Monday, August 19, 2013

Mungbaw, Mungshawa Ni A Ka-ni Nanghpam Pat Jasan Hpung Hpaw Ai Laning Myi Hpring Hte Hkaw Tsun Hpawng Lamang Galaw

(Kachinnet)

Dingda Ginwang, Mungbaw, mungshawa ni a Ka-ni nanghpam pat jasan hpung hpaw ai laning myi hpring hte Ka-ni nanghpam hte seng ai hkaw tsun hpawng lamang hpe dai ni 2013 ning August shata 17 ya shani Chyu Koke, Pang Sai Ginwang Daw, Maihpan mare hta galaw ai lam chye lu ai.

Pat jasan masing hpe (3) ning ngu masat da nna 2012 ning August shata 17 ya shani kawn hpaw hpang ai rai nga ai. Dai hta Komiti dinggrin Salang (7) hte komiti malawm marai (200), mare buga yawng (21) shanglawm ai hte hpaw da ai re hpe chye lu ai.


Mungbaw Mare hta 1990 ning daram kaw nna Ka-ni hkai ai, dut lu dut sha ai, lu sha ai masha law wa ai majaw 1993 ning hta M.D.A uphkang ai aten Ka-ni nanghpam pat jasan lam hpe (5) ning masing jahkrat let galaw ai raitim awngdang ai lam n lu ai sha Ka-ni nanghpam lu sha dut mari ai lam grau law wa ai, Ka-ni nanghpam a majaw HIV ana lu ai ni law wa ai, sut masa hte hpaji lam ni hta grai hpanghkrat wa ai, gaida law wa ai, dinghku kata gali galaw hte dinghku bya ai tsinyam ni hpe shani shagu hkamsha ra taw ai a majaw ndai tsin yam ni hta na lawt lu na matu yaw shada let ndai hpung hpe hpaw sa wa ai re lam chye lu ai. 

Hpawng hta du sa ai shawa masha yawng marai (550) daram rai nna, ndai hpung woi awn let mungshawa shamu shamawt lam, hpaji jaw hkaw tsun ai lam, ningmu jahpaw wunkat jaw ai lam, nanghpam ninghkap poster garan ai lam ni hpe mung woi awn galaw nga ai lam chye lu ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။