Sunday, January 26, 2014

မိုးကောင်း-ဖားကန့် လမ်းပြင်ရေး မပြေလည်မှုများ ရှိနေ

(Irrawaddy)
မိုးကောင်း - ဖားကန့် လမ်းပိုင်းတစ်နေရာ (ဓာတ်ပုံ Lachid Kachin FB)


ကချင်ပြည် နယ် မိုးကောင်း- ဖားကန့် လမ်း ပြုပြင်ရန် အတွက် ပြည်နယ် အစိုးရ အဖွဲ့က ကျောက်မျက် လုပ်ငန်းရှင်များ ကို ငွေကောက် ခံ နေခြင်းနှင့် ပတ် သက်ပြီး မပြေ လည်မှုများ ရှိနေကြောင်း သတင်း ရရှီသည်။

ကျောက်မျက် လုပ်ငန်းရှင်များကို ယခုလ ၁၅ ရက်နေ့ နောက်ဆုံးထား၍ လုပ်ကွက် တကွက်လျှင် သတ်မှတ် ရာခိုင်နှုန်းအနက် ၃၀ ရာခိုင်နှုန်း ပေးသွင်းရန် အစိုးရပိုင် သတင်းစာများမှ တဆင့် ကြေညာထားသည်။


အစိုးရသို့ သွင်းရမည့် ငွေသည် လုပ်ငန်းရှင်များ လုပ်ကိုင်လျက်ရှိသည့် လုပ်ကွက် တန်ဖိုးများ အလိုက် သတ်မှတ်ခြင်း ဖြစ်ရာ လုပ်ငန်းရှင် တဦးနှင့်တဦး ပေးသွင်းရမည့် ပမာဏမှာလည်း မတူညီကြောင်း သိရသည်။

ထိုသို့သတ်မှတ် ကောက်ခံခြင်းနှင့် ပတ်သက်ပြီး ကျောက်မျက် လုပ်ငန်းရှင်တချို့၏ မကျေနပ်မှုများလည်း ဖြစ်ပေါ်နေသည်ဟု အောင်စည်းစိမ် ကျောက်မျက် ကုမ္ပဏီ ၏ ဒါရိုက်တာ ဦးအောင်ကြီးက ဧရာဝတီသို့ ပြောသည်။

မိုးကောင်း- ဖားကန့်လမ်းသည် ၅၈ မိုင်ကျော် ရှည်လျားပြီး စီးပွားရေး၊ ကျန်းမာရေး၊ စစ်ရေးအတွက် အဓိက အသုံးပြုလျက် ရှိသည့် လမ်းတခုဖြစ်ကြောင်း သိရသည်။

နယ်မြေ မတည်ငြိမ်မှုများကြောင့် ဖားကန့် ကျောက်လုပ်ကွက်များကို လွန်ခဲ့သည့် ၂ နှစ်ကျော် ကတည်းက ရပ်နားထားရသဖြင့် လမ်းပြုပြင်ရန် အတွက် လုပ်ငန်းရှင်များထံမှ မကောက်ခံဘဲ အစိုးရ ဘဏ္ဍာငွေဖြင့် ဖြစ်စေ၊ ပုဂ္ဂလိက ဆောက်လုပ်ရေး ကုမ္ပဏီများကို လုပ်ငန်းတင်ဒါ ခေါ်ယူ၍ဖြစ်စေ ပြုပြင်သင့်ကြောင်း ဦးအောင်ကြီးက ပြောသည်။

“ဒီလမ်းအတွက် ကျနော်တို့ လုပ်ငန်းရှင်တွေက အခုအချိန်မှာ လုပ်အားလောက်ပဲ စိုက်ထုတ်ပေးနိုင်မယ့် အခြေအနေလို ဖြစ်နေ တယ်။ လုပ်ကွက်တွေ ဖော်မရလို့ ဝင်ငွေမရှိနေတဲ့အပြင် ကိုယ့်အလုပ်သမားတွေရဲ့ အခြေအနေကိုလည်း ကြည့်နေရတဲ့အချိန် ဆို တော့ ဘယ်လိုလုပ် ငွေစိုက်နိုင်မလဲ”ဟု ဦးအောင်ကြီးက ဆိုသည်။

အစိုးရသို့ ပေးသွင်းရမည့် ၃၀ ရာခိုင်နှုန်း ငွေကြေးနှင့် ပတ်သက်၍ မြန်မာနိုင်ငံ ကျောက်မျက် လုပ်ငန်းရှင်များ အသင်းက ဇန်နဝါရီ ၂၀ ရက်တွင် အစည်းအဝေးခေါ်၍ အသင်းရန်ပုံငွေထဲမှ အသုံးပြုရန် ဆွေးနွေးကြသော်လည်း အသင်းသားတချို့က ကန့်ကွက်ခဲ့ သည်။

“အသင်းရန်ပုံငွေထဲက သုံးတယ်ဆိုတာလည်း ကျနော်တို့ အသင်းသားတွေရဲ့အနှစ်နှစ်အလလ စုခဲ့တဲ့ငွေတွေ”ဟု ဦးအောင်ကြီးက ပြောဆိုသည်။

ကချင်ပြည်နယ် အစိုးရအဖွဲ့၏ တာဝန်ယူရှိသူ တဦးဖြစ်သည့် ဦးကျော်ဆန်းကမူ ကျောက်မျက် လုပ်ငန်းရှင်တချို့ ငွေကြေး မထည့် လို သည့် ကိစ္စနှင့်ပတ်သက်ပြီး မိမိတို့အစိုးရအဖွဲ့မှ မသိရသေးသဖြင့် အမှန်တကယ် အခက်အခဲရှိလျှင် ထပ်မံညှိနှိုင်း ဆွေးနွေးသွားရမည် ဖြစ်ကြောင်း ပြောသည်။

၎င်းက ဆက်လက်ပြီး ၂၀၁၃ ခုနှစ် ဒီဇင်ဘာ ၇ ရက်က အစိုးရအဖွဲ့နှင့် ကျောက်မျက် လုပ်ငန်းရှင်များ အသင်းတို့ ဆွေးနွေးပြီးမှ လမ်းကိစ္စကို စီစဉ်ခြင်း ဖြစ်ကြောင်း၊ ယခုအချိန်တွင် လုပ်ငန်းရှင်တချို့က ပေးသွင်းရမည့် ထည့်ဝင်ငွေများကိုပင် ပေးသွင်းနေပြီ ဖြစ် သည်ဟု ပြောဆိုသည်။

ထို့အပြင် ယခုပြုပြင်မည့် လမ်းသည် ကချင် လွတ်လပ်ရေး တပ်မတော် (KIA)၏ စိုးမိုးနယ်မြေများထဲ ကျ ရောက် နေကြောင်း၊ သို့သော်လည်း ညှိနှိုင်းရန် လိုအပ်မည်ဟု မယူဆကြောင်း ၎င်းက ဆက်ပြောသည်။

“ဒီလမ်း ပြင်ဖို့လောက်နဲ့တော့ KIO/ KIA နဲ့ ဆွေးနွေးစရာ မလိုလောက်ဘူး ထင်ပါတယ်။ နယ်မြေတချို့က သူတို့စိုးမိုး နယ်မြေထဲမှာ ပါနေတယ် ဆိုပေမယ့် ဒေသဖွံ့ဖြိုးရေး အတွက်ပဲလေ။ အခုချိန်ထိတော့ လုံလောက် တဲ့ ရန်ပုံငွေတွေ မရသေးဘူး။ ရတာနဲ့ စဖြစ် လောက်မယ်။ အချိန်ကာလ အတိအကျတော့ပြောလို့ မရသေးဘူး”ဟု ဦးကျော်ဆန်းက ဆိုသည်။

သို့သော် ထိုလမ်းသည် နယ်မြေဖွံ့ဖြိုးရေးအတွက်သာမက စီးပွားရေး၊ စစ်ရေး အားလုံးအတွက် အဓိက လမ်းတခုဖြစ်ရာ၊ စီမံကိန်းပြုလုပ်မည် ဆိုလျှင် ဒေသဆိုင်ရာ အုပ်ချုပ်ရေးနှင့် မိမိတို့အဖွဲ့ကြား ညှိနှိုင်းမှုများ ရှိလာရမည်ပင် ဖြစ်ကြောင်း KIA မဟာဗျူဟာ လေ့ လာရေး ဌာနမှ ဦးဒေါင်ခါးက ပြောသည်။

လမ်းကိစ္စကို မိမိတို့အနေဖြင့် ကြားသိထားသော်လည်း ကချင်ပြည်နယ် အစိုးရအဖွဲ့ထံမှ တရားဝင် အသိပေး အကြောင်းကြားခြင်း မရှိသေးကြောင်း၊ ယခု စီမံကိန်းသည် ဗဟိုအစိုးရ စီမံကိန်းလား၊ ပြည်နယ်အစိုးရ စီမံကိန်းလားဆိုသည်ကိုလည်း သဲကွဲစွာ မသိရ သေးကြောင်း ၎င်းက ဆက်ပြောသည်။

“အစိုးရတရပ် အနေနဲ့က အမိန့်တခုတည်းနဲ့ လုပ်လို့မရဘူး။ ကျနော်တို့ စိုးမိုးတဲ့ နယ်မြေတွေမှာလည်း လမ်းတို့၊ ဆောက်လုပ်ရေး တို့ ဆိုတာ လုပ်ခဲ့တာပဲ။ လမ်းပြုပြင်ဖို့အတွက်တော့ ကန့်ကွက်စရာ သိပ်မရှိပေမယ့် ပွင့်လင်း မြင်သာမှု ရှိရှိနဲ့ ချပြဖို့တော့ လိုလိမ့် မယ်”ဟု ဦးဒေါင်ခါးက ဆိုသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။