Thursday, June 6, 2013

SUMLA ASUYA

(Jinghpawkasa)

Myen Thein Sein asuya gaw sumla hte bung ai asuya langai sha re lam grau n’na dan dawng wa nga sai re. Dai ni [969 -786] Bukda hte Muslim ni a manghkang hpe asuya langai hku ahkyak la n’na atsawm mai shazim ai re. Dai ni pra pra sa sa n’hkrit n’tsang masha sat wan nat jahten sharum hkawm nga ai hpe asuya Balik hte up hkang masha ni hpyen dap chye nga ai hte shanhte man kaw na zingri jahten sharun sat nga tim mu nga ninglen n’mu ai zawn galaw dan nga ai gaw sumla hte bung ai asuya a majaw rai nga ai.


Tara rudi hkrak re n’nga ai hta n’ga, tara hkungga ai lam n’nga ai, Democracy asuya nga tsun nga tim kata lam up hkang hkrang gaw moi na hte maren sha, n’shai ai jahkrit shama adip arip re lam hku kam mara up hkang nga ai. Grau n’na, hpyen dap ni amyu mi mahkret dat, Balik ni amyu mi madun dat, 88 jawngma ni amyu mi hpaji madun dat, bawsang rawt malan ni amyu mi madun mahkret dat, 969 ni amyu mi sharim dat rai le ra hta jum dat na zawn rai tara hkrak nlu hkan sa ai gaw Thein Sein asuya gaw sumla ausya sha re lam asan mu nga sai re. Gumsan Thein Sein nan mung pale palau masu ga tsun nga yang kaning rai nna teng man ai Democracy tara hkrang hku sa ai ngu mai tsun na rai ta? Dai majaw sumla hte bung ai asuya sha re.

Lit shatsam gwi ai hta, lit la gwi ai, lit gun gwi ai myit jasat gaw grau ahkyak nga ai. Myen asuya gaw ngai tsun ai hku galaw u, ngai galaw ai hku hkum galaw ngu ai n’hkru, n’shawp ai ni a masa jum tek ai. Li baw lai jang li mai gara kaw adawt yang adawt ngu ai masa hte maren n’gup bawlaw lata gaw lagyaw, hka kata numhkaw hprwi ngu ai masa hte maren lit shatsam chye ai tim lit la gwi ai lam n’nga ai. Dai majaw ya na Thein Sein a lakhtak hta gaw annau ni myit mada ai mung masa ku de bawngban jahkut la ga ngu ai gaw yup mang zawn naw rai nga ai.

Dai re majaw annau ni awmdawm a matu KIO/KIA a shingdu n’gun kaba, dahprang n’gun kaba langai hku maigan du myu sha ni yawng hte Miwa, Kala mung nga Myu sha uhpung yawng gaw dinggrin awmdawm shanglawt n’lu dingsa galoi simsa lam n’tam na. Shanglawt n’lu dingsa gasat shagrawt la ra sai jaw, maigan du annau ni grau ngang grin ai Chyumrum zinlum hpung kaba hpe madung shagreng jahtin n’na n’gun chyawm dat sa ra sai. Hpaw ninghtan ra sai.

Hpaga myiman hpe sha madung tawn nga ai shan hpraw ni hte maigan mungdan ni yawng gaw myen asuya hpe madi shadaw n’na, asuya n’re ai annau ni hte bawsang yawng hpe kalang bai shamyit mayu ai masing pru nga ai hte annau ni hpe moi na hte n’shai ai mung maden, lamu ga maden masa hte maren bung ai, ga baw sha shai ai masa langai hku kalang bai hpaga n’hprang rai masa hte mung maden hpyen hku kalang bai dip ga-up hkyen nga sai re. Dai re jaw annau ni laknak n’grak tim myu tsaw mung tsaw myu sha lam yan hta rau chyawm tsap n’na gasat yang teng awmdawm shanglawt lu chyalu re.

KIO/KIA ningbaw Kaba Salang Kaba ni maga mi de mung masa ku de lung bawng jahkut lu hkra shakut nga ai zawn, anhte maigan nga myu sha yawng mung masum rai tim langai de masa kaba shaw n’na ya jang mung masa num shawn kaba shaw n’na, gasat shamyit nang ra sai. Majan loi zim mat ai jaw tsin yam ni hpe kabai da n’mai ai hpe mung ja ja dum n’na, kalang naw n’gun kaba dat madi shadaw garum la ga.

Awmdawm shanglawt n’lu dingsa adawt gasat ga. Myen roi ai nau lai hpyau sai.

Baren Numraw

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။