Monday, June 24, 2013

Laiza Muklum Hta Ka-ni Nang Hpam Pat Jasan Lam Hpe Bawngban

(Kachinnet)

KIO Ginjaw Ka-ni Nang Hpam Pat Jasan Komiti (Drug Eradication Committee, KIO) kaw na woi awn let 2013 June (24) ya jahpawt hkying (8:00)am aten Laiza Muklum, Munglai Hotel, Zuphpawng Gawk hta “Mungkan Ka-ni Nang Hpam Ninghkap Masat Ninghtoi Ramma Bawngban Hpawng” ngu ai ga baw hte zuphpawng hpaw hpawng galaw ai lam chye lu ai. 

Wunpawng Mungdan Shanglawt Asuya, Shiga Magam Dap Ningtau Lithkam Du Kaba Nhpang Naw Bu kaw nna zuphpawng hpa-awn lit la let, Wa Jau Nbwi Naw kaw na hpawng ap kyu hpyi ya ai hpang saw shaga tawn ai dat kasa ni hpe shachyen ya ai lam hpe galaw ai. 


Ginjaw Ka-ni Nang Hpam Pat Jasan Komiti a Ningtau Ningbaw Du Kaba Zawng Buk Htan kaw na hpawng a yaw shada ai lam hte mungga jaw ai hta, (1)pat jasan bungli hpe grau dam lada ai hku galaw lu na matu, (2) pat jasan bungli galaw ai ni yawng a ningmu kahkyin la lu na matu, (3) pat jasan bungli hpe K.I.O wuhpung ginra hte Myu mare buga de galaw nga ai ni shada ta gindun let galaw sa wa lu na matu yaw shada ai re lam, sumtsan buga ni kaw nna Laiza du hkra hkrun lam yak hkak jam jau ai lam nga ai raitim du hkra sa du bawngban lawm ai hpe kabu chyeju dum ai lam hte Ka-ni nang hpam hpe atsai sha pat jasan kau lu na matu masha gu dek gasat shamyit lawm ra ai lam shatsam mungga jaw ai lam hpe chye lu ai. 

Zuphpawng hpa awn kaw nna ra mara ndau shana ai hta, bawngban hpawng hta ningmu kahkyin la lu na matu n dut n dang wang lu wang lang tang madun bawngban jahkrup mai ai lam, Mungkan Ka-ni Nang Hpam Ninghkap Masat Ninghtoi hpe madi shadaw let Mung Shawa Dap Shawa yawng shanglawm ai ‘Mungkan Ka-ni Nang Hpam Ninghkap Masat Ninghtoi’ hpawng lamang hpe June (26) ya jahpawt hkying (8:00)am aten Laiza Muklum, Rawt Ninghkawng Gawknu hta galaw sa wa na re lam hpe tsun shana dan ai lam hpe chye lu ai.  

Hpawng hta du sa ai ramma ni kaw nna mahkrum madup hte ningmu ni hpe tang madun ai lam, bawngban ai lam ni hpe galaw ai rai nna, hpawt ni mung bawngban lam hpe matut galaw sa wa na re lam chye lu ai. 

Zuphpawng hta makam masham buga hpung shagu na ramma dat kasa ni, K.I.O Magam Dap hte Makan Dap de na Du Salang hte magam gun ramma ni, kaga laksan saw shaga da ai NGO uhpung ni, Ginwang Ginjaw shagu na Ka-ni nang hpam pat jasan komiti dat kasa ni yawng marai (150) jan sa du shang lawm ai lam hpe chye lu ai.

Matut nna, June (26) ya shani hkying (1:00)pm aten, Ka-ni dawn jasan nga ai prat ningnan dabang masha ni hpe Hpaga Hka, Tsawm Jat Gawk Nu hta ramma dat kasa ni kaw na hpaji jaw, n-gun jaw hkaw tsun ai lamang galaw sa wa na re lam chye lu ai.

du sa ai ramma ni

Wa Jau Nbwi Naw kaw nna Chyum Mungga hti nga yang

du sa ai hpa awn Du Salang ni

du sa ai ramma ni

Madun Gawk shara mi hta yu hpaji la nga ai amyu shayi ni


Ka-ni lu sha ai hta lang ai arung arai ni

mawn sumli da ai ka ni lu sha arung arai 

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။