးညီညွတ်ရေးနှင့် ပြည်တွင်းငြိမ်းချမ်းရေးတည်ဆောက်ရေးအတွက် မျိုးချစ်ပြည်ချစ်အင်အားစုများအားလုံး ခိုင်မာစွာလက်တွဲ၍ ၀ိုင်းဝန်းကြိုးပမ်းသွားကြရန် ကမ်းလှမ်းနှိုးဆော်ဖိတ်ခေါ်ပါကြောင်း ထုတ်ပြန်ကြေညာအပ်ပါသည်" ဟုလည်း ထုတ်ပြန်ချက်တွင် ဖော်ပြထားသည်။

UNFC ပထမအကြိမ်ညီလာခံကို သြဂုတ် ၂၅ ရက်မှ စက်တင်ဘာ ၂ ရက်အထိ ထိုင်းနိုင်ငံ၌ပြုလုပ်ခဲ့ရာ UNFC ၏ (၂၀၁၄ -၂၀၁၆) သက်တမ်းကာလအတွက် တာဝန်ထမ်းဆောင်မည့် ဖက်ဒရယ်ကောင်စီဝင် ၄၂ ဦးအနက် ဗဟိုအလုပ်အမှုဆောင်ကော်မတီဝင် ၁၂ ဦးကိုရွေးချယ်ခဲ့ပြီး ယခင်ဥက္ကဋ္ဌဟောင်းဖြစ်သည့် ကချင်လွတ်မြောက်ရေးအဖွဲ့ (KIO) ဒုတိယဥက္ကဋ္ဌ ဗိုလ်ချုပ်ကြီးအင်ဘန်လပင် ဥက္ကဋ္ဌတာဝန်ကို ဆက်လက်ထမ်းဆောင်ခဲ့သည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။