Sunday, June 23, 2013

Miwa Ga/Laika College Jawngma Ni A Ga Tsun Atsam Madun Lamang Laiza Kaw Galaw

(Kachinnet)

Miwa Ga/Laika College jawng ma ni a ga tsun atsam madun lamang hpe Laiza Muklum, Lahta Tsang Jawng, Rawt Ninghkawng Gawk Nu hta shana (6:30)am aten galaw ai lam chye lu ai.

Lamang hpe Ginjaw Hkamja Dap Ningtau Lithkam Lat Du Up Jum Lahpai Hing Wawm gaw hpawng tingnyang up lit la nna, Rev. Nba Zau Awn hpawng hpaw kyu hpyi ap ya ai. Ginjaw Hpaji Dap Ningtau Lithkam Sara Kaba Chyin Yu Hkun Nawng ( Miwa ga/ laika College Jawng Up) kaw na Jawng hte seng ai labau hpe tsun shana ai. Miwa Gumsan Mungdan, Kunming Dakkasu Jawng kaw na Sara Kaba Maran Sharoi kaw nna mung Kunming Dakkasu de hpaji matut sharin hkaja mai ai lam ni hpe tsun shana sang lang ai lam chye lu ai.


Wunpawng Mungdan Shanglawt Hpung, Ginjaw Komiti Tingnyang Up Malai (I) Lat Du Daju Jum Gauri Zau Seng kaw na shatsam ai hta, yak hkak jam jau ai lam law law nga ai lapran, majan byin nga ai ahkying aten hta raitim Jawng pat kau ai lam n nga ai sha jawng hpe matut hpaw sharin lu hkra shakut nga ai Miwa Ga/Laika Jawng Komiti Salang, laika sharin Sara yawng hpe chyeju dum ai lam, matut nna mung Miwa Gumsan Mungdan, Kunming Dakkasu gaw Laiza Miwa Laika/Ga College Jawng hpe madang grau tsaw ai hte rawt jat kaba wa hkra galaw sa wa ai hta garum la lu na matu garum hpyi ai hte shatsam mungga hpe hpungdim dat ai lam chye lu ai.

Matut nna, Jawngma ni gaw sharin hkaja da sai Miwa Ga hte tsun shaga atsam madun dan ai lamang hpe galaw ai lam chye lu ai. Ndai Jawngma ni gaw dai ni na aten hta jawng lung ten ladaw ninghtoi laning mi hpring sai rai nga ai. August 25 ya kaw na jawngma dingsa, ningnan ni hpe mying jahpan bai hkap la na rai nna September shata hta jawng hpe matut hpaw sa wa na lam chye lu ai.

Ndai Jawng hpe Ginjaw Hpaji Dap kaw na 2007 ning hta hkrang shapraw hpaw sa wa ai rai nna Wunpawng Mungdan Shanglawt Asuya kaw na n-gu, Jum hpe garum ya ai re lam, sharin Sara hte shata shabrai hpe Kunming Dakkasu kaw nna lit la jaw ai re lam, Jawng lung ladaw hpe (2) ning masat tawn nna, Jawng yu lekmat hpe Kunming Dakkasu kaw na shagrau ya ai re lam, jawng ngut kre la lu sai jawngma ni mung Kunming Dakkasu Jawng de matut sharin hkaja na ahkaw ahkang nga ai lam hpe chye lu ai.

Ndai Laiza Miwa Ga/Laika sharin jawng hta jawng yu la lu sai jawngma 100 jan nga sai hpe mung chye lu ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။