Sunday, May 19, 2013

Htoi Ningshawng Hpaji Jawng Hpaw Hpang

(Kachinnet)

Sinpraw Ginwang Ginjaw, Wung Gau Bum lawu kaw KIO Ramma Woi Awn Komiti kaw nna hpaw ninghtan tawn da ai Htoi Ningshawng Boarder hpe 2013 May (18) ya jahpawt hkying (9:00)am aten hta Laksan Htoi Ningshawng Hpaji Jawng hku nna hpaw masat hpawng galaw la lu sai lam hpe chye lu ai. 

Jawng Hpaw hpawng hta KIO Ginjaw Komiti Salang, Ningtau Ninggawn Amu Madu Sara Kaba Kumhtat Hting Nan kaw nna Jawng hpaw hpawng hta sa du n-gun jaw ya ai hte Sinpraw Ginwang Ginjaw na Kanu Kawa myitsu salang law law mung jawng hpaw lamang hta sa du kabu lawm ai lam hpe chye lu ai. 


Htoi Ningshawng Hpaji Jawng  hpe 2013 June (3) ya shani kaw nna Jawng hpawng sharin hpang na re hte hpaji tsang (3-10) du hkra hkap la nhtawm Tsang (5-10) gaw Jawng Boarder kaw nan yup sha let laika sharin na hte Tsang (3-4) ni gaw Htoi Ningshawng ma kaji boarder kaw nna jawng de sa sharin la na re lam hpe chye lu ai.

Dai ning na hpaji ladaw hta Jawng Sara/Sara Num yawng marai (13) hte jawngma (100) tup hkap la na rai nna hpaji jawng na sharin hpan ni hte Miwa ga, Music, Hkai Rem hte hkumhkrang hkamja ginsup hpan ni hpe mung kahpyawn sharin mat wa na re lam hpe chye lu ai.

Htoi Ningshawng Hpaji Jawng gaw lam myu myu a majaw hpaji sharin na matu yakhkak nga ai jawng ma ni hpe hpaji matut sharin la lu na matu hkap la ai jawng re hpe chye lu ai.

KIO Ramma Woi Awn Komiti gaw Htoi Ningshawng Boarder hpe 2005 ning kaw nna hpaw ninghtan tawn da nna yakhkak hkrum nga ai jawngma, Ramma ni hpe laika hpaji matut sharin la lu na matu yaw shada let hpaw da ai re hte lai wa sai shaning na hpaji ladaw hta jawngma yawng marai (86) hpe hkap la sharin nga sai re lam hpe chye lu ai.

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။