Wednesday, July 17, 2013

MANGHKANG KABA

(Jinghpawkasa)

Daini myen mungdan hta nmai ngut hkraw ai dinghku majan manghkang hpe ntsa lam, kata lam, atsawm dinglik yu yang byin taw nga ai hta hkan nna bai byin wa na hpe mung maram lu nga ai. Myen asuya hku nna gaw aten galu masing hte hparan la ra na matu manghkang grau grau galaw shalaw jat ai majaw manghkang yawm mat wa ai lam gaw nnga, grau kaba wa ai lam sha nga ai hku re. Laknak lang Rawt Malan taw nga ai Amyu Bawsang ni hku nna gaw aten gadun hte lu hkra hparan la ra na masa gaw MANGHKANG KABA nan rai nga sai.


MANGHKANG KABA (1)
Myen Asuya ni a maw-lanyet gaw aten garawt lu na matu manghkang shalaw ai lam hta ram ram awngdang wa nga malu ai. Mungmasa shawng nkam bawngban ai majaw Wan Pyengding hpai nna manghkang tam shalaw taw nga ai re. Myen mungdan hpe shanglawt jawm la ngut ai shani kawn galaw mat wa ai manghkang ni hpe hparan pyi ndang mat wa sai raitim, daini grau kaba ai MANGHKANG bai galw shapraw jat dat masai. Makam masham lam’yan manghkang, Amyusha lam’yan manghkang gaw mungmasa manghkang hte nbung ai. Mungmasa manghkang gaw Ku (saoi) ntsa kaw tinang myit mada da ai ahkaw ahkang lu jang mai shangut shakre lu ai. Mungkan hta byin taw nga ai manghkang ni ma’hkra hpe maram yu yang Muslim ni hte byin ai manghkang gaw kaba ai kaw nna kaji mat wa ai ngu nnga ai, Kaji ai manghkang kaw nna grau kaba ai manghkang de madaw sit tsap mat wa ai re. Dai majaw myen asuya gaw mungmasa manghkang hpe shawng nkam hparan ai majaw htum nhkraw ai baw MANGHKANG KABA hpe lu shabyin tawn manu ai. Ndai ten kaw nna gaw myen mungdan ting grai sadi ra ai madang du taw sai. Grau nna lawu myen mung de masha law ai poi lamang, Gawngu hpara kaba shadun tawn ai shara hkan, Wanleng daru, Nbungli daru, Nbungli ntsa hkan, Asak hte hpawn si hkam nna bawm hkan kapaw ai lam ni nga wa na ra ai. Ndai ten hta Rohyingya muslim ni hpe gumshem muslim ginjaw ningbaw ni garum nna Bawm hpa’ji hte hpyen hpa’ji ni sharin ya taw nga sai lam na lu ai.

Annau ni a Nawku jawng kata kaw nan Annau ni a Madu jan, kajan kasha ni, Nu num Kanu ni hpe roi rip ya, Nawku jawng ni mung nat kau da ya re ai yubak hpe gaw Karai Kasang nan sharin shaga ya wa sai hku re, myen satan hte muslim satan, satan hte satan hpe ayai hkat shangun bang wa sai hku re. Dai shaloi she myen asuya gaw muslim ni hpe tsun ai ga’manawng bai galai tsun wa na mara ai, shaning law law ning rau sha jawm nga wa ai kahpu kanau ni re majaw rau sha jawm nga ga nga nna bai tsun shatsawm wa na mara ai. Muslim ni bawm pyi rai nkapaw shi yang ya jang pyi dai ga loi’li kra pru wa magang masai. Dai ga tsun tim ntsun tim muslim ni gaw ayai chyalu sha re. Myen asuya ni koi yen nlu ai MANGHKANG KABA rai wa na masa nga ai. Ndai manghkang gaw aten ahkying n lata ai, shara n lata ai, matai bai htang wa na manghkang re ai majaw htawm hpang shu’mashi, shu’masha prat du hkra yup npyaw maja ra ai baw manghkang re. Hpa majaw nga yang muslim ngu ai ni kaw mara raw ya hkat lu ai makam masham atsam shanhte kaw nnga ai. Matai bai htang na atsam sha shanhte kaw nga ai ni re. Dai hte maren budha ngu ai ni kaw mung masha a Asak hpe hkye la mayu ai makam masham atsam shanhte kaw nnga ai majaw MANGHKANG KABA bai galaw jat jat re ni re.

MANGHKANG KABA (2)
Tsawp galai tawn ai myen hpyen asuya a kata lam hpe atsawm n chye nna Thein Sein hpe madi shadaw taw nga ai mungdan kaba China, US, EU, UN ni a ningmu mung MANGHKANG KABA rai nga ai. Thein Sein wa hpe madi shadaw ai gaw Than Shwe wa a mawla-nyet masing hpe n-gun jaw madi shadaw ai hte bung nga ai. Thein Sein, Shwe Mann, Minn Awng Hlaing ni kadai mung dawdan lu ai Daru Magam ahkaw ahkang shanhte kaw nnga ai. Shingdu kaw nna Daru Magam ahkaw ahkang hte sumri gang taw nga ai MANGHKANG KABA gaw Than Shwe wa she re. Ga’shadawn anhte KIO/KIA hte byin ai majan kaba hta Gumsan Magam Thein Sein wa she htu ganaw majan n-galaw na matu matsun da sai zawn zawn, Minn Awng Hlaing wa mahtang she baw ja, na htat ai majaw htu ganaw majan galaw taw nga ai zawn zawn, re ai lam ni gaw mungkan hpe pyi kam shut kau shangun lu ai Than Shwe wa a mawla-nyet rai nga ai. Than Shwe, Thein Sein, Shwe Mann, Minn Awng Hlaing ni yawng gaw mawla-nyet masing langai sha re.

Dai hta n-ga Aung San Suu Kyi n-gup pat zim mat ai lam mung Thein Sein asuya hpe lagu madi shadaw ai lachyum rai nga ai. Ga’shadawn anhte KIO/KIA hpe majan kaba baw taw nga ai ten hta n-gup pat zim taw nga ai. Bai nna Lepptawng tawng manghkang hta shi hpe jaw ai lit gaw sawk sagawn jep na matu she re. Dai magri hkyeng htu ai bungli masing hpe jahkring na matu, matut galaw na matu, dawdan shangun ai nre. Raitim matut galaw na hku sa dawdan kau dat ai. Wan hkru bawm gabai bun ai tara hkam hpe mung n sagawn shapraw ya ai hta n-ga, wan hkru bawm nre ai hku madaw she tsun ai. Tsun mayu ai lachyum gaw, Aung San Suu Kyi gaw manghkang kaba a npawt gaw nre. Raitim Aung San Suu Kyi a majaw Thein Sein asuya hpe mungkan kawn grau kam mat wa ai gaw Manghkang kaba nan rai nga ai.

MANGHKANG KABA (3)
Laknak lang Rawt Malan Wuhpung ni yawng kaw ra’rawng gawngkya ai lam law law nga ai tim laga ra’rawng gawngkya ai lam ni gaw manghkang kaba nre. Ra’rawng gawngkya ai Manghkang Kaba gaw,..
1- Wuhpung langai hte langai myit n hkrum ai.
2- Myen asuya tsun ai ga hpe grai kam loi ai.

Laknak lang Rawt Malan Wuhpung ni yawng myit hkrum kahkyin gumdin ai lam nnga yang gaw jet ai Federal Munghpawm lu gawgap na masa nnga ai, myen asuya a aten galu sut masa hte hkam ai mahkam kaw lup mat wa na sha re. Myit hkrum kahkyin gumdin ai hte nsen langai manawng langai hte jawm shakut yang chyawm gaw Awm dawm shanglawt mung mai lu ai. Federal mung mai lu ai. myen asuya hte mala la nan naw jawm nga mayu yang mung jet ai Munghpawm gawgap la lu na re. Dai majaw Anhte Rawt Malan taw nga ai Bawsang ni yawng myit hkrum kahkyin gumdin ai lam lu hkra shawng galaw ra sai ngu mu mada ai.

Moi lai wa sai ten ni hta Annau ni a hpu shawng hpu ba ni Karai Kasang jaw ai Ga’sadi hpe gaw nkam sham, myen Aung San wa jaw ai ga sadi hpe gaw kam sham re ai a majaw daini du hkra naw jam jau taw nga ga ai re. Matut nna mung myen asuya tsun ai ga hpe naw bai kam jang gaw naw jam jau na re. Myen satan hpe Anhte Karai Kasang a Kashu Kasha ni dang lu ai laknak kaba gaw Karai Kasang hpe manoi manat ai makam masham re. Karai Kasang hpe manoi manat ai makam masham hte gasat yang gaw kaning re laknak hte sha raitim padang dip lu ai. Karai Kasang hpe manoi manat kam sham ai sagu rem David ma kasha gaw Hpiliti hpyen Jaubu kaba Gawliyet hpe lungdin kaji hte sha padang dip kau lu ai. Karai Kasang a kashu kasha ni gaw Karai Kasang jaw ai lamu ga (mungdan) hpe lu la mayu yang Karai Kasang kaw maoi manat nna hpyi let gasat la ra ai. Mungkan Wunpawng hpung Rapdaw kaw Annau ni a Mungdan Dawng Hkawn hpe jung tawn lu hkra shakut ga. Federal ngu ai hpe grai myit machyi mat sai. Annau ni Jet Ai Munghpawm Federal hpe hpyi shawn nga ninglen maigan hpyen hku masat kau ai hta n-ga amyu shamyit masing hte majan kaba hpaw dat ai. Grai myit machyi mat sai.

Sau Nan Du

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။