Friday, February 14, 2014

MAI JA YANG DE MYEN MYU SHA NI LAW JAT WA

(Jinghpawkasa)

Wunpawng Mungdan Shanglawt Asuya Sinpraw Ginwang Ginjaw Dap Ba (3) Ginra rai nga ai Mai Ja Yang Muklum de ya ten myen amyu sha ni chyu tup rai nga ai lam hpe na chye lu ai. Ndai zawn rai myen amyu sha ni chyu tup re ai lam gaw, KIA Du Kaba ni kawn shanhte a dum nta gap na matu myen laksama sara ni law law hpe shaga bang wa ai majaw hte Mai Ja Yang Muklum hta Golf Gasup pa hte hkring sa shara ni gap na matu bungli galaw matu myen bungli galaw masha ni hpe shaga bang wa ai majaw re lam na chye lu ai. Ndai zawn rai du shang wa ai kaw myen hpyen asuya kin-yu ni mung lawm ai lam hpe buga masha ni kawn na chye lu ai.
Mai Ja Yang Buga masha langai Jinghpaw Kasa de tsun shana wa ai hta, "lai wa sai shaning hkan gaw Mai Ja Yang de myen hkum tsun myen ga shaga ai masha pi shang na yak ai, rai tim ya daining kawn gaw Shanglawt Du Kaba ni kawn shanhte a dum nta gap na matu myen laksama sara ni hpe shaga bang wa ai kawn ya na zawn myen myu sha ni law wa ai re lam, ya na zawn Mai Ja Yang kata du nga ai myen ni hpe lit nga ai ni kawn san jep ai lam galaw yang mung, gara Du Kaba nta na masha re, shangun ma re ngu bai nhtang tsun wa wa ai re ai lam ni nga ai majaw lawu na lit nga ai ni sha gaw hpa n mai galaw ai rai nga ai." nga nna tsun shana wa ai. Yaten Mai Ja Yang Muklum de myen myu sha ni grai law shang wa ai majaw buga masha ni kawn myit tsang nga ai lam, lit nga ai ni hpe tsun shana na mung Shanglawt Du Kaba (lit nga ai) ni nan shaga jashawn taw ai re majaw gara de n chye hpaw tsun dan nna myit ru tsang pu nga ma ai lam shiga na chye lu ai.

Bai ya ten Myen wa hkran maga de mung hpyen ni chyu tup re lam hpe na chye lu ai. Nkau myen la ni gaw masha ni san yang Shanglawt Hpyen la nkam galaw na Shanglawt Dap kaw na hprawng hkawm ai re, Tsinyam dabang hkan grai jam jau ai majaw ya na zawn bungli tam galaw sha hkawm ai re, nga nna tsun jahta hkawm ai lam buga masha ni kawn na chye lu ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။