Thursday, April 11, 2013

ကချင်ဒုက္ခသည်များကို ကူညီရန်လာသော ကုလသမဂ္ဂ ယာဉ်တန်းကို အစိုးရ တားမြစ်

(ကချင်သတင်းဌာန)

တရုတ်-မြန်မာ နယ်စပ် ကချင်ပြည်နယ် မိုင်ဂျာယန် (Mai Ja Yang) ရှိ ပါကထောင် (Pa Kahtawng) ဒုက္ခသည် စခန်းသို့ ကူညီထောက်ပံ့ပေးရန် ကုလသမဂ္ဂအဖွဲ့များ၏ ပစ္စည်းများသယ်ဆောင်လာသော ယာဉ်တန်းများအား ဗန်းမော်အစိုးရမှ ဆိုင်းငံ့ထားကြောင်းသိရသည်။

ကူညီပေးရန် လာနေသော ကုလသမဂ္ဂအဖွဲ့(၄)ဖွဲ့၏ မော်တော်ယာဉ် (၇) စင်းတွင် နိုင်ငံခြားသားတစ်ဦးပါလာခြင်းကြောင့် မြန်မာစစ်တပ်က ကချင်လွတ်မြောက်ရေးအဖွဲ့ (KIO) ထိန်းချုပ်သည့် မိုင်ဂျာယန် (Mai Ja Yang) သို့ဖြတ်သန်းသွားလာခွင့်အတွက် အထက်ကိုပြန်လည်တင်ပြရမည်ဖြစ်၍ တားမြစ်လိုက်ဖြစ်ကြောင်း ဒုက္ခသည်ကော်မတီမှပြောသည်။


ကုလသမဂ္ဂ ယာဉ်တန်းသည် ဗန်းမော်မှ မိုင်ဂျာယန် (Mai Ja Yang) သို့ မူကလ ဧပြီ ၉ ရက်နေ့ ရောက်လာရန်စီစဉ်ထားသော်လည်း တားမြစ်ခံရသောကြောင့် ယနေ့ထိ မရောက်နိုင်သေးကြောင်း သိရသည်။

ထိုသို့တားမြစ်ထားချိန် နှစ်ဖက်ညှိနှိုင်းမှုများ ကြံ့ကြာကောင်းကြံ့ကြာနိုင်သော်လည်း ၄င်းအဖွဲ့အား မျှော်လင့်နေမည်ဖြစ်ကြောင်း KIO ဒုက္ခသည်ကယ်ဆယ်ရေးကော်မတီ  ဥက္ကဌ ဆလန်ကဘာဒွဲပီဆာပြောသည်။

"ဘယ်ချိန် ရောက်လာပြီး ကူညီနိုင်မလဲမသိဘူး။ သူတို့ကြိုးစားမယ်လို့တော့ပြောတယ်။ လနဲ့ကြာအောင် ကြိုးစားရမလား တော့မသိဘူး။ အစိုးရကခွင့်မပေးရင်တော့ မလာနိုင်ဘူးပေါ့။ ဒါမဟုတ် နိုင်ငံခြားသား မလိုက်ရင် ရမလား။ သူတို့ရောက်လာရင်တော့ ကြိုဆိုတယ်" ဟု ဆလန်ကဘာ ဒွဲပီဆာ KNG ကချင်သတင်းဌာနသို့ပြောသည်။

၎င်း ကုလသမဂ္ဂ UN အကူညီပေးရေး မော်တော်ယာဉ်တန်းသည် အစားအသောက်ခက်ခဲနေသော မိုင်ဂျာယန် ပါကထောင် (Pa Kahtawng) စစ်ပြေးဒုက္ခသည်စခန်းတစ်ခု အတွက်သာ ထောက်ပံ့ကူညီရန်ဖြစ်ကြောင်းသိရသည်။

ဒုက္ခသည်စခန်းသို့ လာရောက်သော ယာဉ်တန်းများသည် ကုလသမဂ္ဂ လူသားချင်းစာနာထောက်ထားမှု အကူအညီပေးရေးဌာန UNOCHA ဦးစီးပြီး ကုလသမဂ္ဂကလေးများ ရံပုံငွေအဖွဲ့ UNICEF၊ ဒုက္ခသည်များဆိုင်ရာ မဟာမင်းကြီးရုံး UNHCR နှင့် ကမ္ဘာ့စားနှပ်ရိက္ခာအဖွဲ့ WF တို့ပူးပေါင်းပြီး ကူညီပေးရန် ရောက်ရှိလာခြင်းဖြစ်ကြောင်းသိရသည်။

သို့သော် အကူညီများသည် မိုင်ဂျာယန် (Mai Ja Yang) ရှိ ဒုက္ခသည်စခန်းများအတွက်သာဖြစ်ပြီး ထိုစခန်းများတွင်လည်း အခက်ခဲများစွာရှိသောကြောင့် ထောက်ပံ့ပစ္စည်းများ မလုံလောက်မည်ကို သုံးသပ်နေကြသည်။

"UN တွေလာမယ်လို့တော့ပြောတယ်… သူတို့စာရင်းထဲမှာ ဆန်မပါဘူး။ အခြားပစ္စည်းတွေပဲပါတယ်။ ကျနော်တို့က အဓိကအစားအသောက် လိုအပ်နေတယ် အဲဒီမှာဒုက္ခသည် စခန်းအများကြီးရှိတယ်။ တခြားဒုက္ခသည် စခန်းလည်းမသွားဘူး။ အဲဒီစခန်း ၁ ခုမှာပဲသွားမှာဖြစ်တယ်။ UN တွေလာတယ်လို့ နာမည်ကထွက်ပြီး ကူညီမှုက ထိရောက်မှုမရှိတော့ အဲဒါကို စိုးရိမ်းတယ်" ဟု ဒုက္ခသည် ကယ်ဆယ်ရေး ကော်မတီဥက္ကဌ ဆလန်ကဘာ ဒွဲပီဆာပြောသည်။

ယခုတကြိမ်အကူညီပေးရာတွင် ဒုက္ခသည်စခန်းတွင် အဓိကလိုအပ်သော ဆန်မပါခြင်းသည် UN များ စိတ်ကြိုက်ကူညီဖို့ရန် အစိုးရအုပ်ချုပ်မှုအောက်တွင် အကန့်အသတ်နှင့် ခက်ခဲမှုများရှိနေခြင်းဖြစ်သည်ဟုလည်း ဒုက္ခသည်ကူညီရေးအဖွဲ့မှ သုံးသပ်သည်။

ထို့သို့ ကုလသမဂ္ဂမှ ကချင်စစ်ပြေးဒုက္ခသည်များကို အကူအညီပေးရန် အသင့်ဖြစ်နေသော်လည်း ထိုအကူအညီများကိုရရှိရန် ကြားနေအစိုးရပေါ်တွင် မူတည်နေသည်ဟု ပြောသည်။

"UN တွေကူညီဖို့ရန် တာဝန်ရှိတယ် ဘတ်ဂျက်ရှိတယ်။ အစိုးရက သူတို့စိတ်ကြိုက်လုပ်တယ်လို့ပဲ မြင်တယ်။ မနှစ်ကဇူလိုင် လကုန်ကနေ မလာတော့ဘူး။ သူတို့မလာချင်လို့ မလာတာမဟုတ်ဘူး။ အစိုးရပိတ်လို့ မလာတာ" ဟု  ဆလန်ကဘာ ဒွဲပီဆာ KNG ကချင်သတင်းဌာသို့ ပြောသည်။

ကချင်စစ်ပြေးဒုက္ခသည်များအတွက် ကုလသမဂ္ဂအဖွဲ့များက ပြီးခဲ့သည့် ၂၀၁၂ ခုနှစ် ဇူလိုင်လက ပထမအကြိမ် ပစ္စည်းနှင့် ရိက္ခာများ တကြိမ်လာရောက်ကူညီပေးခဲ့ပြီး ယခုအကြိမ်သည် ဒုတိယမြောက်ဖြစ်သော်လည်း ဆိုင်းငံ့ခံနေရခြင်းဖြစ်သည်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။