Wednesday, June 19, 2013

SLG. ZAHKUNG LUM HKAWNG

(Jinghpawkasa)

Myen asuya hpyen a hk-la-ya (128) hte (pa.ta.ts) Munggu ni pawng nna hkawm ai hpyen hpung (40) ram gaw, Lahta sammung Munggu ginwang dung (36) KIO/ KIA up hkang ginra Nawng Heng Mare hta shanu nga ai, Slg. Zahkung Lum Hkawng hpe June (14) ya jahpawt maga hkying (3:30AM) ten, Lam madun nga woi mat wa ai lam hpe na chye lu ai. Dai ten Slg. Zahkung Lum Hkawng gaw mare sin ang ai rai nhtawm (Lau Shang Jai) Miwa mare kaw na Miwa la asak (40) jan re wa gaw Nawng Heng mare du hkra myen hpyen hpung ni hpe wa sa da nna shi bai wa mat ai lam, Nawng Heng kaw na laga mare de bai sa na matu Mare salang Slg. Dabang Brang Nan kaw myen hpyen hpung ni du wa nna masha tam shangun ai lam hpe mare Salang wa kawn chye lu ai.
 
Mare salang wa gaw mare sin ang ai (Slg. Zahkung Lum Hkawng) hpe shaga nna dai hpyen hpung ni hte rau lam madun na matu shangun dat ai lam hpe chye lu ai. Myen hpyen hpung ni tsun ai gaw “Ndai mare kaw na laga mare du yang shi hpe bai wa kau shangun na” nga nna, dai shara kaw na hpyen hpung ni hte Slg. Zahkung Lum Hkawng rawt mat wa nhtawm Mung Ya Hka Zup ai shara hta Dung (36) KIA myu tsaw hpyen la ni hte hkrum nna gap gasat hkat hkrum ma ai majaw dai lam madun ai Slg. Zahkung Lum Hkawng hpe hpyen nga ai shara de woi sa ai nga nna adup zingri, htawng gum pye ai lam galaw ai gaw (Gawn San) mare masha ni tsan tsan kaw na mu ai lam tsun dan ai.

Mung Ya Hka Zup kaw na hkying hkum (1) jan ram hkawm ngut ai shara Nam Gat hte Ying La lapran kaw kalang bai gasat hkat ai hta mare salang wa hpe mung Myen hpyen ni sat kau da ai lam chye lu ai. Munggu (pa.ta.ts) kaw na myit su langai mi gaw nanhte a masha moi mang hpe sa hta la mu nga tsun shana wa ai hpe mare salang wa kaw phone shang wa ai lam mare salang wa kawn chye lu ai. June (15) ya jahpawt Nawng Heng mare masha nkau mi dai moi mang hpe sa la na matu Nam Gat mare kaw du ai shaloi myen hpyen hpung hk-l.y (242) kawn nanhte dai moi mang hpe nsa la lu ai nga bai jahkring da ai hpang kade nna yang hkying (4:30PM) aten ram kawn Loi Lawm mayan hta laja lana bai gasat bang wa sai lam mung mare masha ni kawn na chye lu ai. Moi mang hpe gaw lu hta la sai lam mung mare salang kawn chye la lu ai. Ngam nga ai dum nta masha ni yawng marai (8) rai nhtawm Kanu gumgai, Madu jan hte Ma ni marai (6) kaji htum laning mi jan re mung naw nga ai lam chye lu ai. Slg. Zahkung Lum Hkawng a moi mang hpe dai ni June (19) ya shani Nawng Heng Mare kaw makoi mayang na hkyeng lajang nga ma ai lam mung na chye lu ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။