Tuesday, September 30, 2014

PUTAO HPYEN YEN NI MALU MASHA YAK

(EEDY)

Putao Ginwang hta hpyen yen nga ai mung shawa 100 jan malu masha mayak hkrum nga ai lam chye lu ai.

Putao Ginwang Machan Baw hte Nawng Hkai nawku jawng hta shanu nga ai hpyen yen 100 jan hpe lani mi shat mai gumhpraw mun lahkawng hku na sha Putao nawku jawng kaw nna garum ai alu gumhpraw hte, sha nga ai rai nna n law ai re majaw shani rai yang nam de na si mai ni tam sha let nga ai hpe Machan Baw Hpyen yen Komiti Salang Naw Seng tsun ai kawn chye lu ai.


Bai na Machan Baw hte Nawng Hkai nawku jawng hta shanu shingbyi nga ai hpyen yen ni hpe Asuya kaw nna hpyen yen ngu masat ai lam n nga ai re hpe mung chye lu ai.

“Ndai kaw nga ai hpyen yen ni hpe Asuya kaw nna hpyen yen ngu n masat ai, dai sha n ga nta wa na matu jahkring hkring tsun ai, rung lung shagu ngu na ram dai sha tsun ai” nga nna Machan Baw muklum shanaw ga uphkang Salang Tu San tsun ai kawn chye lu ai.

2013 ning September shata hta Putao Nhka Ga mare kaw Myen asuya hpyen hte KIA (Wunpawng Mungdang Shanglawt hpyen hpung) ni gasat gala byin ai majaw laja lana majan byin wa na hpe tsang let Nhka Ga, Nhpyi Ga hte Hpakan Yang mare hkan na mung shawa ni hprawng yen mat ai re lam chye lu ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။