Friday, May 17, 2013

MAJAN WAN SHACHYI NA KUN? MAJAN WAN SHAZIM NA KUN?

(Jinghpawkasa)

Majan wan shachyi na kun? Majan wan shazim na kun? Ngu ai ndai GA SAN? Lahkawng gaw a-dingtawk PANGLUNG GA SADI hta sha madung rai nga ai. Panglung ga’sadi si taw nga dingsa majan wan gaw chyi taw nga chyalu sha re. Dai hte maren. Panglung ga’sadi hpe asak bai jahkrung lu jang majan wan hpe shazim lu na.


Myen asuya gaw hpyen n-gun, laknak n-gun, masha n-gun hpe kam nna Panglung ga’sadi hpe n hkap la hkraw ai. Lachyum gaw myen mungdan a mungmasa dinghku manghkang hpe majan hte hparan nna gasat dang ai wa up sha ngu ai lachyum rai nga ai.

Raitim daini na democracy mungkan gaw dai hku n rai mat sai.Majan hte chyu sha hparan mayu ai wa gaw hpang jahtum TARA-HKAM byin mat nna ku ntsa (saboi) kaw tara jeyang ai shaloi hkrat sum mat na rai nga ai. Dai majaw myen hpyen asuya gaw jan shang mat na ten du wa sai.

Hpa majaw nga yang sadi n dung ai myen asuya gaw panglung ga sadi hpe n hkap la hkraw ai hta n-ga lang hte lang sadi run nna hpyen majan hte hkrai hparan mat wa ai re majaw tengman ai ku(saboi) hpe koi yen n lu mat sai ten rai nga ai.

Daini Annau ni laknak lang rawt malan ai gaw, Majan hpe grai ra sharawng nna n re, myen asuya a ta-tut satlawat, akyang lailen yawng gaw Panglung ga sadi hte tsepkawp ninghtan shai mat ai majaw ninghkap na matu lang ai laknak she re. Anhte shut ai lam tsepkawp n nga ai.

Panglung ga’sadi hpe asak bai jahkrung lu na matu gaw myen asuya hte anhte rawt malan bawsang ni chyu sha hkrum jahta yang gaw gade lang hkrum bawngban tim mai byin na masa n nga ai.Tengman ai ku n tsa (saboi) kaw rai yang sha pang lung ga’sadi hpe asak bai jahkrung lu na re.Tengman ai ku n tsa (saboi) gaw UN hte mungdan kaba ni, wuhpung wuhpawng ni nan shang dung lawm yang sha pang lung ga’sadi hpe asak bai jahkrung lu na re.

Pang lung ga sadi hte seng nna nambat- 2 panglung ga sadi hpe madaw kalang mi bai jawm ka lajang ga ngu ai gaw kalang mi bai mawlanyet shaw n na bai masu hkrum na sha re. Tsun mayu ai gaw nambat- 2 panglung hpe ninghkap shingla ai n re, myit n hkrum ai n re. Kaja wa mai byin ai lam langai gaw nambat- 1 panglung hpe shawng asak jahkrung tawn lu yang she nambat- 2 panglung hpe ta-tut hkrang shapraw lu na ngu mu mada ai.

Hpang jahtum myen asuya ni hku nna panglung ga’sadi hpe n kam hkap la jang gaw shan hte myen ni hpe madaw munghpawm kaw nna laga laksan mungdan langai mi hku nga na matu ahkang jaw kau ra na re. Anhte ga-garan pru ai hku n re sha shanhte myen amyu ni hpe madaw ga-garan pru na ahkang jaw kau ra na re. Dai shaloi she anhte myu kaji bawsang ni nganggrin ai simsa lam hpe hkamla lu na re ngu mu mada ai.

Dai majaw daini annau ni hpe woi-awn taw nga ai KIO/KIA ningbaw ningla ni ya du wa na ku n tsa (saboi) kaw gwi gwi dawdan ra sai ngu mu mada ai law.
Sau Nan Du

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။