Monday, June 10, 2013

AWMDAWM SHANGLAWT ASAK

(Jinghpawkasa)

Rawt malan shanglawt asak gaw 54 ning de du kabye wa saga ai zawn asak gye u-gut gu ai de du shang wa saga ai raitim, shanglawt lu na myit jasat gaw ya she naw hkalung dik ai ma zawn byin nga ga ai kun? Shanglawt ai myit jasat, magam myit madu myit lit, la gwi ai, lit gun gwi ai ni annau ni byin tai nga sai kun? Kata lam myit ga garan shen ginhka dinglik dinglun yu ra dik nga sai.


Hpa rai annau ni shakut hkawm sa nga ai shanglawt asak rawt malan majan chyinghkraw gaw galu nga ai kun? Hpa majaw kun? Mung masa ku de bawngban shangut na matu n’bung sinat law law gap ai hta, sinat hpai hka n’tsa kaw awmdawm shanglawt hpe mara tawn n’na, madi shakyin gap jahkrit gasat la ai gaw madung naw rai na kun? Annau ni shanglawt hpe sai hte matut galai la ai gaw madung she naw rai na re ngu mu ai.

Manang wa hpe dang kau lu na, lau la lu na matu gaw manang wa a myit masin kraw kata kaw shang rawng yu ra ai hte manang wa ra ai hpe chye kau ya lu yang she manang hpe dang kau lu na re jaw dai ni tai hpyen wa myit kata masa kata, hpa madung ra nga ai byin mayu nga ai hpe annau ni tau hkrau kau lu yang awmdawm shanglawt gaw ya du nga ai annau ni a ban e nan shanglawt lu na.

Dai ni annau ni hpa majaw majan chyinghkraw galu nga ai kun? Galu dik jamjau dik ai zaibru jang hkrun lam hpe myu sha ji n’ban yawng hkrap ngu hkrap ngoi sai hte, salu salat hte shaning galu maroi n’ni hkawm sa ra nga ai kun? ngu ai hpe ja ja myit shachyaw yu ra sai. Hpa majaw kun? hpa hta ra nga ai kun?

Annau ni a numshawn shaw nga ai mung masa, ninggawn mung masa lam hpe ja ja ga garan shen ginhka yu ra nga ai. Zai ladat byeng ya mung masa ladat hte hpyen zai ladat ni uphkang tara ladat ni jashai kau ra sai ngu sawn lu ai. Tara hkrang hpe ga garan shen yu ra ai zawn mung masa num shawn hpe mung kalang bai shen yu ra sai. Myu sha mung masa lam hpe zai ladat kalai kau ra sai.

Mung masa, hpyen masa, sut hpaga masa, rawt jat lu lawm lam matut mahkai masa, makam masham hte mung masa hpe lahkawng brang shen yu ra ai zawn, myu sha mung masa hte myu sha makam masa hpe shingdaw shen yu ra nga ai. Makam majan gaw byin nga ai majan hta grau sawng wa chye ai.

Dai ni annau ni yawng a n’tsa mara nga ai labau jaw lit kaba yi ngam n’dai hpe awmdawm shanglawt na matu lamang , myi man 2 pawng na masing jahkrat shawng de jawm sit sa ra sai. Maigan du myu sha uhpung mung masa uhpung hku n’na, mung masa numshawn a matu hpaji daw awmdawm shanglawt n’dau lit la lit gun ya ai hte, ta tut bungli lit la hkrang shapraw ya nga ai KIO/KIA hpe hpaji jaw ya rai ra ai zawn, shingdu n’gun kaba madi ya ra nga ai. KIO/KIA ningbaw kaba, salang kaba ni hku na tatut hpyen masa hpe grau n’gun shadat ai hte ahkyak kaba ai shara ni de hpyen masa shamu shamawt ya yang she lahkawng maga lahkrip ra ra chyawm shamawt yang awmdawm shanglawt gaw annau ni lata kaw jau du na re.

Sai daw sai chyen ni jamjau hkrum nga ai, hpyen yen tsin yam ni mung prat mi kalang myu sha yawng a matu jamjau saga ai re jaw matut n’na shanglawt lu hkra jahtum du naw hkam sharang ga ngu mayu ai zawn, maigan du annau ni yawng mung yingam shangut na ten hta grau n’na n’gun kaba hte naw garum la marit. Hpu nau Wa ni sinat gap dat ai hte rau annau ni mung annau ni buga kaw jahtum majan hpe hpaw hpang n’na shagrawt majan gasat na jin jin hkyen tawn ra sai. Jahtum jamjau, jahtum majan she rai nu ga.

Baren Numraw

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။