Wednesday, February 12, 2014

အစိုးရတပ်များ KIA ဌာနချုပ်အနီး တပ်စခန်းတခု ထပ်မံသိမ်းပိုက်

(ကချင်သတင်းဌာန)

ကချင် လွတ်လပ်ရေး အဖွဲ့ KIO ဗဟိုဌာနချုပ် လိုင်ဇာမြို့အနီး KIA ခအူ (Hka -U) စခန်း အား ယနေ့ ဖေဖေါ် ၀ါရီ ၁၂ ရက်နေ့ နံနက် ၁၀ နာရီခွဲချိန် တွင် အစိုးရတပ်မှ ထပ်မံ သိမ်းပိုက် လိုက်ကြောင်း KIO နည်းပညာ အဖွဲ့ Technical Advisory Team မှ ဆရာဒေါင်ခါး ပြော သည်။

ထိုစခန်း သည် ယမန်နေ့ တွင် အစိုးရတပ်များလက်နက်ကြီးဖြင့် ပစ်ခတ်၍ တပ်စွဲ လိုက်သော KIA ဂျာအိန်ယန် စခန်း (Ja Ing Yang post) မှ ၆ မိုင်အကွာ တွင် ရှိသော စခန်းဖြစ်ပြီး အစိုးရ တပ် တပ်မ ၉၉ စစ်ကြောင်း သည် စစ်အင်အား ၂၀၀ ကျော်ဖြင့် ထပ်မံပစ်ခတ် တိုက်လာခြင်းကြောင့် ကချင် လွတ်လပ်ရေး တပ်မတော် (KIA) တပ်ရင်း ၁၈ ဖက်မှ ထပ်မံနောက် ဆုတ်လိုက်ရခြင်းဖြစ် သည်ဟု သိရသည်။


KIA ဖက်မှနောက်ဆုတ်ထားသော ခအူ (Hka U) ၎င်းအစိုးရတပ်ဖွဲ့ သည် KIA စခန်းအား မီးရှို့ ဖျတ်ဆီးနေကြောင်း ရှေ့တန်း KIA စခန်းကို အစိုးရတပ်များသိမ်းပိုက်ပြီးနောက် မီးရှို့ဖျက်ဆီးနေကြောင်း KIA ရှေ့တန်းတပ်ဖွဲ့ဝင်တဦးပြောသည်။

ထိုသို့တိုက်ပွဲများပြန်လည်ဖြစ်ပွားလာသောကြောင့် KIO နည်းပညာအဖွဲ့မှ မြန်မာငြိမ်းချမ်းရေးစင်တာ (MPC) သို့ တိုက်ပွဲများပြင်းထန်လာနိုင်သောအခြေအနေကို ယနေ့အကြောင်းကြားထားကြောင်း KIO နည်းပညာအဖွဲ့ Technical Advisory Team ပြောခွင့်ရ ဆရာဒေါင်ခါး KNG ကချင်သတင်းဌာန သို့ပြောသည်။

“အစိုးရဖက်က သစ်ခိုးထုတ်တဲ့ကုန်သည်တွေကိုဆိုပြီး လိုက်နေကြတာ နောက်မှာ KIA ဖက်က တန်ပြန် ထိုးစစ်ဆင် တိုက်ခိုက်လာရင်တော့ ပြင်းထန်တဲ့တိုက်ပွဲကြီးဖြစ်လာမယ် အခုက နေရာဖယ်ပေးနေတဲ့ အတွက် ပြဿနာကြီးတော့ မဟုတ်သေးဘူး ဒါမဲ့ KIA ဘက် တန်ပြန်တိုက်ခိုက်လာရင်တော့ တိုက်ပွဲကြီးတွေ ဖြစ်လာမယ်” ဟု ဆိုသည်။

ယမန်နေ့ ညနေ ၃ နာရီကျော်ချိန်တွင်လည်း အစိုးရတပ်သိမ်းပိုက်လိုက်သော KIA တပ်ရင်း ၁၈ ဂျာအိန်ယန် (Ja Ing Yang) စခန်းအနီးတွင် ဗန်းမော်ဘက် တပ်မ ၉၉ မှ စစ်ကား ၅ စင်းဖြင့် စစ်အင်အား ၁၀၀ ကျော်စစ်အင်အားများတိုးချဲ့ထားကြောင်းရှေ့တန်း မှသိရသည်။

ထိုနည်းတူ ယမန်နေ့ညတွင် အစိုးရတပ် နမ်ဆန်ယန်စခန်း တပ်မ ၃၃ နှင့် စကခ ၇ တို့သည် ဘန်ဒေါင် (Ban Dawng) KIO ဖွံဖြိုးရေးဒေသ KIA တပ်များရှိရာနေရာသို့ လက်နက်ကြီး ၁၂၀ မမ ဖြင့် အကြိမ်ကြိမ် ပစ်ခတ်ခဲ့ကြောင်း ဌာနချုပ်မှ KIA အရာရှိတဦးပြောသည်။

“စစ်အင်အားတွေတိုးချဲ့နေတယ် တပ်အပြောင်းအလဲလား တော့မပြောတတ်ဘူး ကျနော်တို့က နိုင်ငံရေးဆွေးနွေးဖို့ရန်ညှိနှိုင်းနေတယ် ဒါမဲ့အစိုးရတပ်က တော့ ကျနော်တို့လိုချင်တဲ့ နိုင်ငံရေးဆွေးနွေးပွဲကို မဆွေးနွေးချင်ဘူး သူတို့က အပစ်ခတ်ရပ်စဲရင်ပြီးပြီ ဆိုပြီးရည်ရွယ်နေတယ် ပစ်ခတ်ရပ်စဲရေးလက်မှတ်ထိုးဖို့ ကျနော်တို့ကို စစ်အင်အားတွေနဲ့ဖိအားပေးနေတယ် ကျနော်တို့ ပစ်ခတ်ရပ်စဲသည်ဖြစ်စေ မရပ်စဲသည်ဖြစ်စေ ယခုလို တိုက်ပွဲမဖြစ်တဲ့နေရာမှာလည်း စစ်အင်အားနဲ့ နေရာတိုင်းမှာနေရာယူထားတယ် ဂျာအိန်ယန်၊ ရှဒန်ယန်ပါ (Shadan Pa) နေရာ အနီးတဝိုက် KIA တပ်စခန်းတွေမရှိအောင်လုပ်နေတယ်” ဟု KNG ကချင်သတင်းဌာန သို့ပြောသည်။

ယခုရက်ပိုင်းတွင် ဗဟိုဌာနချုပ် လိုင်ဇာအနီးတွင် တိုက်ပွဲများပြန်လည်ဖြစ်ပွားလာခြင်းဖြစ်ပြီး အစိုးရတပ်များဖက်မှ KIA တပ်များ၏စခန်းများကို ထပ်မံသိမ်းပိုက်နေရာယူလာခြင်းဖြစ်ကြောင်းသိရသည်။

အစိုးရနှင့် ကချင်လွတ်လပ်ရေးတပ်မတော် အကြား စစ်ရေးများဆက်လက်တင်းမာလာနေသကဲ့သို့ ယခုချိန် မြို့ပေါ်ရှိ ကချင်ပြည်သူလူထုကြားတွင်လည်း မကြာမီ အစိုးရကောက်ခံမည့် သန်းခေါင်စာရင်း ကိစ္စရပ်အပေါ် ကချင်ပြည်နယ်တွင်း လူမျိုးစုများကြား ပြဿနာများဖြစ်ပေါ်စေနိုင်သော အလားအလာရှိသောကြောင့် မလိုလားသောသူ အများမပြားရှိနေသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။