Thursday, August 29, 2013

KIO Ginjaw Hkamja Dap A Masat Yan (3) Hkamja Du Wunkat Jawng Yu Hpawng Galaw Ai Lam

(Kachinnet)

2013 ning August shata (29) ya jahpawt hkying (10:00)am aten Wunpawng Mungdan Shanglawt Asuya, Ginjaw Hkamja Dap kaw na hpaw sharin ai masat yan (3) hkamja du wunkat yu hpawng hpe Laiza Muklum, Woichyai Mungshawa Tsi Rung Wang, Wunjat gawknu hta galaw ai lam chye lu ai.


Wunkat yu hpawng hpe Sara Lasang Tu San Karai Kasang kaw akyu hpyi ap let hpawng hpaw mungga hpe Lat Du Up Jum Lahpai Hing Wawm shaga nna, Ginjaw Hkamja Dap Lithkam Du Up Jum N-gan Zau Hkum kaw nna Jawng yu jawngma ni hpe matsun maroi numhtet ga shaga ai lam chye lu ai. 

Mungchying Uphkang Dap Lithkam Salang Kaba Lajawng Hkawng Lum kawn jawng yu ai hkam ja du ni hpe magam bungli gunhpai sa wa ai hta awng dang lu na matu shara n lata ai, ang ai lit hta myit maju jung let myu tsaw myit majing hte kahkyin gumdin lam nga nga shakut shaja gunhpai sa wa na matu hkum tsup ai hku shatsam mungga jaw ai.

Matut nna Lat Du Up Jum Lamai Seng Hkum kawn jawng sumtang hpe tang madun nna, jawngma yawng a gawng malai jawngma ningbaw kawn chyeju dum ga shaga ai.

Ndai hpawng hta jawng yu ai Hkamja Du ni hpe jawng yu lekmat shagrau ai lam, ningtawn ai jawngma ni hpe kumhpa shagrau sha-a ai lam chye lu ai.    

Wukat hpe 2013 ning April (30) ya shani kawn sharin hpang ai rai nna, sharin ginhpan hpe (1) Jinghpaw laika ka htung ka lai, (2) ninggawn mungmasa hte rawt malan labau, (3) htunghking hte Wunpawng labau, (4) amyu sha hkamja lam masing hte ningpawt ninghpang mungshawa hkamja lam, (5) Essential drug, (6) mare buga hkamja lam masing hte hkamja dap makan lit lam, (7) hkamja dap rung hkridun hte rung bungli, (8) NGOs hte makawp maga tsi hte seng ai lam, (9) Nursing Care (10) First Aid (11) Infections disease (12) Anatomy (13) Leadership and management hpaji ni hpe sharin ya ai lam, Jawng yu jawngma yawng marai (42)  re lam chye lu ai.

Shana (7:00)pm aten hta jawng yu hkamja du ni a yungwi pyinra lamang hte ka mnawt atsam madun ai lamang ni hpe mung Wunjat Gawknu hta matut galaw sa wa na re lam chye lu ai.






No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။