Friday, June 14, 2013

K.I.O Ginjaw Komiti Salang Ni Hpe Laiza Buga Hpung Shawa ni Magun Shat Lit Gun Jaw Ai Lam

(Kachinnet)

2013 June (14) ya jahpawt (8:00)am aten Laiza Buga Hpung shawa ni hku nna K.I.O Ginjaw Komit Salang ni hpe magun shat lit (4) hte Dumsu (1) jaw ai lamang hpe Laiza, Padang Hkrunlam Hpyen Majan Masing Woi Awn Rung Daju Gawknu hta galaw ai lam chye lu ai.

Magun shat lit hpe Laiza Buga Hkalup Hpung, Rev. Lahpai Shing Rip kaw nna ap ya ai hta,  Laiza buga hpung shawa hku nna magun shat lit gun jaw ai lam gaw, rawt malan nnan hpang ai kaw nna dai ni na aten du hkra lam woi nga ai K.I.O Ningbaw Kaba hte Ginjaw Salang ni hpe grai hkungga ai hte kam hpa  nga ai lam, K.I.O kaw nna anhte hpe makawp maga la ai majaw grai kabu chyeju dum ai lam, saboi ntsa kaw Mung masa bawngban woi awn nga ai K.I.O Dat Kasa hpung ni hpe grai arawng la ai lam, matut nna mung myu sha ni hpe lam woi ningshawng na matu shatsam ai magun shat lit re lam hpe chye lu ai. 


Wunpawng Mungdan Shanglawt Kongsi Amu Madu Salang Kaba Lama Gum Hpan kaw nna mung, ndai zawn magun shat lit hte sa du sa gun jaw ai majaw tsun ndang hkra kabu chyeju dum ai lam, KIO rawt malan a ru jung dahpran shara mare buga tai ya ai majaw anhte K.I.O a matu nsa bai lu hpaw la ai gaw ndang tsun hkra re, dai majaw K.I.O gaw grai kabu chyeju dum arawng la kam hpa nga ga ai lam hpe tsun shana dan ai lam chye lu ai.

Matut nna Wunpawng Mungdan Shang Lawt Hpung Tingnyang Up, Wunpawng Mungdan Shanglawt Kongsi Ningbaw Kaba Lanyaw Zawng Hra kaw nna mung, ra ai lam ni hta matut hpaji jaw la na matu hte du na ten  hta mung lahkrip ra ra rai yawng a man e myithkrum ai hte grau kahkyin gumdin sa wa ra ai lam ni hpe tsun shana ai lam chye lu ai.






No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။