Tuesday, October 15, 2013

အစိုးရတပ်များ KIA စခန်းသို့ အင်အားတိုးချမှုများရှိနေဆဲ

(ကချင်သတင်းဌာန)

ကချင်လွတ်မြောက်ရေးအဖွဲ့ (KIO) နှင့် အစိုးရငြိမ်ချမ်းရေး ကိုယ်စားလှယ် များ ဆွေးနွေးမှုအပြီး အစိုးရတပ်ဖက်မှ KIA တပ်မဟာ (၃)၊ တပ်မဟာ (၄) နယ်မြေများသို့ စစ်အင်အားဖြည့်ခြင်းများ ရှိနေဆဲဖြစ်ကြောင်း သိရသည်။

အောက်တိုဘာ ၁၃ ရက်ညနေတွင် လားရှိုးမှ အစိုးတပ်သည် စစ်ကား ၆ စင်းဖြင့် KIA တပ်မဟာ (၄) နယ်မြေသို့ တိုးချဲ့လာရာ စစ်ကား ၂ စင်းတွင် ၆၀ မမ လက်နက်ကြီး ၁ ခုစီတင်ကာ ၁ စင်းတွင် ကွတ်ခိုင်ဗျူဟာသို့ဖြည့်ထားပြီး၊ ကျန် ၃ စင်းသည် စင်လီနှင့် ကွန်လွန် စခန်းသို့ ဖြည့်ထားကြောင်း တပ်မဟာ (၄) မှ အမည်မဖော်လိုသူ အရာရှိတဦးပြောသည်။


ထို့အတူ အောက်တိုဘာ ၁၂ ရက်တွင် KIA တပ်မဟာ (၃) နယ်မြေ မန်းဝင်းသို့ စစ်ကား ၇ စင်းနှင့် ၁ စင်းတွင် မြင်း ၄ ကောင်တင်ကာ လားရှိုး- မူဆယ်- နမ့်ခမ်းမှ တိုးချဲ့လာကြောင်း သိရသည်။

၎င်းအစိုးရတပ်သည် သိန္ဒီမြို့ အခြေစိုက် စခက (၁၆) မှဖြစ်ပြီး အင်အား ၁၀၀ ကျော်ရှိကာ KIA တပ်ရင်း (၂၇) ရှိသည့် ကိုင်ထိပ်စခန်းသို့တိုးချဲ့ထားခြင်းဖြစ်ကြောင်း သိရသည်။

ထို့သို့ဖြင့် ယခုချိန် တပ်ရင်း (၂၇)နှင့် (၁၂) ဒေသများတွင် စစ်အင်အား ၁၀၀၀ ကျော်ဖြင့် တိုးချဲ့ထား သည်ဟု KIA ဖက်မှသိရသည်။

စစ်ရေးလှုပ်ရှားမှုများနှင့်ပတ်သက်၍ အစိုးရနှင့် ကချင်လွတ်မြောက်ရေးအဖွဲ့ (KIO) ကြား ကြားဝင်စေ့စပ်ညှိနှိုင်းဆောင်ရွက်ပေးနေသည့် ငြိမ်းချမ်းရေးအကျိုးတော်ဆောင် PCG အဖွဲ့က လတ်တလော စစ်ရေးတင်းမာမှုများမရှိသော်လည်းလှုပ်ရှားမှုများကြားသိနေရသည်ဟု ဦးလမိုင်ဂွမ်ဂျာ KNG ကချင်သတင်းဌာန သို့ပြောသည်။

“တိကျတော့ မပြောနိုင်ဘူး ဒီ KIA တပ်မဟာ (၃)နဲ့ (၄) တွေမှာ စစ်အင်အားတွေ တိုးချဲ့နေတယ်ဆိုတာ တော့ ကြားနေတယ်”

ထိုသို့ ရှေ့တန်းတွင် စစ်ရေးတိုးချဲ့မှုများရှိနေသော်လည်း နှစ်ဖက်တပ်များကြား တင်းမာမှုမရှိပဲ အခြေအနေငြိမ်သက်နေဆဲဖြစ်ကြောင်း သိရသည်။

အစိုးရနှင့် KIO ကြား အောက်တိုဘာလ ၈၊ ၉၊ ၁၀ တွေ့ဆုံဆွေးနွေးပွဲသည် ရလဒ်ကောင်းသည်ဟု ပြောဆိုမှုရှိနေချိန် တဖက်တွင် ထိုသို့ စစ်အင်အားတိုးချဲ့မှုများက ဆက်လက်ရှိနေခြင်းလည်းဖြစ်သည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။