Sunday, June 30, 2013

Laiza Kaw Htunghking Hte Labau Sharin Jawng Yu Hpawng Galaw

(Kachinnet)

June (29) ya jahpawt hkying (8:00)am aten, Laiza Muklum, Sinpraw Majoi Manau Gawknu hta Wunpawng Mungdan Shanglawt Asuya, Wunpawng Htunghking  hte Laili Laika Magam Dap kaw na hpaw masat ai shawng nnan lang ngu na Wunpawng htunghking hte labau sharin jawng yu hpawng lamang hpe galaw ai lam chye lu ai.

Hpawng hta jawng a komiti ningbaw Lat Du Up Jum Wana Yaw Htung kaw na hkalum ga hte jawng hte seng ai hpe tsun sanglang dan nna, Saranum Kaba Nding Tawng Ra kaw nna jawng hte seng ai sumtang hpe tang madun ai. Wunpawng Mungdan Shanglawt Kongsi Amu Madu Salang Kaba Lama Gum Hpan kaw nna mung Wunpawng shada n ginghka hkat ai sha makai hkak ra ai hte Wunpawng amyu sha labau, htunghking hpe gawgap shangang sa wa ra ai lam jawng ma ni hpe sa du shatsam mungga shaga ai hpe chye lu ai.

Matut nna Lat Du Up Jum Namdaw Nuk Gan (Htunghking Hte Laili Laika Magam Dap Ningtau Lit Hkam) kaw nna jawng yu jawng ma marai (15) hpe jawngyu lakmat shagrau ya nna, ningtawn ai jawngma ni hpe kumhpa shagrau jaw ai lamang hpe mung galaw ai lam chye lu ai.

Ndai jawng hpe sharin ladaw (2) ning masat da nna sharin ginhpan ni gaw Jinghpaw laika, Miwa laika, Wunpawng ginru ginsa labau, manau nau ai hpaji, shachyen shaga, num wawn numla hte shat lit baw ai hpaji, prat dep madum sumpyi, htunghking malu masha shadu lu shadu sha hpaji, ka manawt hpaji, nsi note, mahkawn ka shalat hpaji, mawn sumli hte Computer hpaji ni re lam, du na sharin ladaw hta grau hkum tsup hkra sharin sa wa let sharin ladaw hpe mung jat na re lam chye lu ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။