Sunday, May 26, 2013

HPA MAJAW PANGLONG AGREEMENT HPE A’SAK JAHKRUNG RA AI?

(Jinghpawkasa)

Mara tam ai wa gaw mara lu na.
Tengman ai mahtai tam ai wa gaw simsa lam lu na.

Byin taw nga ai manghkang langai mi a ntsa e,. dai manghkang byin wa ai a npawt nhpang hpe shingdu tawn tawn ai wa gaw MARA TAM AI WA rai nga ai. Dai hte maren,.. dai manghkang byin wa ai a npawt nhpang hpe shawng kaw tawn ai wa gaw MAHTAI TAM AI WA rai nga ai. Byin wa ai manghkang a npawt nhpang hpe shingdu kaw tawn da nga dingsa,..
tengman ai mahtai nmai lu hkraw nga ai, dai manghkang mung nmai ngut kre hkraw nga ai. Byin wa ai manghkang a npawt nhpang hpe shawng kaw tawn nna hparan mat wa yang chyu sha tengman ai MAHTAI lu nna,.. dai manghkang hpe mung shangut shakre ginchyum dat lu nga ai.

Dai rai yang daini myen mungdan kata kaw aten ram ram galu mat wa nga ai dinghku majan manghkang a npawt nhpang gaw hpa baw rai ta? Ndai dinghku majan manghkang a npawt nhpang hpe myen asuya ni mung chye ai. Laknak lang rawt malan taw nga ai myu bawsang ni yawng mung chye ai. Laknak nlang ai Party uhpung uhpawng ni yawng mung chye ai. Myu bawsang ni yawng ra sharawng myit mada ai Federal re.

Raitim, Panglong Agreement nlawm ai federal hte Panglong Agreement lawm ai Federal, ndai yan lahkawng gaw wa’shakap hte pasitum hpa grai shai hkat ai. Daini Annau ni ra sharawng myit mada ai Federal gaw Panglong Agreement hte gawgap ai Federal she rai ra ai.

(1) Panglong Agreement hte n-gaw gap ai Federal (Majority Power Control Federal)
(2) Panglong Agreement hte gawgap ai Federal (Ethnic Self-determination Federal)

(1) Panglong Agreement hte n-gawgap ai Federal gaw masha jahpan grau law ai amyu ni ra’lata poi hte gamyet dang la nna up sha lu mat na ladat rai nga ai. Dai hku rai yang, ga’shadawn Arakain mungdaw kaw ya ten hta masha jahpan grau law ai gaw Rohingya ni re, Rohingya amyu ni 90% rai nna Arakain amyu ni 10% sha re majaw Rohingya ni hpe up sha kau shangun na i? Dai hte maren anhte Kachin Wunpawng amyu sha ni a mungdaw mungdan kaw myen amyu ni la’ma grau law yang shanhte myen amyu ni hpe up sha kau shangun na i? Ndai gaw Majority Power control federal re. Ya ten hta Thein Sein asuya lagu yaw shada taw nga ai Federal mung ndai Majority Power Control federal rai nga malu ai.

(2) Panglong Agreenent hte gawgap ai Federal gaw masha jahpan law nlaw hte hpa nseng ai. Tinang a mungdaw mungdan hpe TINANG MADU NI nan lam shagu hta dawdan hparan la na ahkaw ahkang lu ra ai re. Ndai gaw Ethnic self-determination federal re. Myen asuya ni ban hte ban ndai hpe nkam jaw ai majaw Panglong Agreement hpe jahten sharun ai re.
Dai majaw aten ram ram galu mat wa nga ai Myen mungdan a dinghku majan hpe shazim mat wa lu na matu gaw Panglong Agreement a’sak jahkrung tawn nna Ku (saboi) ntsa kaw Ethnic Self-determination lu hkra dara la ra na re.

Myen asuya ni hku nna Panglong Agreement hpe hkap la ai lam nnga dingsa KIO/KIA ni hku nna gap hkat jahkring myit hkrum TA’MASAT bai gahtap galaw na lam tsepkawp nnga ai. KIO/KIA hpe terrorists ni re ngu nna mara tam na lam nnga ai.

(1) Anhte kaw Panglong Agreement nga ai.
(2) 1994 ning hta gap hkat jahkring da ngut sai.
(3) Anhte sadi nrun ai.
(4) Shanhte myen asuya ni she sadi run nna 2011-06-09 ya shani kawn majan kaba hpaw hpang dat ai.
(5) KIO/KIA gaw terrorists nre ai.
(6) Myen asuya kaw nna Panglong Agreement hpe hkapla jang gaw gap hkat jahkring ai myit hkrum lam bai gahtap galaw mai ai
(7) Myen asuya a ntsa e kamhpa ai myit tsepkawp n rawng mat sai.
(8) Myen asuya hte KIO/KIA a lapran, lahkawng maga shada makam bai gawgap lu na matu mung Panglong Agreement dai langai sha nga sai.
Sau Nan Du

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။