Wednesday, October 16, 2013

အရေးကြီးလာသည့် မြန်မာ့နိုင်ငံရေးအခြေအနေ

(Ven Ravika)

ဖွဲ့စည်းပုံအခြေခံဥပဒေ

မြန်မာနိုင်ငံပြဿနာသည် ဖွဲ့စည်းပုံအခြေခံဥပဒေပြဿနာ ဖြစ်သည်။ အတည်ပြုခဲ့သည့် ဖွဲ့စည်းပုံ(၃)မျိုးတွင် လက်ရှိဖွဲ့စည်းပုံသည် စစ်တပ်ကို အာဏာအများဆုံးပေးထားပြီး ပြင်ဆင်ရန် မလွယ်ကူသည့် ဖွဲ့စည်းပုံကြီး ဖြစ်သည်။ ၂၀၁၃-ခုနှောင်းပိုင်းတွင် ၂၀၀၈-ဖွဲ့စည်းပုံကို ပြင်ရေးဖို့သော်လည်းကောင်း၊ ပြန်ရေးဖို့သော်လည်းကောင်း အားပြိုင်မှုများ ပြင်းထန်လာမည်ဖြစ်ပြီး ၂၀၁၄-ခုနှစ်တွင် Democratic Federation of Burma ဖွဲ့စည်းပုံတစ်ခု ပေါ်ထွက်လာမည်ဟု ယူဆရသည်။


လက်ရှိအချိန်တွင် ဖွဲ့စည်းပုံအခြေခံဥပဒေကို မဆုတ်မနစ် ပြင်သွားရန် အမျိုးသားဒီမိုကရေစီအဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်က သန္နိဋ္ဌာန်ချထားသည်။ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီအထွေထွေအတွင်းရေးမှူးဦးဌေးဦးသည်ကား ပြင်ဆင်စရာ သိပ်မရှိဟု ပြောဆိုခဲ့သည်။ မကြာခင်က လုပ်ခဲ့သည့် ဖွဲ့စည်းပုံပြင်ရေးမြန်မာ့ရုပ်သံစကားပြောခန်းတွင် အစိုးရအာဘော်ဟု ယူဆနိုင်သည့် ဆွေးနွေးတင်ပြချက်များကို နားထောင်ရသည်။ ဖွဲ့စည်းပုံကို အသစ်ပြန်ရေးလျှင် စစ်တပ်က အာဏာပြန်သိမ်းနိုင်သည့်အထိ အန္တရာယ်များပြီး တပ်မတော်သား(၂၅)ရာခိုင်နှုန်းကို မထိပါးဘဲ အခြားလိုအပ်သည့် အချက်များကို ပြင်ဆင်ခြင်းသည်သာ လက်တွေ့ကျပြီး ဘေးရန်ရှင်းမည်ဟု သိရသည်။


တစ်နိုင်ငံလုံးအပစ်ရပ်ရေး

တစ်နိုင်ငံလုံးအပစ်ရပ်ရေးလက်မှတ်ထိုးပွဲကို တက်ရောက်ရမည်ဟု အစိုးရက အကြပ်ကိုင်သည့်အတွက် ညီညွတ်သော တိုင်းရင်းသားလူမျိုးများဖက်ဒရယ်ကောင်စီ (UNFC) က တိုင်းရင်းသားတော်လှန်ရေးအဖွဲ့အစည်းအားလုံးကို စုစည်း၍ ဤလကုန်တွင် KIO ဌာနချုပ် လိုင်ဇာမြို့၌ တစ်နိုင်ငံလုံးအပစ်ရပ်ရေးကို အကျေအလည် ညှိုနှိုင်းဆွေးနွေးကြမည်ဟု သိရသည်။ ဝမ်းမြောက်ဖွယ်ကောင်းသည်မှာ UNFC အဖွဲ့ဝင်မဟုတ်သော ရှမ်းပြည်ပြန်လည်ထူထောင်ရေးကောင်စီ (RCSS)၊ ဝပြည်သွေးစည်းညီညွတ်ရေးပါတီ (UWSP)၊ ရခိုင်ပြည်လွတ်မြောက်ရေးပါတီ (ALP)၊ ဒီမိုကရေစီအကျိုးပြုကရင့်အမျိုးသားတပ်မတော် (DKBA) အဖွဲ့တို့လည်း တက်ရောက်ကြမည်ဟု သိရခြင်းဖြစ်သည်။

တစ်နိုင်ငံလုံးအပစ်ရပ်ရေးနှင့် ပတ်သက်၍ တိုင်းရင်းသားတော်လှန်ရေးအဖွဲ့အစည်းအားလုံးသည် တစ်သံတည်းထွက်၍ သွေးစည်းညီညွတ်ကြောင်း ပြသကြမည်ဖြစ်သည်။ တစ်ဖွဲ့ချင်းသာ ဆက်ဆံလိုသော အစိုးရ၏ မူဝါဒကို အလိုမကျကြောင်းလည်း ပြသခဲ့ပြီဖြစ်သည်။ ပို၍ ပြတ်သားသည်မှာ တစ်နိုင်ငံလုံးအပစ်ရပ်ပွဲ၌ နိုင်ငံတော်ကာကွယ်ရေးနှင့်လုံခြုံရေးကောင်စီဝင်များ ပါဝင်လက်မှတ်ထိုးကြရမည်၊ နိုင်ငံတကာအသိသက်သေများ၊ ပြည်သူ့ခေါင်းဆောင်များက အသိသက်သေများအဖြစ်ဖြင့် ပါဝင်ကြရမည်၊ ဖက်ဒရယ်ပြည်ထောင်စုကို ထူထောင်မည်ဖြစ်ကြောင်း သဘောတူရမည်ဟု တောင်းဆိုထားခြင်းဖြစ်သည်။ တိုင်းရင်းသားတော်လှန်ရေးအဖွဲ့အစည်းများ၏ လိုလားချက်ကို လိုက်လျောနိုင်လျှင် တစ်နိုင်ငံလုံးအပစ်ရပ်ပွဲ ဖြစ်မြောက်မည်ဖြစ်ပြီး မလိုက်နာနိုင်လျှင် ပျက်ပြားမည်ဖြစ်ကြောင်း အတိအလင်း အကြောင်းကြားခဲ့ပြီဖြစ်သည်။


အရေးကြီးလာသည့် မြန်မာ့နိုင်ငံရေးအခြေအနေ

၁။ အတိုက်အခံများက ဖွဲ့စည်းပုံပြင်ဖို့ ကြိုးစားလာချိန်၊ တိုင်းရင်းသားတော်လှန်ရေးအဖွဲ့အစည်းများက တစ်နိုင်ငံလုံးအပစ်ရပ်ပွဲအတွက် အင်အားစုစည်းချိန်၊ မြန်မာတပ်မတော်က တိုင်းရင်းသားလူမျိုးများနှင့်အတိုက်အခံများကို လိုချင်သည်များအားလုံးကို လိုက်လျောပေးမည်မဟုတ်ကြောင်း တင်းနေချိန် ဖြစ်ရာ တြိဂံအားပြိုင်မှုကို တွေ့ရှိရသည်။ (ဒေါ်အောင်ဆန်းခင်းသည့် ပြုပြင်ပြောင်းလဲရေး)

၂။ ဒေါ်အောင်ဆန်းစုကြည်၊ ဦးသိန်းစိန်၊ ဦးဌေးဦး၊ သူရရွှေမန်းတို့၏ အရိပ်အကဲကို ကြည့်လျှင် အကြပ်အတည်းတစ်ခု ဖြစ်မည်ကို ခွင့်ပြုမည်မဟုတ်ဘဲ အသက်ငင်နေသည့် ဖွတ်ပါတီဝင်အချို့၊ စစ်ခေါင်းဆောင်ဟောင်းအချို့သာ မတည်မငြိမ်ဖြစ်အောင် လုပ်မည်ဖြစ်သည်။ ဤပုဂ္ဂိုလ်ကျော်တို့၏ နောက်၌ ကာချုပ်မင်းအောင်လှိုင် မရှိခဲ့လျှင် မြန်မာနိုင်ငံကံကောင်းသေးသည်ဟု ဆိုရမည်။ (နှစ်ပေါင်း ၅၀-ကျော် စစ်အုပ်ချုပ်ရေး)

၃။ တိုင်းရင်းသားတော်လှန်ရေးအဖွဲ့အစည်းများအနေဖြင့် စစ်ရေးထက် နိုင်ငံရေးလမ်းကြောင်းကို ဦးစားပေးရန် ဆုံးဖြတ်ထားကြသည်။ သမ္မတဦးသိန်းစိန်နှင့် ဒေါ်အောင်ဆန်းစုကြည်တို့၏ ပြုပြင်ပြောင်းလဲမှုအစီအစဉ်ကို မျှော်လင့်ချက်ထားကြသေးသဖြင့် မြန်မာစစ်တပ်ပြုသမျှကို သည်းညဉ်းခံကာ ပူးပေါင်းပါဝင်ချင်သည့်အနေအထား ရှိသည်။ အကယ်၍ မျှော်လင့်ချက်ကုန်ဆုံးခဲ့လျှင် နယ်စပ်ဒေသများတွင် မြန်မာ့တပ်မတော် ရပ်တည်၍ မရအောင် ထိုးစစ်များ ဆင်လာနိုင်သည်။ (နှစ်ပေါင်း(၆၀)ကျော် ပြည်တွင်းစစ်)

မြန်မာ့နိုင်ငံရေးအလှည့်အပြောင်းဖြစ်နိုင်သည့်ကာလ ဖြစ်၍ အရေးကြီးသကဲ့သို့ စိတ်ဝင်စားစရာလည်း ကောင်းလှသည်။ ဒေါ်အောင်ဆန်းစုကြည် ယုံကြည်ခဲ့သည့် နိုင်ငံရေးလမ်းကြောင်း မှန်မမှန်၊ မရှိစေချင်သည့် စစ်အုပ်ချုပ်ရေး ဆက်ရှိမရှိ ၊ ပြီးစေချင်လှသည့် ပြည်တွင်းစစ် ပြီးမပြီး... စောင့်မျှော်ကြည့်ရှုကြပါကုန်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။