Saturday, July 20, 2013

NAM MALING NA SHIGA

(Jinghpawkasa)

LAGANG: Ndai ten hta President Thein Sein gaw England kaw du nga ai lam na lu ai. British ni Myenmung hpe shanglawt jaw ai 65 ning na wa sai. Dai shani kaw nna dai ni du hkra Myenmung gaw lam shagu hta grit nem mat wa nga sai. Madung gaw Myen asuya ni mungdan hpe nlu uphkang ai lachyum rai nga ai.
 
Shanglawt lu mahka Nu-Atlee myit hkrum laika hta Myen asuya gaw mungdan hpe nlu uphkang jang British hpe shabai ya na matu myit hkrum tawn ma ai. Dai ni na ten hta Thein Sein England kaw sa du nga ai gaw mungdan sa shabai ya hkyen ai rai kun, myit yu na lam nga ai. Kaja sha nga yang, Myen ningbaw ningla ni gaw matse ai maga de mungkan hta madang tsaw htum ai mying chyarang kaw rawng na atsam lu ma ai. Yu mu le, Myenmung kade kaji nna matsan timung sinpraw sinna de na super power lu ai mungdan ni hpe shi ra sharawng ai hku shachyai sha kau lu nga ai.

PYILAN:- Teng ai. Wunpawng myusha ni hte kaga bum nga masha ni yawng hpe shamyit kau lu na matu shawng nnan Wunpawng myusha ni hpe shamyit kau hkyen nga ma ai. Myen hpyen hpung ni gaw Wunpawng mungmasha ni yawng KIO ginra de asak lawt hprawng shang mat hkra sat nat zingri let yi sun hkauna, u wa yam nga ni hpe mung gashun la kau ya masai. Miwa mungdan lai di let UN hte NGO ni, hpyen yen ni hpe nlu shang garum hkra lajang lu ai marang e, hpyen yen ni sen lam hpe lu sha, tsi mawan nlu lajang ya ai majaw pala langai pyi n lang ra ai si htum wa na ma ai rai nna KIO gaw asum hkam chyalu rai na sai nga nna kam wa masai.

Shing re ai masing hkyen lajang ai hta Myen hpyen hpung kaba ni gaw ra yang ra ai hku Miwa mung kata de gawai shang hkawm lu ai ahkaw ahkang ni mung lu hparan la nga ma ai. Myen ningbaw ningla ni hpe shiggyim myit n rawng ai ni hku nna masat nhtawm jawm ninghkap nga ai sinna super power lu ai mungdan ni mung Myen ningbaw ni a man de byawng shang wa hkra galaw lu ai atsam ni hpe mu lu yang mau hpa kumla galaw lu ai ni re, ngu nna mung shakawn ging ai.

Maga mi hku nna mungmasha ni, rawt malan hpung ni, mungmasa party ni hpe mung shabyawng kau lu wa magang sai. Madung gaw 2014 shaning kaw ASEAN a ningbaw tai wa lu nna madang grau tsaw ai mying kaja lu wa nhtawm 2015 kaw na ra lata poi kaw shanhte ra sharawng ai hkrang hte awngdang wa lu na matu rai nga ai. Masing kaji ni kaw awngdang wa lu masai raitim, du na ra ai masing kaba kaw awngdang na hpe Karai Kasang gaw teng teng ahkang jaw na n re.

PRANGTAI:- Salang nan tsun ai ningmu ni gaw tup hkrak nan re ngu hkam la ai. Dai hta n-ga, ndai ten na Myenmung a mabyin masa gaw, yu kaba (bum nga masha ni) hpe lapu kaji (Myen asuya) e mayu kau hkyen nga ai kaw grau matse ai lapu gaw lapu kaji hpe mayu kau ai kaw yu kaba lawm mat na masa nga ai.

Myen asuya a labau kaw chyeju dum ai shawang myit madun ai hpe rai n mu yu ai. Wunpawng myusha ni gaw Myenmung shanglawt lu wa na matu ahkyak ai kaw lam woi shawng wa ai hta n-ga, Myen asuya hpe mung lang hte lang hkye la wa masai. Raitim shanhte gaw WP myusha ni hpe chyeju dum na malai, na chying hkrit hpa amyu hku hkam la nna shamyit kau lu hkra shakut bang wa nga masai. WP myusha ni hpe shamyit kau lu jang gaw matut nna kaga myusha ni hpe myu langai a hpang langai yawng hpe shamyit kau lu na lam myit kam nga ma ai.

Ndai ningmu gaw nam maling na dusat ni hte malen pyen u ni a ningmu sha rai nna, hpaji rawng ai shinggyim masha ni a ningmu gaw grau dam lada tsan gang ai de mu lu na ma ai. Dai majaw byin wa na manghkang kaba hpe tau nna yen kau lu nhtawm shanhte hpe jahten sharun hkyen wa ai satan yawng hpe Karai Kasang a mying ningsang hte jawm gasat dang kau lu na ma ai ngu kam dat ai law.

Puk Dun

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။