Monday, June 24, 2013

MAGAM GUN NI MUNG SHAWA MASHA HPE ZINGRI

(Jinghpawkasa)


Wunpawng Mungdan Shanglawt Asuya KIA Dap Ba (5) npu, Dap Dung (3) kata na Gyi Hawng Hkawng kawn Saga Pa mare masha ni hpe June (23) ya shani sa adup zingri lai wa sai lam shiga na chye lu ai. Mabyin gaw, Saga Pa Mare hta nga ai mare masha ni gaw majan a majaw hprawng yen hkawn mat ai kawn Mare de bai nhtang wa ai nau nna shi ai lam, Saga Pa na mare Salang rai nga ai Slg. Dashi Nawng Hkum gaw mare kata hta ka-ni nanghpam hpe pat jasan let,
ka-ni nanghpamg dut mari ai ni hpe ahkyak la nga ai re lam na chye lu ai. N dai zawn Saga Pa Mare salang hte mare masha ni kawn ka-ni nanghpam dut mari ai ni hpe ahkyak la pat hkum ai majaw KIA magam gun ni ka-ni tam sha yak wa ai lam hpe na chye lu ai. Ndai zawn re hta June (23) ya shani KIA Dap Dung (3) na Gyi Hawng Hkawng wa gaw Saga Pa mare de du sa wa nna Mare Salang Dashi Nawng Hkum hpe sa du zingri lai wa ai re lam, Slg. Dashi Nawng Hkum a baw hpe sinat hpaihka (sinat matu) hte galun waw da ya ai nna, hkum ting mung sinat hpaihka hte anyaw galun ya lai wa sai lam na chye lu ai. Ya ten Slg. Dashi Nawng Hkum hpe mare kaw sha tsi tsi lajang ya nga ai lam, lanam ta re majaw hkawm sa hkawm wa yak, mawdaw, cycle ni n mai hkawm ai majaw laga de sa tsi ya na mung yak hkak nga ai lam na chye lu ai.
Hkrun lam yak hkak ai rai tim ningma sawng ai majaw masha hte hpai nna mare kaba de sa du tsi lajang ra na re lam Saga Pa mare na myitsu salang langai mi kawn tsun shana lai wa ai. Slg. Dashi Nawng Hkum a baw kaw nna sai ni matut manoi pru nna, n gup kawn mung sai ni pru nga ai lam hpe na chye lu ai.

Ndai zawn KIA magam gun ni kawn mare masha ni hpe zingri zingrat ai lam hte seng nna, Saga Pa na myitsu salang langai mi kawn Jinghpaw Kasa de ya na zawn tsun shana wa ai.
"Myu Sha ni yawng myit hkrum gahkyin gumdin ra ai ten, KIA magam gun ni nan ya na zawn mung shawa masha hpe zingri ai lam gaw grai n htap htuk ai sha n ga, yawn hpa lam mung rai nga ai. Mau mung rai nan mau nngai. Mung shawa ni kawn sari sadang hte hpring ai, myu sha ni hpe makawp maga ai Shanglawt Dap hpe she ra sharawng ga ai, Myu sha ni yawng mung n dai zawn re magam gun ni hpe jawm shading sharai la na grai ra ahkyak nga sai, dai rai yang she sari sadang hte hpring tsup ai Shanglawt Dap byin tai wa na re," nga tsun shana wa ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။