Friday, November 22, 2013

ကချင်လွတ်လပ်ရေးတပ်မတော် ခေါင်းဆောင်တစ်ဦး ရန်ကုန်ခရီးနှင့် ပြည်တွင်းငြိမ်းချမ်းရေး အလားအလာ

(Mizzima)

ကချင်လွတ်လပ်ရေးတပ်မတော်၏ ဒု-စစ်ဦးစီးချုပ်တစ်ဦးဖြစ်သူ ဗိုလ်ချုပ်ဂွမ်မော် ရန်ကုန်မြို့သို့ သုံးရက်ကြာ လာရောက်ရှိခြင်းက နိုင်ငံရေးထူးခြားမှု အပြောင်းအလဲတစ်ခုဟု ရှုမြင်နိုင်ပြီး မြန်မာ့ငြိမ်းချမ်းရေးအတွက် မည်သို့အထောက်အကူဖြစ်စေမည်နည်းဟူသည့် မေးခွန်းကလည်း နောက်ဆက်တွဲ စိတ်ဝင်စားစရာ မေးခွန်းတစ်ခု ဖြစ်လာခဲ့သည်။

ဗိုလ်ချုပ်ဂွမ်မော်သည် ထိုင်းနိုင်ငံ ချင်းမိုင်မြို့တွင် မကြာမီရက်ပိုင်းအတွင်း ကျင်းပရန်ရှိသော တိုင်းရင်းသားလက်နက်ကိုင်များနှင့် နိုင်ငံရေးပါတီများ တွေ့ဆုံဆွေးနွေးပွဲသို့ တက်ရောက်ရန်အတွက် နိုင်ငံကူး လက်မှတ်လုပ်ရန် ရန်ကုန်မြို့သို့ ရောက်ရှိလာခြင်းဟု ဆိုသည်။ 


မည်သို့ပင်ဆိုစေ တိုင်းရင်းသားလက်နက် ကိုင်အဖွဲ့အစည်းကြီးတစ်ခု၏ ဦးစီးဦးဆောင် ဗိုလ်ချုပ်တစ်ဦး ရန်ကုန်မြို့သို့ ရောက်ရှိလာပြီး၊ သက်ဆိုင်သူ များနှင့် ဆွေးနွေးပွဲများ၊ အစည်းအဝေးများလုပ်ခြင်းက ငြိမ်းချမ်းရေးအတွက် အထောက်အပံ့ သို့မဟုတ် ဖြစ်ပေါ်တိုးတက်မှုတစ်ခုဟု ရှုမြင်ရမည်ဖြစ်သည်။

လက်ရှိအစိုးရအနေနှင့် ငြိမ်းချမ်းရေးဆွေးနွေးပွဲများ ဆွေးနွေးနေဆဲ ကာလတွင်ပင် လူမျိုးစုလက်နက်ကိုင် ခေါင်းဆောင်တစ်ဦးက မြန်မာနိုင်ငံ ကူးလက်မှတ်ကိုကိုင်ဆောင်ဖို့ ဆုံးဖြတ်ခြင်းသည် စစ်မှန်သော ဖက်ဒရယ် ပြည်ထောင်စုနိုင်ငံတစ်ခုအောက်တွင် အတူတကွနေထိုင်မည့် နိုင်ငံရေး ဆုံးဖြတ်ချက်ကို သိရှိရသ ဖြင့် ၀မ်းမြောက်ဝမ်းသာ ကြိုဆိုပါသည်။ မြန်မာ အစိုးရကလည်း ဗိုလ်ချုပ်ဂွမ်မော်အတွက် မြန်မာနိုင်ငံကူး လက်မှတ်အား အလျင်အမြန် ရက်ပိုင်းအတွင်း ထုတ်ပေးလိုက်သည့်အတွက်လည်း အသိအမှတ်ပြုရမည် ဖြစ်သည်။

ထို့အတူ မြန်မာနိုင်ငံကူးလက်မှတ်ကိစ်္စနှင့်တစ်ပါတည်းပင်၊ ငြိမ်းချမ်း ရေးဆွေးနွေးပွဲများအတွင်း အပြန်အ လှန် ယုံကြည်မှုတည်ဆောက်ရာတွင် လည်းကောင်း၊ အပြန်အလှန် လေးစား အသိအမှတ်ပြုရာတွင် လည်းကောင်း၊ မတူကွဲပြား ခြားနားသူအချင်းချင်း ငြိမ်းချမ်းစွာ အတူယှဉ်တွဲနေထိုင်ရေး ယဉ်ကျေးမှုအ မြင်ကိုလည်းကောင်း များစွာအထောက်အကူဖြစ်စေလိမ့် မည်ဟု မျှော်လင့်ပါသည်။

နောက်ထပ် ရှုမြင်နိုင်သည့်အချက်မှာ ပြည်တွင်းစစ်ရပ်စဲရေးအတွက် နှစ်ဖက်စလုံးက 
စိတ်အားထက်သန် နေသည်ကို ထင်ဟပ်ဖော်ပြရာလည်း ရောက်သည်။ ဤသို့သော စိတ်အားထက်သန်မှုဆိုသည်မှာ ငြိမ်း ချမ်းရေးဆွေးနွေးမှု တည်ဆောက်မှု၏ အဓိကအခြေခံလိုအပ်ချက်ကြီးတစ်ချက်ဖြစ်သည်။

ဗိုလ်ချုပ်ဂွမ်မော်သည် လူမျိုးစုတစ်မျိုး၏ ခေါင်းဆောင်တစ်ဦးဆိုသည့် တိုင်ပြည်တွင်းငြိမ်းချမ်းရေးရရှိရေး ကြိုးပမ်းမှုကြီးအတွင်း အရေးပါသော ခေါင်းဆောင်တစ်ဦးအဖြစ် ရပ်တည်ထားသူဖြစ်သဖြင့်လည်း ငြိမ်း ချမ်းရေး ကြိုးပမ်းမှုအတွက်ကြီးမားစွာ အထောက်အကူဖြစ်စေမည်သာဖြစ်သည်။

မိမိတို့နိုင်ငံတွင် ယခင် ၁၉၆၃ ခုနှစ်အတွင်းကလည်း ပြည်တွင်းစစ် ရပ်စဲရေးခေါင်းစဉ်အောက်တွင် လက် နက်ကိုင်အင်အားစုများနှင့် ဗဟိုအစိုးရတို့ တွေ့ဆုံဆွေးနွေးခဲ့ကြဖူးပါသည်။ သို့သော် ယင်းဆွေးနွေးပွဲများ မှာ အာဏာရတော်လှန်ရေး ကောင်စီအစိုးရက လက်နက်ချရေးအခြေခံအမြင်နှင့်သာ ငြိမ်းချမ်းရေးကို ချဉ်းကပ်ဖြေရှင်းခဲ့သဖြင့် ငြိမ်းချမ်းရေး ဆွေးနွေးပွဲများ ပျက်စီးခဲ့ရသည်ချည်းဖြစ်သည်။

တစ်ဖန် ၁၉၈၈ ခုနှစ်နောက်ပိုင်း စစ်အစိုးရနှင့် လူမျိုးစု လက်နက်ကိုင် အဖွဲ့အစည်းများ အပစ်အခတ်ရပ်စဲ ရေး ဆွေးနွေးဆောင်ရွက်ခဲ့သည်များ လည်း ရှိခဲ့ဖူးသည်။ သည်တုန်းကလည်း စစ်အစိုးရအနေဖြင့် စစ်မှန် သည့် အပစ်အခတ်ရပ်စဲရေး ဆောင်ရွက်ခြင်းမဟုတ်ဘဲ၊ တိုင်းရင်းသားများကြား သွေးခွဲအုပ်ချုပ်ပြီး လူမျိုးကြီးဝါဒအပေါ် အခြေခံရပ်တည်ဆောင်ရွက်ခဲ့သည်ဟု တိုင်းရင်းသားအင်အားစုများက ယူဆခဲ့ကြသည်။

အတိတ်က နှစ်ပေါင်း ၅၀ ကျော်အတွင်း ယင်းတွေ့ဆုံဆွေးနွေးမှုများသည် တိုင်းရင်းသားသွေးစည်းရေးကို ဖန်တီးပေးရာမရောက်ဘဲ တိုင်းရင်းသားအချင်းချင်း မယုံသင်္ကာဖြစ်ခြင်းဖြင့် ယုံကြည်မှုပျက်ပြားရခြင်းကို တွန်းအားပေးသလိုပင် ဖြစ်ခဲ့ရ၏။ တစ်နည်းအားဖြင့်ဆိုလျှင် ပြည်တွင်းစစ်မီးကို မီးစာထပ်ထည့်မိသည့် အဖြစ်မျိုးအထိ ဆိုးကျိုးများ သက်ရောက်ခဲ့ရသည်။

ရှစ်လေးလုံး ၂၅ နှစ်ပြည့် ငွေရတု အခမ်းအနားသို့လည်း လက်နက်ကိုင် အဖွဲ့အစည်းတချို့သည် ရန်ကုန် မြို့တွင်ကျင်းပသည့် ရှစ်လေးလုံးအခမ်း အနားသို့ တက်ရောက်ပါဝင်ဆင်နွှဲခွင့် ရခဲ့ကြသေးသည်။ လူထုသည် နှစ်ပေါင်းများစွာ မြင်ကွင်းမှ ပျောက်ကွယ်နေခဲ့ရသည့် ကျောင်းသားများ၊ တိုင်းရင်းသားခေါင်း ဆောင်များကို ပြန်လည်မြင်နိုင်ခွင့်ရခဲ့ကြ၏။

ယခုလည်း ကချင်လွတ်လပ်ရေးအဖွဲ့ခေါင်းဆောင် ဗိုလ်ချုပ်ဂွမ်မော်၏ ရန်ကုန်ခရီးစဉ်သည် မြန်မာနိုင်ငံအတွက် စစ်ပွဲတွေငြိမ်းပြီး သံလွင်ခက်ကို သယ်ဆောင်လာမည့် ငြိမ်းချမ်းရေးချိုးငှက်ခရီးစဉ်ဖြစ်မည်ဟု မျှော်လင့်ယုံကြည်မိပါသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။