Wednesday, May 22, 2013

RAM AI NGU NA KUN?

(Jinghpawkasa)

LAGANG:- Lai wa sai 11-12 April 2013 shani KIO hte Myen gaw Miwa salang ni shang lawm ai hte Shweli kaw hkrum bawng wa ai rai yang, Miwa a lai hpe n ra sharawng ai lam Myen maga de aja awa tsun garu wa masai. Dai hpang ndai May 6 ya shani Myitkyina kaw hkrum bawngban na zuphpawng hta mung UN, USA, UK, Miwa ni shang madat lawm na matu myit hkrum nna hkyen lajang tawn masai. Raitim, amyu myu jahpai masu nna Myen maga na ni zuphpawng hpe dawm kau masai. Madung gaw Myen ni ra sharawng ai mahkrun de shang wa hkra jahtuk la ai ladat rai nga ai. Mungdan kaba ni a ntsa kaw ndai zawn galaw lu ai hpe “ram ai ngu na kun” Ngai gaw ndai lam hte seng nna myit ung-ang mat re sai. De a ntsa salang nan gaw gara hku mu ai law?


PYILAN:- Anhte a ma ni gaw ginsup chyai let jut shagu hkan pyen hkawm ai nga yang shiga amyu myu hkan na wa ai hpe gara gaw ram ai ngu na kun, gara gaw shim lam tawn ra ai baw rai kun, n chye ai majaw branglang rai hkan tsun wa masai. Myen gaw mungkan hpe myakle madun lu na matu masha hpan amyu myu (nhkru ai, simani ai, hpaji ninghkring ni) ra yang ra ai hku shanhte ra sharawng ai de pru wa hkra jahtuk la nna, sumla dem ai kaw director galaw nhtawm shara nkau kaw gaw grai pawt singdawng ai zawn ga law dan nhtawm shi nan shang lawm ai sumla hkrung ni hpe dem madun chye ma ai. Raitimung, kaga rawt malan hpung ni hte hkrum bawng ai kaw shinggan masha ni shang lawm n ra ai zawn, myakle madun na mung n ra, aten kadun gan dung la ai hte hpung langai a hpang langai hkrum bawng shakre wa masai. Rai yang hpa majaw KIO hte shaning hti nna nlaw htum 13 lang hkrum bawng wa masai raitim myit hkrum lam lama ma sha pyi rai n lu wa ma ai. Dai majaw Myen gaw KIO hpe myit ja ai ni re, nga nna ndau nga ma ai.

Maigan masha ni gaw hpa majaw KIO dai daram myit ja nga ma ai kun, ngu ai hpe chye mayu nna hkaja wa yu yang mu ma ai gaw:- KIO a npawt nhpang lam hkaja yu ai shaloi Wunpawng myusha ni kaw na shangai chyinghkai wa ai ni rai nna, bungli kaba langai ngai hta ahkyak ai lahkam htawt sa na rai yang, kanu kawa ni rai nga ai mungmasha myitsu salang ni hte hkut hkut nai nai shawng bawng jahkrup nna dawdan ma ai. Dai daw dan lam gaw ta tut galaw sa ai kaw myusha lam yan hta n-gun ja hkra shawng shachying lu ai masing gaw ngangkang ai npawt nhpang rai nna, myit ja ai ni n re, ngu ai hpe mu ya wa masai. Rai yang, matut nna Wunpawng myusha ni a matu myit mada shara hpa baw nga na kun?

PRANGTAI:- Kadai raitim, nau hkrit nau tsang ai ni a matu gaw myit mada shara n nga ai. Raitim KIO gaw Wunpawng myusha a matu sha n rai, Myenmung ting a matu lu ging ai ahkaw ahkang ni lu wa hkra ahkyak la na matu nnan kaw nna masing jahkrat tawn ai lam nga masai. Myenmung gaw British a lata na shanglawt lu wa ai shani kaw nna grau matse ai Myen asuya a lata de shang mat ai majaw mungdan ting hpe shalawt la lu na matu awmdawm ahkaw ahkang lachyum lawm ai KIO hpe gaw-gap shachying dat ai lam Ningbaw Kaba Lahtaw Zau Seng tsun ai hpe na wa yu saga ai..

Dai ni na ten hta rawt malan hpung ni pawnghpawm nna Myenmung ting a matu myit mada shara nga ai United Nationalities Federal Council (UNFC) hpe hpaw shabawn tawn lu masai. KIO Ningbaw Malai Du Kaba Nban La gaw UNFC a Ningbaw rai nna Duwa Bawmwang La Raw gaw Maigan Kyithkai Lithkam re. Dai hta n-ga, KIO a Ninggawn Amu Madu Dr. La Ja gaw ahkyak ai uphkang lam hpe tek jum ya nga ai. Du Kaba Nban La tsun ai hta, matut nna UNFC n-gun ja wa na matu kungkyang ai hpaji ninghkring ni hpe jat bang mat wa na re. Dai shaloi UNFC gaw mying dan hkung wa let maigan kaw na madi shadaw ai hta madang grau tsaw wa nna Myenmung ting a matu myit mada shara npawt nhpang ngangkang wa na re, nga ai.

Duwa Bawmwang La Raw gaw tinggyeng n-gun, tinggyeng ja gumhpraw ma hkam nna UNFC a maigan kyithkai lam hta maden wa lu na matu maga mi hku nna mungkan de matut mahkai ai kaw grau dam lada ai madang hte woi awn sa wa lu na matu tara hpaji ninghkring ni maigan kyithkai dap kaw shang lawm na matu masha lata tawn wa magang sai. Kade nna ai laman UNFC a madang hpe shatsaw dat lu na sai lam tsun wa ai. Shing re ai masa hta hkan nna KIO hpe jawm madi shadaw wa ai zawn, ndai ten kaw nna Myenmung ting a matu awngdang lam woi awn sa wa na UNFC hpe mung aten dep aja awa jawm madi shadaw ra masai.

Tai hpyen wa a hkyen lajang ai masing hpe law lu ai daram law hkra hkaja la lu ai gaw shawng lam na mungmasa, hpyen masa hkyen lajang ai hta awngdang lam lu wa na matu kayin gaye jahtuk mai na re. Dai majaw tai hpyen wa a myakle lam matut jahta yu ga. Myen asuya gaw hpa majaw mara kata kaw mungmasha ni hpe n shadawn n sharam htawng kaw masawm bang nga ai kun! Ahkyak ai lamyi du wa shagu mungkan kaw myiman tam ai hta shanhte ra sharawng ai hku htawng kaw na shalawt ai lam galaw dan nna, maga mi de gaw ding yang rim bang ai hpaji lang nga ma ai.

Ya hte sha mung Thein Sein USA de sa mahka htawng masha nkau hpe tau nna shalawt dat ai hte myiman shawng shapa la nna sa wa nu ai. Shing rai Washington D.C. du ai shaloi mungdan ngwi pyaw simsa lam lu wa na matu atsam htum hte shakut nga ai majaw mungdan ting na rawt malan hpung in yawng simsa lam la tawn masai lam, KIO hpung langai sha ngam sai lam, maigan mungdan ni jawm garum ai hte mungdan ngwi pyaw simsa wa na sai lam tsun wa sai. Raitimung shi tsun na malap kau ai gaw, gap hkat jahkring tawn nna simsa lam la tawn sai ginra hkan e shani shagu majan matut gasat nga ai lam hte shi gaw mungdan ting kaw tsaw htum ai power lu timung hpyen la langai hpe dung u, rawt u, ngu nna matsun jaw yang n madat ya ma ai lam rai nga ai.

Myen asuya gaw sinpraw hte sinna mungdan kaba ni hpe shalen la nna Myenmung hpe bawlung pa shatai let ginsup shangun nga ma ai. Rawt malan hpung ni hte simsa lam hkrum bawng shagu kadai mi sum sum, shanhte gaw amyat lu wa na matu tau hkyen lajang la chye ma ai. Masha langai hpe gawai ai ladat hte hka nawng kaw ganawng bang nna bai shaw la ai hte shi hpe asak madu hku chyeju dum hkra chye jahtuk la ma ai. Dai hte maren hpaji ninghkring hpe htawng kaw jahkrat dat nna, kaga langai gaw sa garum shaw la ai hte dai hpaji ninghkring gaw shi a chyeju madu hpe shi a n-gun atsam htum hte garum wa hkra mung jahtuk la chye ma ai.

Dai hte maren maning na ra lata poi hta punghkum 44 man ai kaw na 43 dang la ai gaw tara ai hte dang la ai nan rai sai. Kaja sha nga yang Myen asuya kaw tara ai lam rai n nga yu ai. Raitim ndai ten hta Ma Kaw hpe n lang n mai ai hkinjang pru wa ai. Madung gaw:- (1) Thein Sein myiman pa wa nna maigan mungdan hkan na madi shadaw wa na matu, (2) Myenmung gaw 2014 kaw ASEAN a ningbaw byin wa na matu, (3) Mungmasha ni gaw 2015 ning na ra lata poi kaw tara hte bai galaw wa na hpe kam nna shang shingjawng lu hkra wanglu wanglang hkyen lajang na matu, (4) Rawt malan hpung yawng mung gap hkat jahkring tawn nna ra lata poi hpe jawm madi shadaw wa na matu yaw shada ai rai na re. Kaja sha nga yang ra lata poi a mahtai gaw bum de lung na kun, hkaraw de yu na kun, ngu ai gaw tau hkyen tawn ai madang hta hkan wa na re.

LAGANG:- Myit hpaji hpe npawt nhpang tawn nhtawm maram masam galaw ai salang nan a ningmu gaw lachyum grai sung ai majaw teng na, n teng na ngu ai hpe aten du ai shaloi she sakse hkam lu na re ngu mu ai. Myen asuya gaw sinpraw sinna de na mungdan kaba ni hpe myakle madun let gang ashun lu ai hpe jawm mu nga saga ai re. Kaja nan ram ai masha ni ngu ai gaw shinggyim masha ni a matu mai kaja ai lam galaw lu ma ai. Raitimung chyahkyawn zawn ram ai ni hpe gaw matse labye re ai ni hku nna masat ma ai. Dai majaw yi-ngam hpe yu ai hte ginchyum gara kaw dat hkyen ai lam maram la nhtawm myusha a shawng lam hpe du mayu ai shara de shading sharai sa wa lu na matu gaw Wunpawng myusha yawng a lit nan rai nga sai ngu mu ya ai law.

Puk Dun

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။