Sunday, September 15, 2013

နိုင်ငံလုံးဆိုင်ရာ အပစ်ရပ် စာချုပ်တွင် လက်မှတ်မထိုးသည့် တိုင်းရင်းသား လက်နက်ကိုင် အဖွဲ့များ နိုင်ငံရေးဆွေးနွေးပွဲ၌ ပါဝင်နိုင်ရေး အဆင့်တိုင်းတွင် လမ်းဖွင့်ပေးမည်ဟု ၀န်ကြီးဦးအောင်မင်းက UNFC အား ရှင်းပြ

(Eleven Media Group)

နိုင်ငံလုံးဆိုင်ရာ အပစ်ရပ်စာချုပ်တွင် အကြောင်းအမျိုးမျိုးကြောင့် လက်မထိုးနိုင်သည့် တိုင်းရင်းသားလက်နက်ကိုင် အဖွဲ့များ နိုင်ငံရေးဆွေးနွေးပွဲ၌ ပါဝင်နိုင်ရေး အဆင့်တိုင်းတွင် လမ်းဖွင့်ပေးမည်ဟု ပြည်ထောင်စု ငြိမ်းချမ်းရေး လုပ်ငန်းကော်မတီ ဒုတိယဥက္ကဋ္ဌ ပြည်ထောင်စုဝန်ကြီး ဦးအောင်မင်းက ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC)နှင့် စက်တင်ဘာ ၈ ရက်က ထိုင်းနိုင်ငံ ချင်းမိုင်မြို့၌ တွေ့ဆုံစဉ် ရှင်းပြခဲ့သည်ဟု Myanmar Peace Center မှ အကြီးတန်းအကြံပေး ဦးလှမောင်ရွှေက ဆိုသည်။

 
တိုင်းရင်းသားလက်နက်ကိုင် အဖွဲ့အားလုံး တောင်းဆိုနေသည့် နိုင်ငံရေး ဆွေးနွေးပွဲသို့ သွားနိုင်ရေးအတွက် အောက်တိုဘာလတွင် တစ်နိုင်ငံလုံး အပစ်အခတ် ရပ်စဲရေးဆိုသည့် ကဏ္ဍ၊ နိုင်ငံရေး ဆွေးနွေးပွဲကို ပြင်ဆင်သည့် Framework Meeting ကဏ္ဍများနှင့် ပတ်သက်ပြီး လိုအပ်သည့် ညှိနှိုင်းမှုများကို အစိုးရ Technical Team နှင့် KNU  RCSS အဖွဲ့တို့၏ Technical Team များ တွေ့ဆုံဆွေးနွေးမှု ငါးကြိမ်ပြုလုပ်ပြီးဖြစ်ပြီး ဆွေးနွေးပွဲ ရလဒ်များကို ရှမ်း၊ ကချင်လက်နက်ကိုင် အဖွဲ့များမှ ကျန်တိုင်းရင်းသား လက်နက်ကိုင် အဖွဲ့များသို့ ပြန်လည်ရှင်းပြသွားမည်ဟု သိရသည်။

အနည်းငယ်ကတော့ ထိုးချင်မှလည်း ထိုးမယ်။ ဒါပေမဲ့ သူတို့ကိုလည်း ဖိတ်မယ်။ အဲဒါပြီးရင် မူဘောင်ကို ဆက်တက်မယ်။ ဒီကြားထဲမှာ လက်မှတ်ထိုးမယ် ဆိုရင်လည်း ထိုးလို့ရတယ်။ မထိုးလည်း အဆင့်တိုင်းမှာ ဖိတ်မယ် . . . . .

"ကျွန်တော်နားလည်တာက နိုင်ငံတော်သမ္မတ ဦးဆောင်တဲ့ ဗဟိုကော်မတီနဲ့ လုပ်ငန်းကော်မတီက နောက်သွားမယ့် အဆင့်သည် နိုင်ငံရေး ဆွေးနွေးမှုပဲ။ နောက်သွားမယ့် နိုင်ငံရေး ဆွေးနွေးပွဲကို ဖြစ်မြောက်ဖို့အတွက် ဖြတ်သန်းသွားရမယ့် အဆင့်က တစ်နိုင်ငံလုံး အပစ်အခတ် ရပ်စဲမှုနဲ့ မူဘောင်ဆွေးနွေးပွဲဆိုတာ ရှိတယ်" ဟု ဦးလှမောင်ရွှေက ပြောကြားသည်။

"၀န်ကြီးဦးအောင်မင်းက ရှင်းပြတာက အောက်တိုဘာမှာ လက်မှတ်ထိုးတဲ့သူတွေ ရှိမယ်။ အနည်းငယ်ကတော့ ထိုးချင်မှလည်း ထိုးမယ်။ ဒါပေမဲ့ သူတို့ကိုလည်း ဖိတ်မယ်။ အဲဒါပြီးရင် မူဘောင်ကို ဆက်တက်မယ်။ ဒီကြားထဲမှာ လက်မှတ်ထိုးမယ် ဆိုရင်လည်း ထိုးလို့ရတယ်။ မထိုးလည်း အဆင့်တိုင်းမှာ ဖိတ်မယ်ဆိုတဲ့ အယူအဆမျိုးကို ၀န်ကြီးဦးအောင်မင်းကနေပြီးတော့ UNFC ကို ရှင်းပြတယ်။ အဆင့်တိုင်း အဆင့်တိုင်းမှာ အမြဲတမ်း တံခါးဖွင့်ထားမယ် ဆိုတာပဲ" ဟု ၎င်းကပြောကြားသည်။

လက်ရှိအချိန်တွင် အစိုးရနှင့် တိုင်းရင်းသား လက်နက်ကိုင်အဖွဲ့ ၁၄ ဖွဲ့နှင့် အပစ်ရပ်စဲရေး သဘောတူညီမှု ရရှိထားပြီး ကချင်လွတ်မြောက်ရေးအဖွဲ့(ကေအိုင်အို)နှင့် ပလောင်လွတ်မြောက်ရေးတပ်ဦး/တအာင်းအမျိုးသား လွတ်မြောက်ရေး တပ်မတော် (PSLF/TNLA)တို့နှင့် ဆွေးနွေးနေကြောင်း သိရသည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။