Wednesday, September 4, 2013

ဂျေယန့်ဒုက္ခသည်စခန်းကျောင်းကို ပညာသင်စနစ်ပြောင်းလဲ၍ အရည်အသွေးမြင့်မားအောင် ဆောင်ရွက်နေ

(KNG)

ကချင် လွတ်မြောက်ရေး အဖွဲ့ KIO ဌာနချုပ် နယ်မြေရှိ ဂျေယန့် ဒုက္ခသည် စခန်းကျောင်း တွင် ပညာရေး စနစ်သစ် များ ပြောင်းလဲ ကျင့်သုံးခြင်း အားဖြင့် လာမည့် ၂၀၁၅-၂၀၁၆ ပညာသင်နှစ် တွင် လက်ရှိ မြန်မာနိုင်ငံ အတွင်းရှိ ကျေး လက်တောင်ပေါ်ဒေ သ ဖွံ့ဖြိုးရေး စီမံကိန်း ကျောင်းများ၏ ရှေ့ဆုံးတွင်နေရာယူသွားနိုင်မည် ဟု မျှော်လင့်ထားကြောင်း ဂျေယန့်စခန်း ကျောင်းအုပ်ဆရာကြီး ဦးခွန်ဆန့် က ပြောသည်။

ယခုအချိန်တွင် ပညာရည်အဆင့်မြင့်မား တိုးတက်ကောင်းမွန်လာရေး နည်းလမ်းများပေါင်းစုံကို ကျင့်သုံးဆောင်ရွက် လျက်ရှိပြီး၊ မြန်မာနိုင်ငံ၏မူလတန်းသင်ခန်းစာ သင်ရိုးညွှန်းတမ်းစနစ် ပြုပြင်ပြောင်းလဲမှုမရှိပါက မိမိတို့၏ လုပ်ဆောင်ချက်များ အောင်မြင်မည်ဟု ယုံကြည်ထားကြောင်း ဆရာကြီးဦးခွန်ဆန့်ပြောသည်။

“တကယ်လက်တွေ့စတင် အကောင်အထည်နေပါပြီ ဆရာတွေကိုယ်တိုင် စခန်းအိမ်တိုင်းမှာ လိုက်ပြီး ကလေးတွေ စာဖတ်ဖို့ တိုက်တွန်းတာမျိုး၊ စခန်းအိမ်ရပ်ကွက်တိုင်းမှာ ‘ပညာရေးဆိုင်ရာ အထူးပြုမိဘအသင်း’ ဆိုပြီး ကျောင်းကော်မတီ ဖွဲ့စည်းထားတယ်။ တကယ်ထိရောက်တာတွေ့ရတယ်။ ကျောင်းမှာလည်း ကျောင်းသားဦးရေ များတော့ ထိန်းချူပ်နိုင်အောင် သူငယ်တန်း၊ ပထမတန်း၊ ဒုတိယတန်း ကျောင်းသားတွေကို တာဝန်ယူဖို့ဆရာတစ်ဦးစီခန့်ထားတယ်။ တတိယတန်းနဲ့ စတုတ္ထတန်း တစ်ဦး၊ နောက်မူလတန်း ကျောင်းသား အားလုံးကို တာဝန်ယူစောင့်ကြည့်တဲ့ဆရာတစ်ဦးဆိုပြီး အသီးသီးခန့်အပ်ထားတယ်။ ဘာသာရပ်အလိုက်တာဝန်ယူတဲ့ ဆရာအသီးသီးအပါအဝင်၊ တခြားစခန်းတွေနဲ့မတူအောင် ပညာရေးကိုကြိုးစားနေပါတယ်။”

ထို့ပြင် ဂျေယန့်စခန်းကျောင်းတွင် ကျေးလက်ဒေသပေါင်း (၅၀)ကျော်မှ ကျောင်းသားများကို စုပေါင်းထားခြင်းဖြစ်ကာ ၂နှစ်ကာလအတွင်းကျောင်းသားများ၏ ပညာအရည်အချင်းများ တိုးတက်လာခြင်းရှိသည် ဟုသိရသည်။

“တစ်ဖက်က ကြည့်ရင်ပညာအရည်အချင်းတိုးတက်လာတယ်လို့ ယူဆနိုင်တယ်။ ကျေးလက်၊ ကျေးရွာမှာ ပေါ့ ပေါ့ဆဆနဲ့ ပညာသင်နှစ်ကိုဖြတ်သန်းနိုင်တယ်။ မအောင်မနေရ စနစ်တွေနဲ့ အောင်ပေးလိုက်တာတို့ ရှိတယ်။ KIO အစိုးရ ဒေသကျောင်း၊ မြန်မာအစိုးရဖွံ့ဖြိုးရေးကျောင်းတွေကနေရွှေ့ပြောင်းလာတဲ့ ကျောင်းသားပေါင်းစုံကို ကြည့်လိုက်တော့ ဘယ်ကျောင်းမှာ ဘယ်လိုသင်ကြားတယ်ဆိုတာကို ကျွန်တော်တို့ သိနိုင်တယ်။ ဒါကြောင့်ကလေးတွေရဲ့ အခြေအနေကို ကြည့်ပြီး သင်ရိုးညွှန်တမ်းစနစ်တွေ အပတ်တိုင်းမှာအသစ် ထုတ်လေ့လာပြီး သင်ကြားနေတယ်” ဟု ဆရာကြီးခွန်ဆန့်က KNG ကချင်သတင်းဌာသို့ပြောသည်။

ထို့ကြောင့်  ပညာရည်တိုးတက် မြင့်မားအောင် ရှေ့ဆုံးမှနေရာယူ ဆောင်ရွက်ရာတွင် KIO  အစိုးရကျောင်း ဖြစ်သောကြောင့် KIO ဌာနဆိုင်ရာအသီးသီးမှ တာဝန်ရှိ အကြီးအကဲပုဂ္ဂိုလ်များက လက်တွေ့ပါဝင် အားပေး ထောက်ခံမှု အဓိကဖြစ်ပြီး ပညာရေးပိုင်းဆိုင်ရာလုပ်ငန်းများတွင် ပါဝင်သင့်သောအဖွဲ့အစည်းများ၊ ဆရာ/ဆရာမများ၊ မိဘပြည်သူများ၊ ဒုက္ခသည် စခန်းတာဝန်ရှိ သူများ၊ အဖွဲ့အစည်းအားလုံးတိုင်း၏ ဝိုင်းဝန်းပံ့ပိုးမှု အကူအညီများကလည်း အထူးပင်အရေးတကြီးလိုအပ်ကြောင်း သိရသည်။

ဒါ့အပြင် ကျောင်းစာကြည့်တိုက်အား အထူးစနစ်တကျ ထည့်သွင်းဆောင်ရွက်နေပြီး၊ ကျောင်းဆရာ၊ မိဘများနှင့် ကျောင်းသားများကိုးကားနိုင်ရန်ရည်ရွယ်ပြီး ကျောင်းမှတဆင့်စခန်းရပ်ကွက်တိုင်းတွင် မိုဘိုင်းစာကြည့်တိုက် စနစ် ဖွင့်လှစ်နိုင်ရန် အစီအစဉ်များရှိကြောင်းကိုလည်း သိရသည်။

ကချင်လွတ်မြောက်ရေးအဖွဲ့ KIO ထိန်းချုပ်နယ်မြေတွင်း ခိုလှုံနေသော ဒုက္ခသည် ပညာသင်ရွယ် ကျောင်းသားတိုင်း ပညာသင်ကြားခံယူနိုင်ရန် KIO မှ စီစဉ်ပေးလျက်ရှိရာ ယခုနှစ်တွင် ကျောင်းသားဦးရေထပ်တိုးလာသဖြင့် အထက်တန်းကျောင်းဆောင်သစ်တခု ထပ်မံတိုးချဲ့လိုက်ရကြောင်း KIO ဒုက္ခသည်ကယ်ဆယ်ရေးကော်မတီဥက္ကဌ ဆလန်ကဘာဒွဲပီဆာ ပြောသည်။

ထို့အတူ ကျောင်းထပ်မံတိုးချဲ့လိုက်ခြင်းကြောင့် ကျောင်းဆောင်သုံးပစ္စည်းကိရိယာများနှင့် စာသင်ခန်းသုံး ပရိဘောဂများ ဆက်လက်လိုအပ်နေဆဲဖြစ်သည်ဟုလည်း ပြောသည်။

လိုင်ဇာမြို့ ဂျေယန့်ဒုက္ခသည်စခန်းကျောင်းအား KIO မှ ၂၀၁၁ ခုနှစ် ဇူလိုင်လတွင်စတင် ဖွင့်လှစ်ပေးခဲ့ပြီး၊ ယခုနှစ်ကျောင်းသားဦးရေ စုစုပေါင်း ၁၃၇၆ ဦးနှင့် ကျောင်းဆရာ/ဆရာမပေါင်း ၅၁ ဦးရှိကြောင်း သိရှိရ သည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။