Sunday, June 2, 2013

MYITKYINA ZUPHPAWNG A N-TSA NINGMU

(Jinghpawkasa)

Myen asuya hte Wunpawng Mungdan Shanglawt Asuya KIO/KIA a mungdan simsa lam bawngban lamang hpe a’tsawm sha galaw la lu ai majaw,..

(1) Karai Kasang a bausin makawp maga lam madun ai hpe chyeju shakawn ga ai.

(2) Myit galu kaba ai hte Kachin Wunpawng Sha ni hpe ta’tut woi’awn taw nga ai KIO/KIA ningbaw ningla ni yawng hpe kabu gara kamhpa ai hte matut nna lu ging ai Pandung shadaw du hkra woi’awn na matu shatsam dat mayu ga ai.


(3) Kachin Wunpawng Sha ni hku nna, ta’tut woi’awn taw nga ai KIO/KIA hpe tsep kawp madi shadaw ai lam hpe myen mungdan sha n-ga, mungkan ting de htawng madun dan lu sai majaw, lai wa sai ten ni hta Annau ni hkrat sum taw nga ai mungmasa hkrunlam hpe pawn ka-aw satsaw la lu sai majaw grai kabu ga ai.

#Matut shatsam mayu ai ningmu
30/05/2013 ya shani lahkawng maga myit hkrum ta’masat htu la lu sai lawnglam hpan (7) hpe aten nau n-garawt ai sha loi lawan ai hku hkrang woi shapraw lu hkra galaw ra na re ngu mu mada ai.

Hpa majaw nga yang Thein Sein asuya a yaw shada ai masing kaba gaw A’TEN GARAWT mayu ai masing rai nga ai.

(1) 2015 ning ra’lata poi hta chyant hkaing hpunt hpyu ye party ni bai naw matut dang na matu mungdan kata hte mungkan a man e myiman tam, mying kaja la kyin taw nga ai re. 2015 ning ra’lata poi hta matut dang jang shanhte a sut masa hpe shatsaw mat wa nna Anhte Rawt Malan hpung UNFC ni a sut masa hpe gaw gau ngwi ngwi dandi kau ya mat wa na masing re.

(2) UNFC ni hpe rawt malan myit masin laknak shakya shayawm kau ya lu na matu gaw a’ten gadun hte nmai nga malu ai. Rawt malan hpung ni yawng hpe kalang ta aten kadun hte gasat shamyit kau na matu mung tsepkawp nmai byin ai bungli rai nga ai. Hpa majaw nga yang UNFC ni gaw daini na ten hta tara ai mungmasa rawt malan u’hpung rai mat sai re majaw hpyen n-gun hte nmai shamyit kau mat sai ten re. La’ma wa shanhte myen asuya ni hpyen n-gun hte shamyit wa jang mungkan kawn gumshem (terrorists) asuya re ngu masat kau sana sha rai sai. (asuya madaw tarahkam byin mat na)

(3) Matut nna gap hkat jahkring myit hkrum ta’masat bai gahtap htu na, nhtu na, hte seng nna….. Myen asuya hte gaw maisau pa ntsa kaw myit hkrum ta’masat jawm htu tawn nna bai gap hkat na malai gaw lapran kaw gawnjep komiti jawm hpaw nna jum tek kau ai gaw madung rai nga ai. Tengman ai saboi ntsa kaw tengman ai mahtai ga’sadi lu ai shani she mai na re ngu mu mada ai.

(4) Bai nna mungmasa bawngban na lam hte seng nna Anhte KIO/KIA dinghkrai hte myen asuya chyu sha shawng bawngban hkyem ai kun? Sung sung myit yu ra na re. Hpa majaw nga yang myen asuya hkrit dik ai u’hpung gaw UNFC hpe re. UWSA ni laknak gade myi grung grung myen asuya ni nhkrit ai. NLD party ni u’hpung gade daram kaba ba Thein Sein asuya nhkrit ai. Awng Sann Suu Kyi a majaw sha asak hkrung nga ai Party gaw Awng Sann Suu Kyi gadawng mat jang NLD party gaw hkaraw de rai mat chyalu sha re. NLD party jan shang mat na kun? (or) matut nna asak hkrung lu na kun? Ngu ai gaw 2015 ning ra’lata poi a matu Awng Sann Suu Kyi hku nna ndai ten hta gade daram shakut lu ngu ai hta sha madung rai nga ai.

Dai rai yang myen asuya ni hpa majaw UNFC ni hpe dai daram hkrit ra ai i? UNFC ni laknak n-gun, masha n-gun n-gaba tim mungmasa n-gun kaba ai u’hpung langai re ai majaw myen asuya hkrit ai rai nga ai.Tsun mayu ai lachyum gaw myen asuya ni hku nna UNFC hpe hpyen masa hta mung mai dang ai, Sut masa hta mung mai dang ai, Raitim.. mungmasa hta nmai dang ai lachyum gaw UNFC N LAWM YANG MUNGHPAWM MUNGDAN N MAI GAWGAP AI GAW KABA DIK MANGHKANG RAI NGA AI. Dai majaw mungmasa bawngban lamang hpe gaw UNFC hku nna bawngban yang grau kaja na re ngu mu mada ai.

Sau Nan Du

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။