Thursday, March 14, 2013

UWSA ကို ဦးတည်လိုက်တဲ့ အစိုးရရဲ့ မဟာဗျူဟာ

(စည်းလုံးခြင်းရဲ့အင်အား)


မြန်မာနိုင်ငံ မူးယစ်ဆေးဝါး ပပျောက်ရေး (၁၅) နှစ် စီမံကိန်းကို ရေးဆွဲ ထား ခဲ့ပေမဲ့ မအောင်မြင်ရတဲ့ အကြောင်းရင်း  အများအပြား ရှိပါတယ်။ ဒေသခံ တိုင်းရင်းသားများ အနေနှင့် ရပ်တည်ရေးနဲ့ ဝမ်းစာ ဖူလုံရေး တို့အတွက် အစိုးရက လုံလုံလောက်လောက်  ဘိန်းအစားထိုး အခြေခံ သီးနှံများကို မပေးနိုင် တာကလည်း အကြောင်းရင်းတစ်ရပ် ဖြစ်ပါတယ်။ ဘိန်းမှရတဲ့ ဝင်ငွေတွေဟာ အခြားသီးနှံထက် ပိုကောင်းတာမို့ အချို့ တောင်သူများ အနေနဲ့ စွန့်လွှတ်ဖို့ ဝန်လေးနေဟန် တူပါတယ်။ အလား တူ တိုင်းရင်းသား လက်နက်ကိုင် တပ်ဖွဲ့ဝင်များအနေနဲ့ မှီခိုမိသားစုများ အပါအဝင် တပ်ဖွဲ့ဝင်အားလုံးရဲ့ စားဝတ်နေရေးကို ရှာဖွေ ဖန်တီးပေးရမှု ဝန်ထုတ် ဝန်ပိုးဟာလည်း ကြီးမားလှပါတယ်။

လက်နက်ခဲယမ်း စစ်ဝတ်တန်ဆာများ၊ ရ်ိက္ခာများ၊ စက်သုံးဆီများ၊ အုပ် ချုပ် မှုကိစ္စရပ်များ စသည်တို့ အတွက် သုံးစွဲရမှု ငွေကြေး ကုန်ကျစရိတ် ဟာလည်း ကြီးမားလှတယ်။ ဒါကြောင့် တချို့ တိုင်းရင်းသား လက်နက် ကိုင်များဟာ ဘိန်းစိုက်ပျိုးထုတ်လုပ်မှု၊ ရောင်းဝယ် ဖောက်ကားမှုတို့ လုပ်နေကြရခြင်းနဲ့ ပတ်သက်ပြီး ခေါင်းဆောင်တချို့က မသိကျိုးကျွံ လွှတ်ထားပေမဲ့ နိုင်ငံတကာကတော့ သိရှိပါတယ်။ အမေရိကန်နိုင်ငံ အနေနဲ့ UWSA ခေါင်းဆောင်များကို မူးယစ်ဆေးဝါး ရာဇာများအဖြစ် ဖမ်းဆီးဖို့ ဆုငွေထုတ် ကြေညာခဲ့ပါတယ်။


UWSA တပ်ဖွဲ့တွေဟာ တရုတ်အစိုးရရဲ့ လွှမ်းမိုးထောက်ပံ့မှု ရှိခဲ့တယ်လို့ ဂျိမ်းစာစောင်အဖွဲ့က စွပ်စွဲ ခဲ့ပါသေးတယ်။ တိုင်းရင်းသား လက်နက်ကိုင် တပ်ဖွဲ့များထဲမှ UWSA တပ်ဖွဲ့တွေဟာ အင်အား သုံးသောင်းခန့်ရှိပြီး အတောင့်တင်းဆုံး အဖွဲ့ဖြစ်သလို ယခင်က ကွန်မြူနစ်ပါတီမှ ခွဲထွက်လာ ခဲ့ခြင်း ဖြစ်ပါတယ်။ UWSA အဖွဲ့ဟာ UNFC အဖွဲ့ထဲသို့ ဝင်ရောက်ခြင်း မရှိတဲ့အပြင် အခြား တိုင်းရင်းသားများနဲ့ ရောထွေးဆက်ဆံခြင်း မရှိတာ လည်း တွေ့ရပါတယ်။ ဒါပေမဲ့ UWSA ဟာ KIA နဲ့ SSA တပ်ဖွဲ့တွေကို နောက်ကွယ်မှ လက်နက်ခဲယမ်း ရောင်းချထောက်ပံ့နေတယ်လို့ စစ်ဘက် နီးစပ်သူများရဲ့ အတည်ပြုဆဲ သတင်းများအရ သိရှိရပါတယ်။ KIA နဲ့ တပ်မတော် ထိပ်တိုက် မတွေ့မှီကလေးကပင် တပ်မတော် ကာကွယ်ရေး ဦးစီးချုပ် ဒုဗိုလ်ချုပ်မှူးကြီး မင်းအောင်လှိုင်ဟာ ကျိုင်းတုံသို့ ရောက်ရှိခဲ့ပြီး UWSA ထိပ်တန်း ဒုတိယ ခေါင်းဆောင်နဲ့ တွေ့ဆုံခဲ့ကာ KIA ကို မထောက် ပံ့ဖို့ ပြောကြားခဲ့သေးတယ်လို့ ဆိုပါတယ်။

အစိုးရနဲ့ UWSA ဆက်ဆံရေးဟာ ပုံမှန်သာရှိပြီး အချို့အချိန်ကာလများ တွင် အေးတိအေးစက်ရှိခဲ့ရာမှ တချို့ အချိန်များမှာ တင်းမာမှုတောင် ဖြစ်ခဲ့ပါသေးတယ်။ ဗိုလ်ချုပ်ခင်ညွန့် လက်ထက်က အစိုးရနှင့် UWSA ဟာ ရင်းနှီးကျမ်းဝင်မှု ရှိခဲ့ပေမဲ့ နောက်ပိုင်းတွင် တင်းမာတဲ့ ဖြစ်စဉ်များ ဖြစ်ခဲ့ပါတယ်။ ရှမ်းပြည်နယ်တောင်ပိုင်း ဘိန်းဘုရင်ခွန်ဆာရဲ့ လွယ်မော် MTA အဖွဲ့ကို တပ်မတော်နှင့် UWSA ပူးပေါင်းတိုက်ခိုက်ခဲ့စဉ်က အောင်မြင်မှု ရခဲ့ပေမဲ့ ရှမ်းပြည်နယ် တောင်ပိုင်းမှာ ရောက်နေတဲ့ (ဝ) တပ်ဖွဲ့တွေဟာ ရှမ်းပြည်နယ်မြောက်ပိုင်းကို ပြန်မသွားတော့ဘဲ လက်ရှိနေရာမှာပင် ခြေကုပ်ယူ တည်ဆောက်ခဲ့ပါတယ်။ ဒါကိုသိလို့ ဒုတိယဗိုလ်ချုပ်မှူးကြီး မောင်အေးက နေရာပြန်ဖယ်ပေးဖို့ အမိန့်ပေး တောင်းဆိုခဲ့သော်လည်း (ဝ) တွေက အသက်သွေးချွေး ရင်းနှီးခဲ့ရလို့ အကူအညီတောင်းတုန်းက တောင်းခဲ့ပြီး အောင်မြင်မှ ပြန်ခိုင်းတာဟာ မတရားဘူးလို့ ဆိုကာ ငြင်းဆန်ခဲ့ပါတယ်။

ဒါကြောင့် တပ်မတော်ခေါင်းဆောင် တချို့အနေနှင့် နောင်တချိန်မှာ ဦးတည်ရန်သူ ဖြစ်လာမဲ့ လက်နက်ကိုင်အဖွဲ့အစည်းဟာ UWSA လို့ ဆိုပါတယ်။ ၂၀၁၀ ခုနှစ် ရွေးကောက်ပွဲ မကျင်းပမှီ BGF ဖွဲ့ဖို့ UWSA ကို တွန်းအားပေးခဲ့စဉ်ကလည်း ငြင်းဆန်ခဲ့ပါတယ်။ UWSA အနေနဲ့ အစိုးရ ဝန်ထမ်းများကို ထောက်လှမ်းရေးဟု စွပ်စွဲကာ သူတို့နယ်မြေမှ နှင်လွှတ် ခဲ့ပါတယ်။ ၂၀၁၀ ခုနှစ် ရွေးကောက်ပွဲ ကျင်းပပြန်သော်လည်း UWSA က ကိုယ်ပိုင်အုပ်ချုပ်ခွင့် ရထားပေမဲ့ သူတို့ တောင်းဆိုတဲ့ အချက်အလက် များ ကိုတော့ အစိုးရက ပြည့်စုံစွာ လိုက်လျောခြင်း မရှိခဲ့ပါ။ ကျိုင်းတုံမြို့ အား သူတို့မြို့တော်အဖြစ် တောင်းဆိုထားကြောင်း သိရပါတယ်။

ယခုကျင်းပနေတဲ့ လွှတ်တော်များမှာ UWSA မှ ကိုယ်စားလှယ်တော်များ မတက်ရောက်နိုင်တာ တွေ့ရှိရပါတယ်။ ယခင်က ရှမ်းပြည် အရှေ့ပိုင်း အမျိုးသား ဒီမိုကရေစီမဟာမိတ် တပ်မတော် (NDAA) မိုင်းလား  ဦးစိုင်းလင်းအား UWSA က စည်းရုံးထားပြီးဖြစ်ပါတယ်။ အစိုးရနဲ့ UWSA ငြိမ်းချမ်းရေး သဘောတူစာချုပ် ချုပ်ဆိုခဲ့ပေမဲ့ အစိုးရအား ယခင်က လောက် ထိတွေ့ ဆက်ဆံမှု မပြုလုပ်တော့ဘဲ သတိထား ဆက်ဆံတာ တွေ့ရပါတယ်။ KIA နဲ့ UWSA ဟာ ယခင်က လျှို့ဝှက်စွာ ဆက်ဆံခဲ့ပေမဲ့ ဖားကန့်မှာ ဗုံးကွဲလို့ ဆက်ဆံမှု တင်းမာ ခဲ့ပါသေးတယ်။ အစိုးရနဲ့ KIA တို့ ငြိမ်းချမ်းရေး ဆွေးနွေးပွဲ ပြုလုပ်ဖို့နေရာကို အရင်ကနဦး ပထမတုန်းက UWSA ဧရိယာအတွင်းမှာ ပြုလုပ်ဖို့ ဖြစ်ပေမဲ့ တရုတ်နိုင်ငံ ရွှေလီသို့ ပြောင်းသွားတာဟာ တစုံတခု အကြောင်းရှိလို့ ပြောင်းသွားတာ ဖြစ်ကြောင်း စစ်ဖက်နီးစပ်သူက ဆိုပါတယ်။ UWSA (ဝ) တွေဟာ ယူနန်ပြည်နယ် တရုတ်နိုင်ငံ လွှတ်တော်များကို သွားရောက်တဲ့သတင်းနဲ့ တရုတ်တပ်မတော်မှ အငြိမ်းစား အရာရှိကြီးများက UWSA တပ်ဖွဲ့ဝင်တွေ ကို လေကျင့်သင်ကြားနေတဲ့ သတင်းများလည်း ထွက်ပေါ်လျှက် ရှိပါ တယ်။

အစိုးရက စိုးရိမ်ပူပန်မှု ဖြစ်လာပြီး ငြိမ်းချမ်းရေး ဖော်ဆောင်ရေး လုပ်ငန်း ကော်မတီ ဒုတိယဥက္ကဋ္ဌ ဦးအောင်မင်းအား စေလွှတ်ကာ UWSA ခေါင်းဆောင်များကို လွှတ်တော်များမှာ တက်ရောက် လေ့လာစေဖို့ ဖိတ်ကြား စည်းရုံးခိုင်းခဲ့ပါတယ်။ အဆိုးဆုံးမှာ ပြီးခဲ့တဲ့ ပြည်ထောင်စုနေ့ အခမ်းအနားတွင် လက်နက်ကိုင် တိုင်းရင်းသား အဖွဲ့ ခေါင်းဆောင်များ တော်တော်များများ အစုံအလင် တက်ရောက်ကြပေမဲ့ ဦးစိုင်းလင်းနဲ့ UWSA ခေါင်းဆောင်များ မတက်ရောက်တာဟာ အစိုးရအနေနဲ့ ဘဝင်မကျစရာ ဖြစ်ခဲ့တယ်လို့ သိရပါတယ်။ ဒါကြောင့် အစိုးရအနေနှင့် UWSA ကို ကိုင်နိုင်ဖို့ အနိုင်ဖဲချပ်ဆွဲဖို့ မဟာဗျူဟာ အခင်းအကျင်းသစ် လုပ်ဆောင်လာတယ်လို့ စစ်ဖက်နီးစပ်သူများက သုံးသပ်ပါတယ်။ ဒါကတော့ မြန်မာနိုင်ငံနဲ့ အမေရိကန်ပြည်ထောင်စုဟာ ဘိန်းအထွက် တိုင်းတာရေးနဲ့ မူးယစ်ဆေးဝါး တိုက်ဖျက်ရေးအေဂျင်စီ ထူထောင်မှု တွေမှာ ပူးပေါင်းဆောင်ရွက်ဖို့ သဘောတူစာချုပ်ကို ၂၂ - ၂ - ၂၀၁၃ ခုနှစ်မှာ လက်မှတ် ရေးထိုးခဲ့ပါတယ်။ 
အမေရိကန် အစိုးရနဲ့ မဆလအစိုးရ လက်ထက်ကပင် ရှိခဲ့တဲ့ မူးယစ်ဆေးဝါး နှိမ်နင်းရေးမှာ အဓိကပါဝင်တဲ့ ဘိန်းအထွက်နှုန်း တိုင်းတာရေး အစီအစဉ်အား ပြန်လည် အကောင် အထည် ဖော်လိုက်တာဘဲ  ဖြစ်ပါတယ်။ မူးယစ်ဆေးဝါး နှိမ်နင်းရေး အကြောင်းပြပြီး တပ်မတော်မှ နယ်မြေများကို ထိုးဖောက်ဝင်ရောက်ရာမှာ UWSA နဲ့ ထိပ်တိုက်တွေ့တော့မှာ ဖြစ်ပါတယ်။ UWSA ခေါင်းဆောင်များ ဟာ အစိုးရက အမေရိကန် အရှိန်အဝါ သုံးပြီးတော့ ပူးပေါင်းလက်တွဲ မလား ဆိုတဲ့ မေးခွန်းကို အမေးခံရမဲ့ အလားအလာ ရှိနေကြောင်း စစ် ဖက်နီးစပ်သူများက သုံးသပ်တင်ပြခဲ့ပါတယ်။

No comments:

Post a Comment

Comment များကို စီစစ်ပြီး တင်ပေးပါမည်။ မိုက်ရိုင်းသော၊ လူသားမဆန်သော Commet များ တင်မပေးပါ။