Thursday, May 16, 2013

(2) NING HPRING GASAT MAJAN MASA

(Jinghpawkasa)

June 9,2013 ning hta gaw myen hpyen ni hte tinang KIA a lapran gasat majan kaba byin nga ai (2) ning ladaw hpring na sai. Ndai gasat majan ladaw aten na byin nga ai mung masa, hpyen masa, mung shawa ni a mabin hpe maram dinglik yu ga nga yang;

Mung masa mabyin hta, U Thein Sein a democracy asuya galai uphkang wa ai (2) ning rai wa sai zawn shi a myen hpyen dap ni tinang jinghpaw wunpawng myu sha ni hpe htim gasat majan baw taw nga ai mung (2) ning hpring sai. Teng man ai munghpawm, teng man ai majan jasim kau lu na matu tinang KIO kaw nna mung masa proposal hpe nyet kau ya nga ding yang rai nga ai. lahkawng maga na hpyen man ni hpe htingnut shagang tawn na hpe sha galaw na hkyen nga lam gaw majan prai mat na matu nre sha majan chying hkraw galu taw nga na matu mahkam galaw nga ai lam sha rai nga ai.


U Thein Sein asuya gaw lang hte lang lachyum npru hkrum bawng jahta woi nna aten garawt galaw nga ai lam gaw mungkan mungdan ni hpe simsa lam hte democracy mungdan gaw de nga ai ngu ai hpe htawng madun dan nna maigan gumhpraw shang lam hpaga galaw ai, du wa na 2015 ning a ra lata poi hta Kachinland shara ma hkra hta ra lata lamang bai awngdang la lu na matu nyan galaw ai nga ai hte ya ten jinghpaw wunpawng myu sha ni mungmasa,hpyen masa lam yen ni hta myit hkrum pawng hpawm galaw nga ai lam ni hpe gawng kya tsam ayai mat wa hkra ladat shaw galaw nga ai hpe mu lu nga ai. 

Kachinland hta hpyen masa shamu shamawt ai lam n’galaw sai zawn mungkan de ndau shabra nga tim myen hpyen dap ni hpyen n’gun grau nna ja wa hkra shagreng nga dingyang galaw nga ma ai. Shanhte zing madu la da ai shara ni hta hpyen dap ni grau hkrak hkra galaw shagreng nga ma ai, KIA ni nga ai shara shagu hkan e gyam sawk gasat hkawm nga ding yang rai nga ai. Ndai zawn hpyen masa hpe madung shagreng nna simsa lam galaw ga ngu ai gaw kam mai ai lam nga na kun?. U Thein Sein asuya a myit hkrum lam hpe kam na matu yak nga ai lam sakse ni gaw, ga shadawn ya ten SSA -Sam hpu-nau ni hpe gram gasat taw nga ai hpe mu lu nga ai. laiwa sai shaning hta sha myit hkrum lam (30) jan hpe bawngban myit hkrum nna sen htu da ngut chyalu rai nga malu ai. Hpu nau sam SSA ni hpe ndai zawn galaw nga ai gaw yu kaji, yu roi ai masa rai nga ai.

Jinghpaw wunpawng mung shawa sen jan gaw U Thein Sein asuya a myen hpyen ni sat zingri ai majaw hprawng yen nga ra ai gaw (2) ning hpring sai. Mung shawa hpyen yen ni hpe garum jaw na lam tsep kawp myit ai lam nnga ai hta n’ga maigan mungdan kaw na sa garum jaw na hpe du hkra pat tawn da ya nga ai. Dai zawn galaw nga ai gaw jinghpaw wunpawng mung shawa ni ntsa shing gyim nau na myit tsepkawp nnga sai hte hpyen hku nna sha masat da sai majaw shakyet sat majan galaw ai lam rai nga ai.

Ndai zawn myen hpyen asuya ni ladat amyu myu hte jinghpaw wunpawng myusha ni hpe shamyit majan galaw nga ding yang rai nga ai gaw, jinghpaw wunpawng myusha ni sak hkrung nga pra lam hte mungdan grin nga lu na matu tsang hpa lam ni rai nga ai. Dai majaw myu hkye, mung hkye lam hpe ja greng ai hku galaw la ra nga ai hpe madun ai lam rai nga sai.

Ya ten madung galaw ra nga ai myu hkye, mung hkye lam ni gaw;

1) Awng Padang lam hpe matut hkam la lu nga na matu KIO/KIA hte mung shawa yawng myit hkrum ai hte matut nna nsim nsa akyu hpyi ai lam galaw ra ai,

2) Myen hpyen asuya hte mungmasa bawng gin rat hkat ai lm hta sakse galaw ya na maigan mungdan ni shang dung lawm lu hkra galaw ra ai,

3) KIA hpen dap grau ring chying greng wa lu hkra jinghpaw wunpawng yawng pawng hpawm nna arung arai garum ai, hpaji ladat ni hte ap nawng lam galaw ra ai,

4) Mungshawa a asak makawp maga na hte mungdan hpe makawp maga na matu ja greng ai laknak kaba, kaji alaw alam lu hkra ginjaw KIO/KIA kawn woi galaw ra ai,

5) Mungdan kata, shing-gan hkan e myu hte mungdan a matu mai kaja lam galaw nga ai kachin communities, kachin civil society groups ni hpe ginjaw KIO kawn masat masa galaw, matut mahkai la nna mungdan magam bungli ni hprai shatsam ai lam ni hpe galaw ra ai.

Ndai lamang ni hpe atsawm hkrang gran galaw lu wa ai rai yang Jinghpaw wunpawng yawng ngang kang ai myit hkrum lam nga wa nna aten kadun ladaw hta myusha yawng myit mada ala nga ai awng padang lam hpe hkam la lu na re hpe ding lik maram tang madun dat ai law.

M. Zau Hkum

(Ndai laika ngau gaw majan kaba bin nga shara ni, hpyen yen mung shawa ni shing byi nga ai shara ni, ginjaw shara ni hkan yu maram hkawm lu ai masa lam ni ntsa e lakap nna ka ai re, grau kaja hkra hpaji jaw la mayu ai ni - wpstar7@gmail de ka shana mai ai).

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။