Friday, October 11, 2013

တိုင်းရင်းသား လက်နက်ကိုင် အဖွဲ့များ ထိပ်သီးညီလာခံ ကချင်ပြည်နယ် လိုင်ဇာမြို့တွင် ကျင်းပမည်

(Eleven Media Group)

နိုင်ငံလုံးဆိုင်ရာ အပစ်အခတ်ရပ်စဲရေး သဘောတူ လက်မှတ်ရေးထိုးပွဲ မကျင်းပမီ ကချင်ပြည်နယ် လိုင်ဇာမြို့တွင် တိုင်းရင်းသား လက်နက်ကိုင် အဖွဲ့များအားလုံး ပါဝင်သည့် တိုင်းရင်းသား လက်နက်ကိုင် အဖွဲ့ခေါင်းဆောင်များ ညီလာခံ (Ethnic Armed Groups Conference) ကို ကချင်ပြည်နယ် လိုင်ဇာမြို့တွင် ကျင်းပသွားမည် ဖြစ်ကြောင်း မြစ်ကြီးနားမြို့တွင် ကျင်းပခဲ့သည့် သုံးရက်ကြာ ပြည်ထောင်စုအဆင့် ငြိမ်းချမ်းရေး ဆွေးနွေးပွဲ သဘောတူညီချက်များမှ သိရသည်။

 
ကချင်ပြည်နယ် မြစ်ကြီးနားမြို့တွင် ကျင်းပခဲ့သော ပြည်ထောင်စုအဆင့် ငြိမ်းချမ်းရေး ဆွေးနွေးပွဲတွင် ကေအိုင်အို ကိုယ်စားလှယ် အဖွဲ့မှ ယခုကဲ့သို့ တောင်းဆိုခဲ့ခြင်းဖြစ်ပြီး ပြည်ထောင်စု အစိုးရမှ ကြီးမှူးကျင်းပရန် စီစဉ်နေသည့် နိုင်ငံလုံးဆိုင်ရာ အပစ်အခတ်ရပ်စဲရေး သဘောတူ လက်မှတ်ရေးထိုးပွဲ မတိုင်မီ တိုင်းရင်းသား ခေါင်းဆောင်များ တွေ့ဆုံပြီး တောင်းဆိုရမည့် အချက်အလက်များ ညှိနှိုင်းရန်ဖြစ်ကြောင်း ကေအိုင်အေ ဒု-စစ်ဦးစီးချုပ် ဗိုလ်ချုပ် ဂွမ်မော်က ပြောကြားသည်။

''တိုင်းရင်းသား လက်နက်ကိုင် အဖွဲ့အစည်းက ခေါင်းဆောင်တွေနဲ့ တွေ့ဆုံဖို့ တောင်းဆိုထားပါတယ်။ ရည်ရွယ်ချက်ကတော့ ပြည်ထောင်စု အစိုးရက ကျင်းပဖို့ ရည်ရွယ်ထားတဲ့ Nationwide cease-fire accord ဆိုတဲ့ သူတို့ပေးတဲ့ စီမံချက် အပေါ်မှာ ကျွန်တော်တို့ ဘယ်လိုပါဝင်နိုင်မလဲ။ ဘာတွေကို တောင်းဆိုသင့်သလဲ ဆိုတာတွေကို အဓိကထားပြီး ဆွေးနွေးဖို့ ဖြစ်ပါတယ်'' ဟု ၎င်းက ပြောကြားသည်။

ကေအိုင်အို အနေဖြင့် အဆိုပါ ဆွေးနွေးပွဲပြီးမှသာ အပစ်အခတ် ရပ်စဲရေးအတွက် လက်မှတ်ရေးထိုး သွားဖွယ်ရှိပြီး အစိုးရမှ စီစဉ်ထားသည့် အပစ်အခတ် ရပ်စဲရေးနှင့် ပတ်သက်သည့် စီမံချက်များကို လေ့လာပြီးမှသာ လက်မှတ်ထိုး မထိုးကို ဆုံးဖြတ်သွား မည်ဟု သိရသည်။

အစိုးရနှင့် ကေအိုင်အိုတို့သည် အလွတ်သဘော လေးကြိမ် အပါအ၀င် စုစုပေါင်း ၁၅ ကြိမ် တွေ့ဆုံခဲ့သော်လည်း ယခုအချိန်အထိ အပစ်အခတ် ရပ်စဲရေးအတွက် လက်မှတ်ရေးထိုးနိုင်ခြင်း မရှိသေးပေ။

ကေအိုင်အို အနေဖြင့် အပစ်အခတ် ရပ်စဲရေးအတွက် လက်မှန်ရေးထိုးရန်မှာ ယုံကြည်စိတ်ချရနိုင်သော အခြေအနေမျိုး ရှိရန်လိုအပ်သည်ဟု ဆုံးဖြတ်ထားသည့် ကေအိုင်အို၏ မူဝါဒကြောင့် ဖြစ်သည်ဟု ဗိုလ်ချုပ်ဂွမ်မော်က ဆိုသည်။

လိုင်ဇာတွင် ပြုလုပ်မည့် တိုင်းရင်းသား လက်နက်ကိုင် အဖွဲ့ခေါင်းဆောင်များ ညီလာခံအား ကျင်းပမည့် အချိန်ကို သတ်မှတ်ရခြင်း မရှိသေးဘဲ တိုင်းရင်းသား လက်နက်ကိုင် အဖွဲ့ခေါင်းဆောင်များထံ ဖိတ်ကြားရသည်မှာပင် အချိန်တစ်လခန့် ကြာမြင့်နိုင်ကြောင်း ကေအိုင်အေ အဆင့်မြင့် အရာရှိတစ်ဦးက ပြောကြားသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။