Sunday, September 15, 2013

Laiza, Woi Chyai Bum Hta Udang Shagrau Poi Galaw

(Kachinnet)

2013 ning September (14) ya shani Wunpawng Mungdan Shanglawt Hpung a uphkang ginra rai nga ai Laiza Woi Chyai U Dang Bum hta Chyoi Pra Ai Udang Shagrau Poi hpe galaw ai lam chye lu ai.

Udang shagrau poi hpe (11:30)am aten kaw nna (3:00)pm aten daram du hkra galaw ai. Ndai poi hta Laiza Muklum, Pajau, Je Yang hpyen yen dabang, Hpunlum Yang hpyen yen dabang, Lahkawng Pa hpyen yen dabang na nawku hpung masha ni, IDP jawngma ni, Wunpawng Mungdan Shanglawt Hpung Ningbaw Kaba hte Ginjaw Komiti Salang ni, magam gun ni yawng marai (2000) daram sa du akyu hpyi ai lam hpe chye lu ai.


Udang shagrau poi hta madung hku nna akyu hpyi ai lam gaw sa du ai masha hkum ngau shagu, wuhpung wuhpawng shagu a matu mara raw kyu hpyi ai lam, KIO Ginjaw Salang ni hte KIO a mungmasa lahkam sa wa ai lam hta Karai Kasang lawm ya nga na matu, Laiza Muklum gaw Karai Kasang bau sin ai shingnip n pu e ngwi pyaw simsa ai hte rawt jat galu kaba wa lu u ga matu, Myu hte Mungdan a matu magam gun nga ai magam gun kaji kaba yawng laklai ai shaman chyeju lu la u ga matu, hpyen yen ni a matu garum madi shadaw ya nga ai wuhpung wuhpawng ni a matu, Laiza Jau Ginwang rawt galu kaba wa na matu, Myu hte Mungdan a matu asak apnawng mat wa sai share shagan ni a wenyi lam hte ngam nga ai dum nta masha ni a matu, Udang bum gawgap byintai wa lu hkra shakut lawm ai wuhpung wuhpawng, nawku hpung ni hte garum gahtau ya lawm ai ni a matu myithkrum myitra rai akyu hpyi hpawng hpe wu wu di di hte galaw ai lam chye lu ai.

Ndai Udang shagrau poi hta sa du akyu hpyi la ai ni gaw machyi makaw byin nga ai kaw na mai tsai wa lu na matu, Jawngma ni laika san poi ni hta ningtawn ai hte awng lu nna hpaji chye ai hte amyu hpe lam woi lu ai myutsaw ramma ni byin tai wa lu na matu, myu hte mungdan a matu magam gun nga ai share ninghkring ni ngwi pyaw hkam ja lam a matu hte hkrat sum mat wa sai share shagan ni a matu, munghpawm mungdan ngwi pyaw simsa wa lu na matu sa du akyu hpyi ai ni law nga ai hpe chye lu ai.












No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။