Tuesday, October 29, 2013

နိုင်ငံတော်အစိုးရအနေဖြင့် နိုင်ငံရေးပြဿနာကို ရှောင်လွှဲမနေသင့်ဟု KIO ဥက္ကဋ္ဌ အထိမ်းအမှတ်နေ့တွင် ပြောကြား

(ကချင်သတင်းဌာန)

နိုင်ငံတော် အစိုးရ အနေဖြင့် နိုင် ငံရေး  ကြောင့်ဖြစ်   ပေါ်နေ သော ပြဿ နာ များ အားဖြေရှင်းရာ တွင် ရှောင် လွှဲနေခြင်းကြောင့် တိုင်းရင်းသားများနေ ထိုင်ရာဒေသတို့တွင် တော်လှန်ရေး ခရီးကြာ ရှည်နေခြင်းဖြစ်ကြောင်း ကချင်လွတ်မြောက်ရေးအဖွဲ့ KIO (၅၃) နှစ်ပြည့် အထိမ်းအမှတ်နေ့တွင် KIO ဥက္ကဋ္ဌဇောင်းဟရား မိန့်ခွန်း ပြောကြားခဲ့သည်။

“KIO အမှုဆောင်အရာရှိများအားလုံး နိုင်ငံရေးအမြင်တူညီရန် အဓိကအရေးကြီးကြောင်း၊ KIO အနေဖြင့်ပြည်တွင်းတွင်ဖြစ်ပေါ်လျက်ရှိသော ပဋိပက္ခများအားနိုင်ငံရေးဖြင့်ဖြေရှင်းရန် မျှော်လင့်ချက်ဖြင့် နိုင်ငံရေးဆွေးနွေးမှုအဆင့်ရောက်ရှိရန် ဆောင်ရွက်လျက်ရှိကြောင်း၊ အပစ်အခတ်ရပ်စဲရေးကိစ္စဆောင်ရွက်ရန်မှာ နိုင်ငံတော်အစိုးရတာဝန်ယူထားသူများ၏တာဝန်ဖြစ်သောကြောင့် တရားဝင် အပစ်အခတ်ရပ်စဲရေးအားကြေညာပြီးတိုင်းရင်းသားများနေထိုင်ရာဒေသရှိ တပ်စခန်းများအား ရုပ်သိမ်းပေးရန် တာဝန်ရှိကြောင်း” မိန့်ခွန်းတွင်ပါရှိသည်။


ထို့ပြင် တိုင်းရင်းသားလက်နက်ကိုင်တပ်ဖွဲ့ဝင်များ စုပေါင်းထားသော UNFC အနေဖြင့် ဖယ်ဒရယ် ပြည်ထောင်စုကြီး ဖြစ်ပေါ်ရန်ကြိုးပမ်းဆောင်ရွက်လျက်ရှိကြောင်း၊ တိုင်းရင်းသားလက်နက်ကိုင်များ နိုင်ငံရေးအခန်းကဏ္ဍပါဝင်ဆောင်ရွက်မှုတွင် အင်အားကြီးမားရန်မျှော်လင့်ပြီး တိုင်းရင်းသားလက်နက်ကိုင်ထိပ်သီးခေါင်းဆောင်များညီလာခံအား လိုင်ဇာမြို့တွင် ကျင်းပရန်စီစဉ်ထားကြောင်း၊ မူးယစ်ဆေးဝါးသည်လည်း အမျိုးသား ရန်သူဖြစ်ကြောင်းနှင့်ဒုက္ခသည်မိသားစုဝင်များကိုလည်း အားပေးစကားပြောကြားခဲ့သည်။

KIO ဥက္ကဋ္ဌ၏အမှာစကားတွင် KIO အဖွဲ့ဝင်မှုဆောင်အရာရှိကြီးများအား အထူးမှာကြားချက်များပါဝင်ပြီး၊ အမှန်တရားသာလျှင် အမျိုးသားလွှတ်မြောက်ရေးနည်းလမ်းဖြစ်ပြီး၊ အမှန်တရားအား ကာကွယ်ချစ်မြစ်နိုးသော စိတ်ဓာတ် အဖွဲ့ဝင်တဦးစီတွင် ထားရှိရန်လိုအပ်ပြီး၊ အမှန်တရားဘက်ရပ်တည်ရန်၊ချမှတ်ထားသော စည်းကမ်း များနှင့်အညီ တာဝန်ဝတ္တရားများအား မပျက်မကွက် အောင်မြင်စွာအကောင်အထည်ဆောင်ရွက်သွားရန် တာဝန်ရှိကြောင်းတိုက်တွန်းပြောကြားခဲ့သည်။

အဆိုပါ KIO (၅၃) နှစ်ပြည့်အခမ်းအနားကို KIO ထိန်းချုပ်နယ်မြေများနှင့် ၄င်းတို့တပ်စခန်းနေရာများတွင် အောက်တိုဘာလ (၂၅) ရက်နေ့၌ အသီးသီးကျင်းပခဲ့ခြင်းဖြစ်သည်။

KIO ဌာနချုပ်လိုင်ဇာ ပြည်သူ့ဆေးရုံ နှင့် လိုင်ဇာမနောကွင်း နှစ်နေရာတွင် ကျင်းပခဲ့ပြီး အစီစဉ်တွင် အမျိုးသား အလံအား အရိုအသေပြု ဦးညွှတ်ခြင်း၊ လူမျိုးအတွက်အသက်စွန့်သွားသော သူရဲကောင်းများအား အရိုအသေပြု ဦးညွှတ်ခြင်းနှင့် ဥက္ကဋ္ဌ မိန့်ခွန်းအားကြားနာခဲ့ကြောင်းတက်ရောက်သူဒေသခံများပြောသည်။

KIO အထိမ်းအမှတ်နေ့ဖြစ်ပေါ်လာခြင်းသည် ၁၉၆၀ ခုနှစ်၊ အောက်တိုဘာ (၂၅) နေ့တွင် ရှမ်းပြည်မြောက်ပိုင်း လာရှိုးမြို့ KIO ပိုင်နေအိမ်၌ မြစ်ကြီးနား၊ ဗန်းမော်၊လာရှိုး၊ ကွတ်ခိုင်၊ ဆင်လီ၊ ရန်ကုန်နှင့် မန္တလေးမှ တက္ကသိုလ်ကျောင်းသားများစုပေါင်းပါဝင်ပြီးဖွဲ့စည်းထားကာ အဖွဲ့၏ လုပ်ငန်းများအား ထိုအချိန်မှ စတင်ဆောင်ရွက်ခဲ့ကြောင်း သိရသည်။

ထို့ပြင် KIO (၅၃)နှစ်ပြည့်အထိမ်းအမှတ်နေ့အခမ်းအနားအား ပါဂျော်ဘွမ်၊ အလဲန့်ဘွမ်ကျောင်း၊ လိုင်ဇာမနောကွင်း၊ ဝေကြိုင်၊ လိုင်ဇာပြည်သူ့ဆေးရုံ၊ မုန်လိုင်ခက် (Munglai Hkyet)၊ မုန်ဆိုင်ယန်၊ ဂျာထူဘွမ်နှင့် ဒုက္ခသည် စခန်းများရှိရာ ဂျေယန့်စခန်းနှင့် ဖွန်လွမ်ယန်စခန်းတို့တွင်လည်း အသီးသီး အခမ်းအနားကျင်းပခဲ့ကြောင်းသိရသည်။

လိုင်ဇာမြို့မနောကွင်းတွင် ကျင်းပသောအခမ်းအနားသို့ KIO ဌာနဆိုင်ရာသီးသီးမှ တာဝန်ရှိ ပုဂ္ဂိုလ်များနှင့် ဒေသခံ ရပ်မိရပ်ဖများ၊ ဒုက္ခသည်ပြည်သူများ (၆၀၀)ခန့် တက်ရောက်ခဲ့ကြောင်း သိရသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။