Tuesday, July 2, 2013

MAJAN KABA A MATU HKYEN TAWN RA SAI

(Jinghpawkasa)

Namlap shamu ai hpe yu nna ndai nbung gaw gara shara kaw nna gara maga de bung nga ai hpe asan sha maram chye lu ai zawn myen asuya a shamu shamawt wa ai masa lam mung majan kaba hte hparan shakre hkyen taw nga sai lam dandawng pru wa sai.

Daini 01-07-2013 ya shani Naypyitaw kaw mungdan makawp maga shimlam zuphpawng hpe lawan ladan hkyak hkyak gan hpawng la masai. Ndai zuphpawng gaw, n dai july shata hta myen mungdan kata kaw laknak lang Rawt Malan taw nga ai Wuhpung Wuhpawng ni yawng ma’hkra (mungdan ting gap hkat jahkring myit hkrum ta’masat) lu htu hkra na matu re.
 
(1) MAIGAN SUT MASA ARANG MADU NI A MAN HTA HPYEN DAP A DINGBAI DINGNA.
Ahkyak madung gaw mungmasa manghkang hpe sut masa hte aten galu gau ngwi ngwi hparan mat wa mayu tim mungdan kata kaw majan naw byin taw nga ai majaw hpyen dap hte hkyak hkyak zuphpawng hpawng ra ai rai nga ai. Mungkan kawn sut masa chyinghka hpaw ya sai nga tim mungdan kata kaw laknak lang Rawt Malan taw nga ai ni hte simsa lam nlu dingsa gaw kadai mung arang sa bang gwi na nre. Sharaw hpyi hpun nna wa shaga ai hpa sha re lam hpe shanhte chye na masai. Shanhte a sut masa sharawt la na masing hta hpyen dap rai jang gaw shani shana majan baw taw nga ai majaw hpyendap lawu tsang ni yawng hpe chye na shangun ra nga malu ai.

(2) 2014 NING, SINPRAW DINGDA ASIAN TINGNYANG UP LU GALAW NA MATU.
Du na ra ai 2014 ning hta gaw sinpraw dingda Asian hpung shang mungdan ni kaw na myen mungdan gaw tingnyang up lahpa bai galai la na matu myen asuya kaw nambat ang ai hku re. Ndai ahkaw ahkang hpe tat kau yang sum machyi hkrum na mungmasa hte sut masa hpe sawn yu nna nkam tat kau nga ma ai. Ndai tingnyang up shara hpe lu galai la yang bai lu la na mungmasa amyat hte sut masa amyat ni hpe sawn yu magang grau nkam tat kau nga ma ai. Ndai tingnyang up shara hpe lai wa sai shawng na lang mung mungdan simsa lam nlu ai majaw tat kau yu sai re. Dai majaw ndai lang gaw simsa lam hpe masu nna raitim, jahkrit nna raitim lu hkra la mayu nga ma ai re. Dai majaw laknak lang Rawt Malan Wuhpung ni yawng ma’hkra hte mungdan ting gap hkat jahkring myit hkrum ta’masat htu ai MAISAU PA lu na matu grai ahkyak kyin taw nga malu ai. Ndai MAISAU PA lu ai hte mungkan a man e myen mungdan simsa sai ngu na matu hte, Ndai MAISAU PA hte mungkan shinggrup nna myen asuya mawhpyi hpyi hkawm mai sai.

(3) MUNGKAN A MAN E TARA SHANG AI MAJAN KABA LU HPAW NA MATU MARA TAM.
Ndai lang na mungdan ting gap hkat jahkring myit hkrum ta’masat htu ga ngu ai gaw Rawt Malan Wuhpung Wuhpawng ni yawng a matu tsang ra dik ai mahkam kaba re. Ndai lamang kaw myit hkrum ta’masat nhtu ya ai ni yawng gaw simsa lam hpe nra ai kasu kabrawng gumshem hpung ni she re ngu nna majan kaba hpaw dat na matu mara mai tam nga ai zawn Anhte Rawt Malan Wuhpung Wuhpawng ni yawng a matu mung lu la mai ai ahkaw ahkang kaba mung rai nga ai. Dai majaw Rawt Malan Wuhpung Wuhpawng ni yawng ya hkyak hkyak bawngban jahkrup nna myit hkrum ta’masat tsepkawp nmai htu na re ngu mu mada ai. Nkau mi gaw htu, nkau mi gaw nhtu re ai baw mung tsepkawp nmai na re. Htu ngut sai ni yawng nan tsepkawp nmai kahtap htu sai. Ya byin taw nga ai majan yawng gaw shanhte myen ni htim gasat nga ai majaw byin ai majan she re. Rawt malan Wuhpung Wuhpawng ni yawng n-sen langai hte sha mungmasa shawng jahta mayu ai lam jawm tsun ra na re. Mungkan kawn mung anhte Rawt Malan hpung ni hpe gumshem jahten sharun hpung ni nre ai lam chye tawn chyalu rai sai. Anhte lama myit hkrum ta’masat htu ya kau dat jang myen a aten galu masing kaw gau ngwi ngwi myen a kata de du mat wa na re. Anhte myit hkrum ta’masat nhtu ya jang gaw myen asuya hpe tara ai Ku (sboi) ntsa de lu ganawng shalun tawn lu na re.

Raitimung, Anhte Rawt Malan hpung ni yawng gaw MAJAN KABA A MATU HKYEN TAWN RA SAI. Hpa majaw nga yang myen asuya gaw galoi mung shinggyim masha myit ai hku nmyit ai re. Myitkyina zuphpawng kawn gaya pawt pawt mat wa ai majaw mung re. KIO/KIA hte gap hkat jahkring ta’masat bai kahtap htu lu na matu gaw mungdan ting gap hkat jahkring ngu ai ga’baw ndai mahkrun sha nga mat sai majaw mung re.

Sau Nan Du

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။