Monday, May 20, 2013

DU MANAT NNA DARA LA GA

(Jinghpawkasa)

17/05/13 ya shani na Voice Journey kaw Awng Min (masu n dum) gaw “Anhpu annau ni shada bawng ban na re kadai maigan salang mung shang lawm madat na ahkang nnga ai” nga nna tsun shabrawng dat nu ai. Maigan lapran masam maram ya ai manam pyi n lawm jang gaw, bawng n bawng lachyum n pru na re gaw chye chyalu. N bawng ai wa mahtang kaja htum rai na re. Tset kawp n bawng saga ngu myu sha langai hku tang shawn mayu ai.
Ya hte kalang mi gaw maigan lapran salang lawm na hpe Miwa ni n ra sha rawng ma ai anhte gaw gadai lawm mi lawm tim hkraw ga ai nga ai re. Ndai zawn masha kaba tai nna pale palau nga shaga ai ni hte tset kawp n bawng yang she mai sai. Bawngban ai nga tim gara shara kaw, lu maw la na, kaning re n gun kya ai shara nga wa na kun? Dai hpe sha yu nna, shanhte gara hku tingnyang hta lu dung na, amyu bawsang ni hpe gara hku gau ngwi ngwi lu shamyit shamat kau lu na ngu ai hpe sha gyam nga ai ni re. Myit kaja ngu ai Chyinghkrang tum daram nan n rawng ai hpe dum nga ga.

2012 ning a Hkrismat ten kaw na 2013 ning a janaury htum maga de du hkra gasat ai majan a majaw Hpun Pyen Bum, Hka Ya Bum hte Laiza ginjaw makau na Da hpran dap ni law law hpe yen ya kau ra mat ai majaw, maigan du Wunpawng sha law law hte buga mare kaba de na Wunpawng sha ni grai masin kahpra, n ji n mu nga hkam sha lai wa saga ai. Ginjaw salang ni hte shawng lam kaw tinang a sinda hpe kaduk shatai nna, n sin n htoi Sa Wa ni hpe gasat shingla manga taw nga ai share shagan ni gade she myitru jamjau hkrum nga na re hpe tsun n dang hkra myit dum let mahkra hpe dang di lu ai Karai Kasang kaw kyu jawm hpyi ai ngu ai gaw, dik hta dik hkra rai lai wa sai. Akyu hpyi shagu, “shawng lam kaw share shagan nga ai myu tsaw mungtsaw hpyen la ni hpe si ai hkaraw a shingnip hta na hkye la ya rit. Ginjaw salang ni yawng hpe Wunpawng sha ni hte Wunpawng mungdan a matu kaja dik ai lam hpe lata la chye na hte kaja dik ai hku woi awn ningshawng lu na myit marai hte atsam jaw ya rit” ngu matut manoi kyu hpyi saga ai hte maren Karai Kasang madat ya nna shaman ya sai ngu ai hpe sak-se mu saga ai.

Amyu shamyit majan baw ai kaw nna n dai majan gaw laja dik ai majan nan mung rai nna, n dai majan a majaw, Wunpawng sha ni hpe mungkan kaw na grau chye mat masai. Hpa majaw nga yang dinghku majan hta n mai lang ai n bungli hte agying agang anut dat ai majaw, majan tara n lang ai ni re ngu mungkan e chye mat masai. Kadai n chye ai hku htinggrum kata kaw lagu htwi la mayu ai rai tim, Karai Kasang a chyeju majaw, mungkan ting chye mat wa sai. Moi lai wa sai ten hta Karen ni a Manepalaw hpe ndai zawn n bungli hte lagaw dap hte pawng nna jawm shakri dat ai majaw Manepalaw hkrat mat wa yu sai. Raitim dap sha hkrat nna, Karen rawt malan ni n hkrat mat ai hpe mu lu ai. Ya Laiza mung mai hkrat ai rai tim Myutsaw hpyen la KIO/KIA hte Wunpawng sha ni hkrat mat na nre. Wunpawng sha ni gaw sak hkrung ai Karai Kasang lu ai ni re majaw, mungkan n htum dingsa grin nga na amyu re ngu ai hpe sa wa myen ni chyena ging sai. Karen ni hpe gasat ai hta grau ai hku, anhte hpe n bungli hte, amyawk hte lagaw dap ni hte agying agang shakri yu tim, shanglawt langai hpe pyi n lu rim ai majaw, M kaba hte mau mat masai da. N mangai ai amyu ni, n loi ai amyu ni re ngu ai hpe atsawm chye la manu ai. Shanhte ma mat ai jarik hte lu ai akyu gaw wa shakap shai rai mat ai majaw, Bawngban lam de bai shakut wa ai she rai masai. Raitim shanhtte Liza hpe wang da lu sai majaw anhte hpe shingma kaw sinat madi nna bawngban shangun ai hte bung nga ai.

Ndai lahta de na majan laman hta hpa majaw shara mana maka htingnut ya kau ra ai ta? ngu ai hpe dinglun yu ai shaloi,
1. Myit jasat hta shanglawt ni atsawm sha dang ai.
2. Magrau grang ai lam shanglawt ni grau ai. (shata shabrai ra nna galaw ai nre. Myu Tsaw mungtsaw ai majaw galaw ai)
3. Lamu ga ginra chyoi chye ai hta shanglawt ni grau chye ai.
4. Hpyen gasat ai zai ladat shanglawt ni grau chye chyang ai. Jau gawng ladat hte re ai majaw machyu pala nau nma ai sha tang du ai. (kaji gawoi ni a prat labau hta majan gasat ram dik ai amyu ni re nga Inglik ni masat tawn da ai)
5. Hpyen n gun shanglawt langai a marai = Myen 10 a marai hte bung ai.
6. Amyawk Motor gade gap bun tim shanglawt ni n hkrit ai.
7. Shanglawt ni kaw Myen n bungli atsawm gap jahkrat lu ai sinat n lu ai.
8. Masha gap ai jak sanat hte she n bungli gap shakut ra ai.
9. Shanglawt ni kaw tsan tsan de gap bun mai ai laknak rai n lu ai.
10. Shanglawt ni kaw n taw n tsang gap lu na machyu pala naw ningra ai.
Laika ka ai wa hku na maram lu ai gaw, lahta na lam ni hpe yu ai shaloi myu tsaw ni kaw myit marai, masha marai, chye chyang ai marai ni law law hkum tsup nga sai rai tim no. 7, 9 hte 10 naw ningra ai majaw, n htingnut ging ai hpe htingnut mat ra ai re ngu mu lu ai. Grau nna, myen gaw galoi rai tim ganing nan n di jang n bungli lang na re ngu ai gaw anhte shari mu da sai re majaw, no. 7 n dai hpyen n bungli hpe gap jahkrat lu ai laknak gaw, anhte hta ra dik taw nga sai law. Madang grai tsaw ai n mai mari tim, gap n shut ai hkra ai baw gaw lam tam nna lu hkra shakut ra sai. Myen nbungli langai lung wa gap jahkrat, lahkawng lung wa gap jahkrat, masum lung wa gap jahkrat dat jang, n lung gwi sai. Sum mung n sum gwi sai. N bungli langai a manu myen mung ting na hpyen dap ni laning mi jai daram hpu ai. Pilot masum daram si jang kaga pilot ni yawng htawng rawng hkam nna pru mat na mara ai. Nbungli n lu lang jang shanglawt hpe hkrap hkra gasat tim nmai dang ai ngu ai hpe mahkrum madup a majaw tsun lu ai.
No. 9 lu jang gaw grau madang tsaw mat wa sai. Wa rawt malan hpung ni hpe myen ni saw bai taw nga ai gaw, tsan tsan de gap lu ai laknak nga ai ngu myen ni shadu nga ai majaw re. Wa hpe sa hkra shut jang, Nepyidaw de amyawk kaba gap bang ya na tsang ai majaw, Wa ni hpe masawp taw nga ma ai re. Nepyidaw gaw myawk langai gap bang lu jang poi ngut sai. Tsaw ra ai Wunpawng sha ni e anau ni mung mungkan prat madang tsaw mat wa sai hte maren madang tsaw tsaw myit yu ra ai ten mung rai nga sai. Moi lang ai wan yam, moi lang ai machyu pala, moi lang ai laknak sha gaw dai ni madang n dep, shingjawng n mai mat wa sai hpe dum nna, aprat hta hkan nna mung myit yu galaw yu rai wa saga. Sum tsan degap lu ai, Nbungli gap jahkrat lu ai Rocket ni Dungkyi ni lu da sai ngu ai kaw na gaw, Laiza kaw na Myitkyina MPHK de madi da sai, Manmaw myen dap de shading da sai ngu dat jang, myen gaw Wunpawng sha ni hpe Jinghpaw Mung hpe nanhte ra ai hku up sha mu, garan gaw hkum garan pru mu yaw nga nna, anhte a mungdan hpe anhte lata de ap wa na mara ai. Shing nrai dai ten du tim ga ja ja nga naw shaga nga jang gaw, Myitkyina, Manmaw hte Putao hpe zing gabai kau nna, Mandalay, Nepyidaw hte Yangon de gap bang na Dungkyi ni hpe shachyen madi da jang, ngut sai gaw. Htim lung wa gwi yang mung htim lung wa mu ga. Lung wa ai n bungli hpe langai lung wa langai gap jahkrat kau kau di dat jang, n lung gwi sai.
Myitkyina, Manmaw, Putao ni hpe lu zing sai ngu ai hte gaw, Maigan de na gasat n bungli ni hpe shaga la mai sai. Anhte mung gasat n bungli ni lu sai hte gaw, hpa nan n hkrit ra sai. Dai shaloi Shingma kaw sinat madi da nna, bawngban shangun ai ni hpe shanhte a du manat da nna dara la saga. Ya anhte hpyi ai gaw Federal madu up hkang mungdaw hpyi tim dai shaloi lu wa na gaw, Awngdawm Wunpawng Mungdan lu wa na re. Dai gaw anhte Karai Kasang hpe kamsham let shakut sa nga jang Karai Kasang gaw grai lawan ai hku teng teng jaw na re. Dai ten hta myu tsaw mung tsaw hpyen la ni nam hkan e n ganyip hkawm taw ra sai. Yawng gaw Myen ni hprawng shakram da ai hpyen dap berack kaba de wa htawt nga nna, Tinang ra ai hku dap rung ni hpe atsawm sha bai gaw gap la rai, amyu hte mungdan hpe prat tup sa wa ni lata bai n shang mat hkra makawp maga nga sana re. Mare masha ni mung hpyen hprawng hprawng n ra sai. Tinang a mare buga hta wanglu wanglang rai bai gaw gap la nna ningngai nga na re. Wunpawng sha ni a mungdan gaw sut ngai mungdan rai nga ai hte maren, Wunpawng Hkanan a nam chyim namta hpe lai sha let galu kaba nga sai, chye chyang dik sai, myit su sai maigan mungdan ni hte ta hkindun nna, mungdan hpe gaw de sa wa yang chyahkring na laman garawt shaw dat ai zawn galu kaba mat wa na rai nna, mungkan hta dan hkung ai amyu, sahte amyu ni tai wa na ga ai. Dai ten hta tutnawng kabu awlaw let Anhte A Awng Padang Yehowa Karai Kasang a chyeju hpe prat tup shakawng nga na saga ai law.

Myu sha yawng a shangun ma
Agu Namti

1 comment:

  1. This piece of writing is actually a pleasant one it helps new the web visitors, who are
    wishing in favor of blogging.

    My blog post plate lunch

    ReplyDelete

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။