Thursday, March 7, 2013

KIA Masat (11) Dap Dung Ginra Ni Hta Matut Manoi Gasat Poi Byin Nga

(Kachinnet)


2013 March (5) ya jahpawt hkying (8:00)am aten ram hta Magui Pukku Daju ai Myen Asuya Hpyen Dap, Dap Nu (101) kata na Ni Byu Ha Mu Colonel Win Ko Ko woi awn ai hpyen hpung ni gaw hpyen n-gun (400) ram hte KIA Masat (11) Dap Dung , Masat (3) Dap Kung ni shara la nga ai Mali Sut Yang mare makau de htim shadut shang wa ai majaw KIA Masat (11) Dap Dung na hpyen hpung ni ninghkap shingla gasat poi byin ai lam chye lu ai.


Matut nna nadai Myen Asuya Hpyen Dap, Dap Nu (101) kata na hpyen hpung ni gaw Gat Shang Yang maga de matut shamu shamawt lung wa ai hpe Lai Hkau Bum kaw nga ai KIA hpyen hpung ni numdaw mi bai ninghkap shingla gasat ai hpang shana de hkying (6:05)pm aten ram hta Lai Hkau Pa makau kaw kalang bai ninghkap shingla gasat poi byin ai lam hpe chye lu ai.



Ndai Myen Asuya Hpyen Dap Dap Nu (101) kata na hpyen hpung ni gaw shana hkying (9:00)pm aten ram hta Gat Shang Yang mare makau na kanoi sun kaw hkring nga ai lam hpe na chye lu ai.
Magui Pukku Daju ai Myen Asuya Hpyen Dap, Dap Nu (101) na hpyen hpung ni gaw hpyen n-gun 400 ram hpe hpung (2) garan nna 2013 March  (4) ya kaw nna KIA Masat (11) Dap Dung ginra ni de shamu shamawt shang chying lau hkawm nga ai re lam hpe chye lu ai.


Ndai  aten laman hta Myen Asuya Hpyen Dap ni gaw KIA hpyen hpung ni shara la nga ai Hpyen Dap, Shawng Lam Post shara ni de grai ni gahtep ai hku lak lai nna shamu shamawt hkawm nga ai hte Myen Asuya Dap ni gaw masha n-gun, malu masha, sinat laknak, ni grau nna htaw jahting jat nga dingyang re lam hpe chye lu ai.


KIA Masat (5) Dap Ba, Masat (3) Dap Dung makawp maga ginra Wa Shawng mare kaw 2013 March (2) ya shani Myen Asuya Hpyen Dap Dap Nu (88) kata na hpyen hpung ni hpyen ngun (200) ram mahkawng nga ai lam chye lu ai.

Dingda Sam Mung Daju ai Myen Asuya Hpyen Dap Ts.K.Hk-7 kata na hpyen hpung ni gaw KIA Masat (2) Dap Ba ginra rai nga ai Dum Bung, Loi Li Yang maga de ni kahtep shara la nga sai lam chye lu ai.


2013 March (4) ya jahpawt hkying (9:00)am aten ram hta KIA Dap Nawng Daju ginra ni de Mungywa Daju ai Myen Asuya hpyen Dap,  Dap Nu (33) kata na hpyen hpung ni gaw hpyen n-gun (200) ram hte Gang Dau Yang mare kaw nna Lai Hkra Yang maga hku N-Pawn mare de du shang shara la nga sai lam hpe chye lu ai.


Ndai Myen Asuya Hpyen Dap, Dap Nu (33) kata na hpyen hpung ni gaw hpyen n-gun (130) ram Wa Shawng lam hku nna Chihpwi maga de KIA Masat (10) Dap Dung ginra ni de lung wa sai lam hpe chye lu ai.


KIA Masat (1) Dap Ba, Masat (10) Dap Dung ginra, Lawkhkawng Ginwang, Lu Pi mare  hta 2013 March (4) ya shani Myen Asuya Hpyen Dap ni Helicopter hte hpyen n-gun (100) ram wa htaw sa tawn da ai lam hpe na chye lu ai.


2013 March (5) ya hkying (8:00) aten KIA Masat (3) Dap Ba, Masat (27) Dap Dung Shwigu Ginwang, Lahkum Bum, Nalung Bum maga de Myen Asuya Hpyen Dap ni Gumra htaw mawdaw (5) Hpyen n-gun machyu pala, laknak htaw mawdaw (27) hte wa htaw sa shara jahkrat tawn da ai lam hpe chye lu ai.   

No comments:

Post a Comment

Comment မ်ားကုိ စီစစ္ျပီး တင္ေပးပါမည္။ မုိက္ရုိင္းေသာ၊ လူသားမဆန္ေသာ Commet မ်ား တင္မေပးပါ။