Wednesday, June 5, 2013

စစ်ပွဲများမှာ လူကုန်ကူးမှု ပြဿနာ၏ အကြောင်းရင်းတခုဟု အစီရင်ခံစာဆို

(Mizzima)


ကချင်ပြည်နယ် အတွင်း ဖြစ်ပွားသော တိုက်ပွဲများကြောင့် တရုတ်-မြန်မာ နယ်စပ်တလျှောက် လူကုန်ကူးမှု ပြဿနာများ ပိုမိုကြီးထွားလာစေကြောင်း ယနေ့ ထုတ်ပြန်လိုက်သည့် အစီရင်ခံစာ တစောင်တွင် ဖော်ပြပါရှိသည်။

ထိုင်းနိုင်ငံအခြေစိုက်၊ ကချင်အမျိုးသမီးများ အစည်းအရုံး (KWAT) ၏ “ချောက်ကမ်းပါးစွန်းသို့ တွန်းပို့ခံရခြင်း”  (Pushed to the Brink) အမည်ရှိသော အစီရင်ခံစာအား ဘန်ကောက်မြို့ရှိ နိုင်ငံခြား စာနယ်ဇင်းကလပ် (FCCT) တွင် သတင်းစာရှင်းလင်းပွဲ ပြုလုပ်၍ ထုတ်ပြန်လိုက်ခြင်း
ဖြစ်သည်။


နှစ်နှစ်ကြာ ကာလအတွင်း ပြည်သူလူထု ၁ သိန်းကျော်
နေရပ်မှ စွန့်ခွာ၍ ရွှေ့ပြောင်း နေထိုင်ရပြီး ကာကွယ်ပေးမှု ကင်းမဲ့ခြင်းနှင့် လူသားချင်းစာနာ ထောက်ထားမှု အကူအညီများ ပြတ်လပ်ခြင်းတို့မှာ မဖြေရှင်းနိုင်သေးသည့် တရုတ်နိုင်ငံသို့ ကချင်အမျိုးသမီးများ လူကုန်ကူး ခံနေရမှု
ပြဿနာကို ပိုမိုအားမြှင့်ပေးနေကြောင်း အစီရင်ခံစာက
ထောက်ပြဝေဖန်ထားသည်။


“ဒီနေ့ထိ စစ်ပြန်လည် ဖြစ်ပွားတာက နှစ်နှစ်ဖြစ်သွားပြီ။ ဒီအတောအတွင်းမှာ အမျိုးသမီးတွေ ဘဝ ဘယ်လို အကျိုးသက်ရောက်မှုရှိလဲဆိုတော့ အမျိုးသမီးတွေက လူကုန်ကူးမှု ခံရသွားတယ်။ ပြဿနာ အရင်းအမြစ်ကို ပြန်ကြည့်မယ်ဆိုရင် နယ်စပ်တလျှောက်က ဒုက္ခသည်တွေက လူသားချင်းစာနာထောက်ထားမှု အလွန်နည်းပါး တယ်။ အစိုးရက တားမြစ်ထားတာကြောင့် ဖြစ်တယ်” ဟု KWAT ၏ ပြောရေးဆိုခွင့်ရှိသူ ဂျူလီယာ မာရစ် က မဇ္စျိမကို ပြောသည်။

၂၀၁၁ ခုနှစ် ဇွန်လမှ ၂၀၁၃ ခုနှစ် ဧပြီလအတွင်း KWAT ၏ လူကုန်ကူးမှု တိုက်ဖျက်ရေး အစီအစဉ်အရ တရုတ် နယ်စပ် လိုင်ဇာနှင့် မိုင်ဂျာယန်တို့တွင် လူကုန်ကူးမှု သို့မဟုတ် လူကုန်ကူးမှု မြောက်နိုင်ဖွယ် ရှိသော ဖြစ်ရပ်ပေါင်း ၂၄ ခု တွေ့ရှိသည်ဟု အစီရင်ခံစာတွင် ဖော်ပြထားည်။

ယင်းအမှုများထဲမှ လူကုန်ကူးခံရသူ အများစုမှာ စစ်ပြေးဒုက္ခသည် အမျိုးသမီးငယ်များ ဖြစ်ကာ လိမ်လည်လှည့်ဖျား ခံရပြီး မူးယစ်ဆေးဝါး အထိုးခံရကာ အဓမ္မ ပြုကျင့်ခံကြရသည်သာမက တရုတ်အမျိုးသားများ သို့မဟုတ် တရုတ်မိသားစုများ၏ ဇနီးမယားအဖြစ် တဦးလျှင် ယွမ် ၄၀,၀၀၀ (အမေရိကန်ဒေါ်လာ ၆,၅၀၀) ခန့်ဖြင့်
ရောင်းစားခံရသည်ဟု အစီရင်ခံစာက ဆိုထားသည်။

အသက် ၁၅ နှစ်မှ ၅၄ နှစ်အကြားရှိ အမျိုးသမီး အများစုမှာ မိသားစုများ ဝင်ငွေ နည်းပါး၍ တရုတ်နိုင်ငံ ရွှေလီ၊ ရင်ကျန်း၊ ထိန်ချုန်း၊ မန်ရှီ၊ ခွေးမင်း၊ ဖိုကျန်း စသည့် မြို့များ အပါအဝင် ယူနန်ပြည်နယ်အတွင်းရှိ ကျေးရွာများသို့
ရောင်းစားခံနေရသည့် အမှုများ ပိုမိုများပြားနေကြောင်း အစီရင်ခံစာတွင် တွေ့ရှိရသည်။

ယင်းအမှုများသည် နယ်စပ်အခြေစိုက် KWAT ထံ ကယကံရှင်များ လာရောက်တိုင်တန်းခြင်း ဖြစ်ပြီး ၎င်းတို့နှင့် မိသားစုများ၊ မျက်မြင်သက်သေများနှင့် KWAT အဖွဲ့ဝင်များ တိုက်ရိုက် မေးမြန်း၍ အချက်အလက်များ ကောက်ယူခဲ့ သည်ဟု ပါရှိသည်။

တရုတ်နယ်စပ်အတွင်း အသိအမှတ်ပြုမခံရသော ကချင်စစ်ပြေးဒုက္ခသည်အများစုသည် နယ်စပ်တလျှောက်ရှိ ဒုက္ခသည်စခန်းများတွင် ကြပ်တည်းစွာ ခိုလှုံနေရသလို အများစုမှာ ဝင်ငွေရရှိရေးအတွက် တရားမဝင် နယ်စပ်
ဖြတ်ကျော်နေမှုများသည်လည်း လူကုန်ကူးခံရမှု အခြေအနေကို ဆိုက်ရောက်စေသည်ဟု သတိပေးထားသည်။

အစိုးရ၏ “လူကုန်ကူးမှု ဆန့်ကျင်ရေး အထူးလုပ်ငန်းအဖွဲ့များ” မှာ ကချင်ပြည်နယ် တရုတ်နယ်စပ် လွယ်ဂျယ်၊ ရှမ်းပြည်နယ် မူဆယ်တို့တွင် ရုံးဖွင့်လှစ်ထားရှိသည်။

အစိုးရအား ကချင်ပြည်နယ်အတွင်းရှိ စစ်တပ်များ ဆုတ်ခွာပေးရန်၊ စစ်ပွဲများ ရပ်စဲ၍ နိုင်ငံရေး ဆွေးနွေးညှိနှိုင်းမှု
ပြုလုပ်ရန်၊ ကချင်စစ်ပြေး ဒုက္ခသည်များအတွက် အရေးတကြီး လိုအပ်သော လူသားချင်းစာနာထောက်ထားမှု အကူအညီများ အမြန်ဆုံး ထောက်ပံ့ကူညီပေးရန်နှင့် လူကုန်ကူးမှု ပြဿနာများအား ထိရောက်စွာ ကိုင်တွယ်ရန် အစီရင်ခံစာက တိုက်တွန်းလိုက်သည်။

တရုတ်အစိုးရအနေနှင့်လည်း နယ်စပ်အတွင်း စစ်ပြေးဒုက္ခသည်များအား တာဝန်ယူမှု၊ ခိုလှုံခွင့်ပြုရန်နှင့် လိုအပ်သော အကူအညီများ ထောက်ပံ့ပေးရန် တောင်းဆိုထားသည်။

KWAT သည် ကချင်အမျိုးသမီးများ တရုတ်နိုင်ငံတွင် ရောင်းစားခံရကာ သားမယား ကျွန်ပြုခံ နေရကြောင်း “အရှေ့ခြမ်းမှ တည်းနှောင်ခံရမှု (Eastward Bound)” အစီရင်ခံစာကို ၂၀၀၈ ခုနှစ်က ထုတ်ဝေခဲ့ပြီး “တွန်းပို့ခံရခြင်း Driven Away” အမည်ရှိ အစီရင်ခံစာကိုလည်း ၂၀၀၅ ခုနှစ်က ထုတ်ဝေခဲ့ပြီး ဖြစ်သည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။