Wednesday, November 20, 2013

အစိုးရတပ်သည် KIO နမ်လင်းပါ ဒုက္ခသည်စခန်းအား အကူအညီပေးအဖွဲ့ကို အသုံးပြု၍ သိမ်းပိုက်

(ကချင်သတင်းဌာန)

ကချင်ပြည် နယ်တောင်ပိုင်း ဗန်းမော် ခရိုင် မန်စီမြို့နယ်ရှိ ကချင် လွတ်မြောက်ရေး အဖွဲ့ (KIO) ထိန်းချုပ် နယ်မြေရှိ နမ်လင်းပါ (Nam Lim Pa) ဒုက္ခသည် စခန်းကို အစိုးရတပ်များသည် ဒုက္ခသည် အကူအညီပေးရန် လာသော အစိုးရ ကြံ့ခိုင်ဖွံ့ဖြိုးရေး အဖွဲ့များကို အကာအကွယ် ယူကာ ရွာတွင်းသို့ ၀င်ရောက် လှုပ်ရှားသိမ်း ပိုက်ခဲ့ခြင်းဖြစ်ကြောင်း ၎င်းဒေသ အခြေစိုက် ကချင် လွတ်မြောက်ရေး တပ်ဖွဲ့ (KIA) တပ်ရင်း (၁၂) မှ ပြောသည်။

အာဏာရ အစိုးရကြံ့ခိုင်ဖွံ့ဖြိုးရေးပါတီ၏ ညီအစ်မပါတီဖြစ်သော စည်းလုံးညီညွတ်ရေးနှင့် ဒီမိုကရေစီပါတီ ကချင်ပြည်နယ် (UDPKS) အတွင်းရေးမှူး ဦးဖေါင်လားဂမ်ဖန် သည် နမ်လင်းပါဒေသခံဖြစ်ပြီး ဒေသခံပြည်သူများကို တွေ့ဆုံကူညီချင်ကြောင်းပြောဆိုကာ တိုင်းရင်းသားပေါင်းစုံအယောက် ၃၀ ခန့်ဖြင့် ရွာသို့ရောက်ရှိလာချိန် အစိုးရတပ်များလည်း လိုက်ပါခဲ့ခြင်းဖြစ်ကြောင်းသိရသည်။


အဆိုပါ ဗန်းမော်ခရိုင် ကြံ့ခိုင်ဖွံ့ဖြိုးအဖွဲ့ကို ဦးဖေါင်လားဂမ်ဖန်နှင့် မန်စီမှ ဦးကွမ်ဆန့် (Slg Kum San) တို့ နှစ်ဦး ဦးဆောင်ကာ KIA နယ်မြေတွင်းသို့ တရားဝင်ရောက်နိုင်ရန်ညှိနှိုင်းပြီး နမ်လင်းပါ ဒုက္ခသည်စခန်းသို့ ကူညီပေးရန်ရောက်လာမည်ဟုဆိုကာ ‘ဂရုဏာ’ ရိုမင်ကက်သလစ် လူမှုရေးအကူညီပေးအဖွဲ့များနှင့်အတူ ၀င်ရောက်လာခဲ့ချိန် အစိုးရတပ်များလည်း နမ်လင်းပါကို အမိအရ၀ိုင်း၍ သိမ်းပိုက်ခြင်းကိုခံလိုက်ရခြင်းဖြစ်သည်ဟု KIA တပ်ရင်းမှူးပြောသည်။

“အရင်က အစိုးရတပ်တွေက နမ်လင်းပါကို ဝင်ချင်နေတာ အစိုးရတပ်က အကြမ်းနည်းနဲ့မရလို့ သူတို့ကို ရှေ့ပြေးလုပ်ခိုင်းလိုက်တာ။ ကျနော်တို့က အစိုးရတပ်တွေပါလာမယ်မထင်ဘူး လမ်းဖွင့်ပေးလိုက်တော့ ကျနော်တို့က လုံခြုံရေးမယူတော့ဘူး သေနတ် ၁ ချက်တောင်မပစ်လိုက်ဘူး သူတို့ဝင်သွားတာ” ဟု KIA တပ်ရင်း ၁၂ တပ်ရင်းမှူး ဗိုလ်မှူးဂျွန်းအောင် ပြောသည်။

‘ဂရုဏာ’ အကူအညီပေးအဖွဲ့မှ ကူညီနေသည့် နမ်လင်းပါကျေးရွာတွင် ပြီးခဲ့တဲ့လအစောပိုင်းကတည်း က အစိုးရတပ်မှ လမ်းပိတ်လိုက်ခြင်းကြောင့် ဒေသခံ ဒုက္ခသည်များ အခက်ခဲရင်ဆိုင်နေရချိန် ထိုနေ့တွင် သွားရောက်ကူညီခွင့်ရချိန် ထိုသို့အစိုးရတပ်များပါ ဝင်ရောက်လာပစ်ခတ်တိုက်ခိုက်မှုများ ဖြစ်လာခြင်းဖြစ်သည် ဟု ဒေသခံတဦးပြောသည်။

“အစိုးရတပ်တွေက အောက်လမ်းကနေရောက်နေတယ် ကူညီရေးအဖွဲ့က လမ်းမအတိုင်းလာတယ် အစိုးရတပ်က ရွာပြင်မှာအသင့်ဝိုင်းထားလိုက်တာ ကူညီရေးအဖွဲ့တွေရွာထဲဝင်လာတာနဲ့ အစိုးရတပ်တွေ တခါတည်းဝင်တော့ ရွာသားတွေက ရုန်းရင်းခတ်ဖြစ်လာပြီး ပစ်ခတ်မှုလည်းဖြစ်လာတော့တာဝန်ရှိသူတွေက ဘော်ဒါကျောင်း သူ/သားများနဲ့ ရွာသားတွေကို မန်ကောင်ရွာကိုခြေကျင်နဲ့ညမှာ ထွက်ပြေးတိမ်းရှောင် သွားရတာပါ” ဟု နမ်လင်းပါဒေသခံတဦး KNG ကချင်သတင်းဌာန သို့ပြောသည်။

နမ်လင်းပါရွာမှ မန်ဝင်းမြို့နယ် လဂါတ်ယန် ဒုက္ခသည်စခန်းသို့ ခြေကျင်ဖြင့် ၃ ရက်ကြာသွား ရသောခရီးဖြစ်ပြီး  ရွာသားများသည် အခက်ဒုက္ခများဖြင့်ခက်ခဲမှုများစွာရင်ဆိုင်ဖြတ်သန်း၍ ကျော်ဖြတ်ခဲ့ရကြောင်း ထွက်ပြေးလာသော ဒေသခံတဦးပြောသည်။

“လမ်းမှာက အင်္ကျီအလဲအလှယ်လည်းမပါ ရေးဗူးမပါ ပိုက်ဆံလည်းမပါ ရွာထဲစစ်သားတွေ တခါထဲဝင်လာတော့ ကြောက်ပြီးပြေးလာရတော့အသက်ကြီး လမ်းမလျှောက်နိုင်တဲ့သူတွေကို ပိုးတာက ပိုး၊ အို အရမ်းဒုက္ခရောက်တယ် မိခင် ၁ ယောက်မှာ ကလေးက ၂ ယောက်ပိုး ဆွဲတာကဆွဲ အိတ်ကလွယ် အရမ်းခက်တယ် ကျောင်းသားရွာသား တွေလည်းအားလုံးပါတယ်”

ယခုချိန် ဂရုဏာအဖွဲ့မှ ကူညီပေးရန်ယူဆောင်လာသောပစ္စည်းများသည် နမ်လင်းပါဒုက္ခသည်စခန်းတွင် ရှိနေရစ်ခဲ့ပြီး ဆန်တင်ကား ၁ စင်းသည်လည်း အင်လုံဝလာ (N Lungwa La) ရွာတွင် ကားပျက်ပြီး ရှိနေကြောင်း သိရသည်။

ယမန်နေ့တွင် ကျောင်းသားအချို့ဒုက္ခသည်စခန်းသို့ ရောက်ရှိနေသော်လည်း အများစုသည် လမ်းခရီးတွင် ရှိနေဆဲဖြစ်ပြီး ကောင်းခါးပါ နှင့် ဂျေဆောန်မှ ရွာသား၁၀၀ ကျော်သည်လည်း မိုင်းခေါင်ဒုက္ခသည်စခန်းသို့ ခြေကျင်ဖြင့် ဆက်လက်ခရီးဆက်နေရကြောင်းဒေသခံများပြောသည်။

ယခုချိန် ရွာသားများထွက်ပြေးတိမ်းရှောင်သွားပြီးနောက် နမ်လင်းပါ (Nam Lim Pa) ရွာတွင် ယမန်နေ့ နိုဝင်ဘာ ၁၈ ရက်အတွင်း တိုက်ပွဲ ၃ ကြိမ်ပြင်းထန်စွာဖြစ်ပွားခဲ့ကြောင်းသိရသည်။

အစိုးရတပ်သည် KIA တပ်ရင်း (၁၂) ဒေသရှိ ရွာများတွင် အင်အားများဆက်လက်တိုးချဲ့ လှုပ်ရှားနေပြီး နှစ်ဖက်တပ်များဆက်လက်တင်းမာနေဆဲဖြစ်သည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။