Monday, July 1, 2013

HKRUNLAM HTA JAMJAU AI GAW MAREN SHA

(Jinghpawkasa)

Laknak lang Rawt Malan taw nga ai Bawsang ni ma hkra a ntsa e myen asuya a shamu shamawt ai ladat masing hpe maram yu yang, Jet ai Munghpawm (federal) de sa ai hkrunlam hte Awmdawm de sa ai hkrunlam gaw maren sha rai na masa nga ai. Kaja wa hkrak teng sha tsun ga nga yang, Jet ai Munghpawm (Federal) hpe hpyi shawn taw nga ai gaw mungmasa manghkang hpe majan hte nhparan ai sha ku (saboi) ntsa kaw jawm hparan la na matu re. Raitim myen asuya gaw mungmasa manghkang hpe hpyen masa hte shawng dip gamyat tawn lu ai kata kaw she mungmasa jahta mayu ai.
Lachyum gaw hpyen masa hte shara la ngut jang mungmasa jahta ai shaloi 2008 ning constitution a kata de gau ngwi ngwi hkrau bang la mayu ai lachyum re. Shing nrai, nang gap di la tawn lu sai Ginra hpe nang up sha, Ngai gap di tawn lu sai Ginra hpe ngai up sha ngu ai lachyum mung re. Shanhte myen asuya ni hku nna Jinghpaw Mungdaw (Kachin State) ngu ai lamuga hpe hka ntsa kaw soi tawn ai sumla hku sha sawn tawn ai. Dai majaw Jet Ai Munghpawm (Federal) de sa ai hkrunlam hte Awmdawm de sa ai hkrunlam gaw maren sha. Lam lapran kaw jamjau ai mung maren sha. Awmdawm de sa mayu tim gap di la ra na masa pru, Federal de sa mayu tim gap di la ra na masa pru. Awmdawm de sa ai hkrunlam gaw grau jamjau nna, Federal de sa ai hkrunlam gaw grau hkyemsa na re ngu myit shut na lam nnga ai. Hkrunlam hta jamjau ai gaw maren sha rai yang gara de madaw sa na? Ya mung Dap Ba (4) de shani shagu ngu na daram myen ni naw htu ganaw shang gap taw nga ai. Myitkyina hkrum zup bawngban hpawng hta lahkawng maga myit hkrum tawn ai lam ni hpe grai kamhpa mayu ga ai raitim myen asuya ni hku nna, anhte kam mai na daram re ai masing masa jahkrat madun dan lu ai lam nnga ai.

Matut nna mung naw jamjau ra na masa rai yang gaw, Kade n-gun ja ai laru kaba mi rai rai, Kade kaba ai lamu marang mi rai rai, Hkrap myi prwi hte raitim Awmdawm Shanglawt Pandung de madaw du hkra sa ra na re.

JET AI MUNGHPAWM (Federal)
Jet Ai Munghpawm (Federal) hpe ntsa lam kadun ai hku tsun ga nga yang Awmdawm Shanglawt a 50% sha re. Maga mi hku tsun ga nga yang grit nem htum ai hpang jahtum hpyi shawn madang rai nga ai. Ndai hta lai nna shayawm na lam nnga sai. Ndai hta lai nna naw shayawm ga nga jang gaw laknak ap kau nna Katsa ba hpe la ai wa zawn rai nna wa mau dung nga na lam sha nga sai. Ndai gaw myen asuya ni hku nna shinggyim masha myit rawng ai rai yang kalangta jaw ra ai bungli re. Mungdaw lu tawn chyalu ni hte gaw gap gasat hkat mung nra ai mungmasa she re. Ga’garan pru na ahkaw ahkang nlu tim Tinang a mungdaw hte tinang a amyu hpe tinang dawdan uphkang ai (Self Determination) lu ra ai.Annau ni a Mungdaw kaw Annau ni a Hpyendap rai ra ai. Annau ni a Mungdaw kaw Annau ni a Balik (pya da) rai ra ai.Maigan hpyen hpe gaw Munghpawm hpung shang ni yawng jawm gasat ra ai. Annau ni a Mungdaw kaw pru ai nhprang sut rai ni hpe Annau ni gawgap tawn ai madu Mungdaw Asuya ya ni nan jumtek hparan la lu ra ai. Annau ni a Mungdaw hte Annau ni a htawm hpang lam hpe annau ni nan dawdan hparan la lu ra ai.

AWMDAWM SHANGLAWT
Federal raitim gap di la ra na rai yang gaw Awmdawm Shanglawt hpe she la le e. Awmdawm Shanglawt hpe ntsa lam kadun ai hku tsun ga nga yang,..

(1) Gap di la tawn lu sai Annau ni a Mungdaw (Mungdan) a Dawnghkawn hpe Mungkan Wunpawng Hpung (UN) Rapdaw kaw jung tawn lu na.

(2) Gap di la tawn lu sai Annau ni a Mungdaw (Mungdan) a Shadip Jahpang Gawgap Tara (constitution) hpe Mungdan kata kaw shanu nga taw ai Bawsang ni yawng Ra sharawng ai hku jawm ka lajang la lu na.

(3) Gap di la tawn lu sai Annau ni a Mungdaw (Mungdan) a Asuya hku nna Mungkan hte adingtawk matut mahkai lu na.

(4)Gap di la tawn lu sai Annau ni a Mungdaw (Mungdan) a Gumhpraw hpe mungkan a man e tara shang Jaram dip nna Gumhpraw dip shapraw lu na.
Lahta na ahkyak dik npawt nhpang ga ngau (4) gaw AWMDAWM SHANGLAWT rai nga ai.

Sau Nan Du

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။