Thursday, October 2, 2014

နွံထဲ၌ ကျွံနေသော ငြိမ်းချမ်းရေးလှည်းဘီး

(Eleven Media Group)



ပြည်တွင်း ငြိမ်းချမ်းရေး လှည်းဘီးကြီး သည် နွံထဲ၌ ကျွံနေခဲ့သည်မှာ လွတ်လပ်ရေး ရပြီးစ ကတည်းက ဖြစ်သည်။ ငြိမ်းချမ်းရေးလှည်းဘီးကို ပြိုင်တူတွန်းလျှင် ရွေ့နိုင်သည်ဟု ယေဘုယျဆိုနိုင်သော်လည်း မတွန်းတတ်လျှင် နွံထဲ၌ ပို၍နစ်ဝင်သွားနိုင်ဖွယ်ရှိသည်ကို ဆင်ခြင်သင့်သည်။ တန်းတူရည်တူရှိသော၊ ပွင့်လင်းမြင်သာမှုရှိသော၊ ပြည်ထောင်စုအကျိုးစီးပွားကို အပြောမဟုတ် လက်တွေ့ကျကျ ရှေးရှုသောယုံကြည်မှု တည်ဆောက်ရေးသည်သာ ငြိမ်းချမ်းရေးလှည်းဘီးကို နွံအိုင်ထဲမှ ရုန်းထွက်နိုင်အောင် ဝိုင်းဝန်းနိုင်မည်ဖြစ်သည်။


ပြည်ထောင်စုငြိမ်းချမ်းရေးဖော်ဆောင်ရေးလုပ်ငန်းကော်မတီ၏ ကိုယ်စားလှယ်အဖွဲ့နှင့် တိုင်းရင်းသားလက်နက်ကိုင်အဖွဲ့အစည်းများ၏ တစ်နိုင်ငံလုံးအပစ်အခတ်ရပ်စဲရေးဆိုင်ရာ ညှိနှိုင်းရေးအဖွဲ့တို့သည် တစ်နိုင်ငံလုံး ပစ်ခတ်တိုက်ခိုက်မှုရပ်စဲနိုင်ရေးအတွက် သဘောတူစာချုပ်မူကြမ်းအပေါ် ညှိနှိုင်းဆွေးနွေးခြင်းကို ၂ဝ၁၄ ခုနှစ်၊ စက်တင်ဘာ ၂၂ ရက်မှ ၂၆ ရက်အထိ မြန်မာနိုင်ငံ ငြိမ်းချမ်းရေးပြန်လည်ထူထောင်ရေးလုပ်ငန်း ဗဟိုဌာနတွင် ပြုလုပ်ခဲ့သည်။ ငါးရက်ကြာဆွေးနွေးပွဲအလွန်တွင် သဘောတူပြီးသောအချက်များကို ပြန်လည်ဆွေးနွေးခဲ့ရခြင်း တစ်စိတ်တစ်ဒေသ ဂငယ်ကွေ့ ကွေ့နေခြင်း စသည့် ဝေဖန်သံများနှင့်အတူ ရှေ့မတိုးနောက်မဆုတ်ဖြစ်နေဆဲဟု သုံးသပ်နိုင်သည်။

နှစ်ဖက်ကိုယ်စားလှယ်များသည် ကျန်ရှိနေသည့်အချက်များကုို ဆက်လက်ဆွေးနွေးညှိနှိုင်းရာတွင် တစ်ဖက်နှင့် တစ်ဖက်အကြား အပြန်အလှန်နားလည်မှု၊ ယုံကြည်မှုများနှင့် သဘောတူညီမှုများ ပိုမိုရရှိခဲ့ပြီး တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (စတုတ္ထမူကြမ်း) ကို အတည်ပြုနိုင်ခဲ့သည်ဟု ပူးတွဲသတင်းထုတ်ပြန်ချက်တွင် ဖော်ပြခဲ့သော်လည်း အဆိုပါသဘောတူညီချက်များကို သတင်းမီဒီယာများနှင့် ပြည်သူလူထုသိရှိနိုင်အောင် တရားဝင်ထုတ်ပြန်နိုင်ခဲ့ခြင်းမရှိသည်မှာ စဉ်းစားစရာ ဖြစ်သည်။ 
ယခင်ဆွေးနွေးပွဲများနှင့် နှိုင်းယှဉ်လျှင် အပြန်အလှန်နားလည်မှုနှင့် ယုံကြည်မှုတို့ လျော့ကျခဲ့သည်ဟု သုံးသပ်နိုင်သည်။ ပွင့်လင်းမြင်သာမှု အားနည်းနေသည်မှာ အမှန်ဖြစ်သည်။ သို့ဖြစ်၍ တိုင်းရင်းသား ပြည်သူလူထုဗဟိုပြု ငြိမ်းချမ်းရေးလုပ်ငန်းစဉ်သည် အပြောသက်သက် ကြားကောင်းရုံသက်သက်သာ ရှိနေဆဲဟု ကောက်ချက်ပြုနိုင်သည်။

ဤဆွေးနွေးပွဲသို့ တက်ရောက်ကြသည့် နှစ်ဖက်ကိုယ်စားလှယ်များသည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် အမြန်ဆုံးချုပ်ဆိုနိုင်ရေးနှင့် နိုင်ငံရေးတွေ့ဆုံဆွေးနွေးပွဲများကို အမြန်ဆုံးကျင်းပကာ ရေရှည်တည်တံ့ခိုင်မြဲသည့် ငြိမ်းချမ်းရေးရရှိရေးအတွက် ကြိုးပမ်းလုပ်ဆောင်သွားမည်ဖြစ်ကြောင်း ပူးတွဲကြေညာချက်ပါ အသိပေးမှုသည်လည်း ယေဘုယျသဘောဆန်လွန်းပြီး အနှစ်သာရပိုင်းတွင် လျော့တိလျော့ရဲဖြစ်နေသည်ဟု သုံးသပ်နိုင်သည်။ ပူးတွဲကြေညာချက်တွင် နှစ်ဖက်ဆွေးနွေးမှု ရလဒ်များကို တိတိကျကျ မထုတ်ပြန်နိုင်ခဲ့သည်မှာလည်း သိသာမြင်သာသော အားနည်းချက်တစ်ခု ဖြစ်သည်။

အစိုးရနှင့် အင်န်စီစီတီအကြား ဆဌမအကြိမ်မြောက် ဆွေးနွေးပွဲအလွန် ပြည်ထောင်စုငြိမ်းချမ်းရေးဖော်ဆောင်ရေးလုပ်ငန်းကော်မတီ၊ နိုင်ငံရေးပါတီများနှင့် တိုင်းရင်းသားအဖွဲ့အစည်းများ၏ ဒုတိယအကြိမ်တွေ့ဆုံဆွေးနွေးပွဲကို ၂ဝ၁၄ ခုနှစ် စက်တင်ဘာ ၂၇ ရက်တွင် မြန်မာနိုင်ငံငြိမ်းချမ်းရေး ပြန်လည်ထူထောင်ရေးလုပ်ငန်း ဗဟိုဌာန၌ ကျင်းပခဲ့သည်။ တရားဝင်မှတ်ပုံတင်ထားသော နိုင်ငံရေးပါတီ ၆၇ ပါတီကို ဖိတ်ကြားခဲ့ပြီး ၆၄ ပါတီမှ ကိုယ်စားလှယ်များ တက်ရောက်ခဲ့သည်။ သတ္တမအကြိမ်မြောက်ဆွေးနွေးပွဲတွင် တစ်နိုင်ငံလုံးအတိုင်းအတာ ပစ်ခတ်တိုက်ခိုက်မှုရပ်စဲရေး သဘောတူစာချုပ်အတွက် အပြီးသတ်သဘောတူညီမှု ရရှိနိုင်လိမ့်မည်ဟု ပြည်ထောင်စုဝန်ကြီး ဦးအောင်မင်းက မျှော်မှန်းခဲ့သည်။ ဆွေးနွေးပွဲတွင် အရေးကြီးအချက်အလက်များကို အပြန်အလှန် ပိုမိုအသေးစိတ် ဆွေးနွေးနိုင်ခဲ့ပြီး နှစ်ဖက်အပြန်အလှန်ယုံကြည်မှုကို ပိုမိုတည်ဆောက်နိုင်ခဲ့သည်ဟု ဝန်ကြီး ဦးအောင်မင်းက ဆိုခဲ့သော်လည်း ရေပေါ်အရုပ်ရေးနေဆဲဟုသာ သုံးသပ်နိုင်သည်။

အစိုးရ၊ နိုင်ငံရေးပါတီများနှင့် တိုင်းရင်းသားအဖွဲ့အစည်းများ၏ မျက်နှာစုံညီဆွေးနွေးပွဲတွင် ပြည်ထောင်စုငြိမ်းချမ်းရေးဖော်ဆောင်ရေးလုပ်ငန်းကော်မတီနှင့် တစ်နိုင်ငံလုံး အပစ်အခတ်ရပ်စဲရေးဆိုင်ရာ ညှိနှိုင်းရေးအဖွဲ့တို့အကြား ထပ်မံပြုလုပ်မည့် အောက်တိုဘာလ ဆွေးနွေးပွဲ၌ တစ်နိုင်ငံလုံးအတိုင်းအတာ ပစ်ခတ်တိုက်ခိုက်မှု ရပ်စဲရေးသဘောတူစာချုပ်အတွက် ပဉ္စမ မူကြမ်းအဆင့်အထိ ဆွေးနွေးခြင်းမပြုဘဲ အပြီးသတ်လက်မှတ်ရေးထိုးနိုင်ရေးကို နိုင်ငံရေးပါတီအများစုက အဆိုပြုတိုက်တွန်းခဲ့သည်ဟု သိရှိရသည်။ နိုင်ငံရေးပါတီများအနေဖြင့် နိုင်ငံရေးသဘောတရား၊ နိုင်ငံရေးအမြင်၊ အသိနှင့် ချဉ်းကပ်ရမည်ဖြစ်သည့်အလျောက် လုံးစေ့ပတ်စေ့ ဆင်ခြင်သုံးသပ်နိုင်ရန် လိုအပ်မည်ဖြစ်သည်။

အကျေအလည် ဆွေးနွေးခြင်းမပြုဘဲ အလျင်အမြန်လက်မှတ်ရေးထိုးသင့်ကြောင်း နိုင်ငံရေးပါတီအများစု၏ တိုက်တွန်းမှုသည် အံ့ဩဖွယ်ကောင်းသည့်အပြင် နောက်ကွယ်၌ အကြံအစည်တစ်ခုခုရှိရမည်ဟုပင် ထင်မြင်မိသည်။ အဆိုပါတိုက်တွန်းမှုကို အရပ်ဘက်အဖွဲ့အစည်းများက အဆိုပြုသည်ဆိုလျှင် ကြည့်ကောင်းသေးသည်။ နိုင်ငံရေးပါတီခေါင်းဆောင်များအနေဖြင့်၊ အကျေအလည်မဆွေးနွေး၊ ယုံကြည်မှုနှင့် နားလည်မှု မတည်ဆောက်၊ အပစ်အခတ်ရပ်စဲလျှင် ပြီးရောမူနှင့် ရပ်တည်ဖို့ တိုက်တွန်းခြင်းသည် နိုင်ငံရေးအရ သွေးလန့်ဖွယ်ဖြစ်သည်။

ဆွေးနွေးပွဲတွင် တက်ရောက်ခဲ့သော တရားဝင်နိုင်ငံရေးပါတီအများစုအနေဖြင့် သတ္တမအကြိမ်ဆွေးနွေးပွဲတွင် တစ်ပေါင်းတည်း လက်မှတ်ရေးထိုးနိုင်ရေး ဆော်ဩမှုကို ထောက်ခံကြိုဆိုခဲ့သည်ဟု သုံးသပ်နိုင်သည်။ နိုင်ငံရေးပါတီများအနေဖြင့် အစိုးရနှင့် တိုင်းရင်းသား လက်နက်ကိုင်အဖွဲ့အစည်းများအကြား ဆွေးနွေးမှုများတွင်  တိုင်းရင်းသားလက်နက်ကိုင်အဖွဲ့အစည်းများအား ဖိအားပေးသည့်သဘော၊ နိုင်ငံရေး လမ်းကျဉ်းထဲဆွဲခေါ်သည့်သဘောမပြုမိရန် အရေးကြီးသည်။ အပစ်ရပ်စာချုပ်ပါ အချက်အလက်များကို အကျေအလည် ညှိနှိုင်းဆွေးနွေးခြင်းမပြု၊ အလွယ်လမ်းလိုက်၊ လက်မှတ်ရေးထိုးလျှင်ပြီးရော သတ်မှတ်မည်ဆိုလျှင် နိုင်ငံရေးအရ နမော်နမဲ့နိုင်လွန်းသည်ဟု ကောက်ချက်ပြုနိုင်သည်။ နိုင်ငံရေးပါတီများအနေဖြင့် သမာသမတ်ကျသော၊ ကြားနေသော၊ ဘက်မလိုက်သော နိုင်ငံရေးလမ်းကြောင်းပေါ်တွင် နိုင်ငံရေးလူကြီးလူကောင်းဆန်ဆန် ရပ်တည်နိုင်ရန် လိုအပ်မည်ဖြစ်သည်။

အချုပ်အားဖြင့်ဆိုသော် ပြည်ထောင်စုငြိမ်းချမ်းရေးကို ဦးတည်နိုင်ရေးတွင် ရေရှည်အမြင်နှင့် ချဉ်းကပ်နိုင်ရန် ပဓာနကျသည်။ ရေတိုအမြင်နှင့်ဆိုလျှင် အကျိုးထက်အဆိုးဖြစ်လာနိုင်ခြေကို မျက်ခြည်မပြတ်သင့်ပါ။ ပြည်ထောင်စုငြိမ်းချမ်းရေးကို အခြေခံအုတ်မြစ်ခိုင်ခိုင် တည်ဆောက်နိုင်မှသာ ငြိမ်းချမ်းရေးလှည်းဘီးသည် နွံထဲမှ ရုန်းထနိုင်မည်ဖြစ်သည်။ ထို့ကြောင့် ပြည်ထောင်စုနိုင်ငံရေးဆွေးနွေးပွဲများကို အချိန်ယူပြင်ဆင်ထားသော အားလုံးသဘောတူသော ဘုံမူဝါဒများ၊ ဘုံသဘောထားများ၊ ဘုံလုပ်ငန်းစဉ်များအပေါ်တွင် အုတ်မြစ်ချလျက် ပြင်ဆင်ဆောင်ရွက်သင့်ပါကြောင်း၊ နိုင်ငံရေးအရ မရောင်ရာဆီလူးမိမည်ဆိုလျှင် တိုင်းပြည်နှင့် ပြည်သူသာ နစ်နာမည်ဖြစ်ပါကြောင်း မီးမောင်းထိုး ဆော်ဩလိုက်ရပါသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။