Wednesday, June 5, 2013

Mungkan makau grupyin masat ninghtoi hpe madi shadaw ai hpun hkai ai lam galaw

(Kachinnet)


2013 ning June (5) ya dai ni hkying (10:00)am aten hta Wunpawng Mungdan Shanglawt Hpung, Ninggawn Daju Pati komiti woi awn ai masing kata Jahtu Bum, Dabang pati komiti kaw nna ta tut hkrang shapraw let Mungkan makau grupyin masat  ninghtoi (World Environment Day) hpe madi shadaw ai hpun hkai lamang hpe galaw ai lam chye lu ai.


Ginjaw Dabang Pati gaw 2013 June  (3) ya kaw nna Jahtu Bum makau grup yin ni hta hpun bawng 800 hpe hkai hpang wa sai hte dai ni mung Dai Lawn Rung magam gun ni yawng marai (40) daram sa du shanglawm let hpun bawng yawng (650) hpe Jahtu Kawng Golf Ginsup Wang hta hkai sai lam hpe chye lu ai.  Hkai mat wa ai hpun bawng ni gaw Lahkyang, Maisak, Maihting hte Hpun Sau hpun ni rai nga ai.

Ndai zawn Madi shadaw hpun hkai lamang hpe Ninggawn Daju Pati Komiti woi awn let Jahtu Bum hte Jahtu kawng Golf ginsup pa ni hta sha n ga Ginjaw Ginra shara shagu ni hta mung galaw ai lam hpe matut chye lu ai.

World Environment Day gaw United Nations Environment Programme (UNEP) kaw nna lai wa sai 1973 ning kaw nna shaning shagu June praw (5) ya shani hta masat galaw ai rai nna,  Dai ning na ga lashum gaw “THINK. EAT. SAVE” rai nga ai hpe chye lu ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။