Tuesday, September 30, 2014

PUTAO NLUNG BAREN HPE MI NA RAW BAI TAWN NA MATU MYEN ASUYA SALANG NI HPE HKRUM SHAGA NA

(EEDY)

Myen asuya hpyen dap ni Putao ginwang Machan Baw kaw nlung san san hte byin nga ai labau shang nlung baren hpe 2014 July shata kaw nna colour bang gram jashai ai hte baren baw shakap rai gram nga ai hpe chye lu ai.

Ya na zawn labau shang nlung baren hpe majoi gram jashai kau ya ai majaw mi na raw bai galaw na matu Putao Jinghpaw Htunghking hte Laili laika hpung, Putao Lisu Htunghking hte Laili laika hpung ni Putao kaw na Myen asuya Salang ni hte hkrum shaga na matu Htunghking hpung kata myit hkrum da sai re lam chye lu ai.


Bai nna ya nlung baren nga ai shara gaw Myen asuya hpyen dap ginra kata kaw rai taw ai majaw, ndai nlung baren nga ai ginra kaw hpyen dap n sa tawn na matu, ya tawn da ai hpyen dap hpe mung shale kau na matu mung matut hpyi shawn mat na re lam Jinghpaw Htunghking hte Laili laika Comiti ningbaw Slg. Kum Nga Naw Awng tsun ai kawn chye lu ai.

Ndai nlung baren gaw moi kawn nlung san san hte byin nga ai lung rawk rai nna ya gaw myen asuya hpyen dap ni bilat, zai bru hte colour bang rai gram jashai jahten kau ya ai re lam chye lu ai.

Putao Byu Har Mu kaw nna ndai nlung baren hpe Sam hpu nau ni na re, Sam ni a labau re ngu nna tsun shangun ai lam, dai shara hpe gram shatsawm na matu myit hkrum ai ngu nna ta masat htu dagam shangun ai lam ni mung galaw lai wa sai lam chye lu ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။